2009-09-10
01. A dyondzo ya hina leyi hundzeke, a yi vulavula hi ntirho wa Moya lowo Kwetsima etikweni ra Antiyoka ni ta riendzo ro sungula ra Pawulo na barnaba.
02. Eka dyondzo leyi, hi ta languta swinene eka ta riendzo ra vumbirhi ra Pawulo.
03. Loko hi nga se ya kule hi ta riendzo ra yena, pfula swin’we na mina eka Mintirho 15: 1-2:
Van’wana lava humaka eYudiya, a va dyondzisa vamakwavo eHosini, va ku: “Loko mi nga yimbanga hi ku ya hi Nawu wa Muxe, mi nga ka mi nga ponisiwi.” 2 Kambe Pawulo na Barnaba va hambana ngopfu na vona emhakeni leyi, va kanetana na vona hi matimba; kyani va lulamisa leswaku Pawulo na Barnaba va ta ya eYerusalema va ri ni van’wana va Antiyoka, ku ya vutisa eka vaapostola ni ka vakulukumba.
04. Loko hi nghena etirhweni wa Vukriste, hi nghena enyimpini. Loko wo swi langutela hi le kule, onge i ku tshama exitulwini u bukela TV ra swifaniso swo chavisa leswi nga eku lweni; swilo swi hangalasiwa ni ku hohlotiwa, vanhu va limala ni ku fa. A ku hambana ka nyimpi ya nyama ni ya moya, hi leswaku leya nyama swa koteka ku tsumbula nala, hikuva a va a ri ehandle ka wena, kutani swa olova ku n’wi tiva. Kambe eka nyimpi leyi ya Moya, a nala a humelela hi ndlela yo hambana. A xo sungula hi vona loko nala wa nitho wa Hosi a tirhisa tindlela to kala ti nga vonaki leswaku a ta kota ku hohlota Mfumo wa Xikwembu. A xa vumbirhi a yi ri kereke leyi a ya ha ku sunguriwa. Eka mhaka leyi ni lava k uvula leswaku, eka nhlayo leyikulu ya miri wa Kriste, kun a Vafarisi, Vasaduki ni Vatsari, lava endlaka ntlawa lowu langutekaka onge i kereke. A vanhu lava ku komba leswaku a va tswariwanga ra vumbirhi, hi va tsumbula hi ku ala ntiyiso ni ku hundzuka eka swihena swa mintumbuluku. Tiva leswaku a va lumbi Xikwembu, kambe i vatirhi va diyavulosi lava ngo ti funengeta xikhumba xa Vukriste, kambe i va lalava ntiyiso. I va hedeni lava nga ku sapoteni ka ntirho wa tihele, a va na mhaka ni ntirho wa Kereke, va tiphina hi swidyoho, ni minkhuva ya misava, hambi hi ku ku dlaya swa koteka loko wo phikisana na vona. A vanhu va muxaka lowu, va hlohlotela lava nga siku hundzuka hambi hi varhangeri va mfumo leswaku ku endleka ntsena leswi vona va swi lavaka. Tiva makwerhu leswaku ku na nyimpi ekerekeni ya Xikwembu. A vapfumeri va lwa hi xivona, hi mhaka ya vukwele ni hinkwalaho ko kala va nga ma tivi matsalwa. A xo hetelela, tiva naswona leswaku entirhweni wa Xikriste ku na nyimpi, a nyama leyi a yi lwa ni Moya lowo Kwetsima lowu a wu nghene eka vapfumeri, loko a va tinyikela eka Kriste kutani va tswariwa ra vumbirhi. (U nga hlaya mhaka leyi eka Va-Rhoma ku avanyisa ka 7). A buku ya Mintirho ya Vaapostola, yi tarile hi nhlamuselo wa nyimpi leyi nga kona exikarhi ka mimfumo mimbirhi ya ximoya; ku nga mfumo wa ku vonakala ni mfumo wa munyama, kutani a masochwa ya kona hi wena na mina. A nyimpi a yi ya emahlweni yi hisa laha ni lahaya; a nyimpi ya munyama, a yi languteka onge yi na matimba, kambe eku heteleleni a nyimpa ya ku vonakala a yi hlula. Nakulori mudyondzi, ku nga ri khale u ta fika emhakeni yo tsakisa ngopfu swinene loko mhaka leyi yi fike emakumu, laha u nga ta kala u nga ha vi na xivutiso ni xin’we. Sathana ni swidyoho, a ta hluriwa, kutani a mudjeke wa Hosi wu ta tlakusiwa wu hahela ehenhla-henhla wu vonaka emisaveni hinkwayo. Haleluya.
05. A matsala lawa ha ha ku ma hlayaka, ma kombe yin’wana ya tinxaka ta tinyimpi. Hleketa nyana, u ta swi twisisa leswi ni nga eku vuleni ka swona. Laha ni vona Pawulo na Barnaba, a va ha voni ni ku lwa nyimpi yo huma ehandle, kambe va hlamarisiwile hi ku tsumbula leswaku nala a a yo etlela endzeni ka nhlengeletano ya vona, a ri karhi a nghena ni ku huma, a ya ni le xiluvelweni a xumayela tinkozo to hlasela kereke ti tidyondzo to hambuka, a ri karhi a khotsa Evhangeli. A mhaka leyi yi endle leswaku ku lulamisiwa riendzo ro ya vutisa eka vakulukumba eYeruslema. A vahedeni lavaya, a va dyondzisa leswaku loko munhu a nga yimbisiwanga, a nga ka a nga ponisiwi. Pawulo na Barnaba hi ku hantlisa va kanetile dyondzo leyi a yi le ku khotseni ka ntiyiso, ni ku engetela ndzwalo eka Evhangeli yo vevuka ni ntirho lowo heleke exihambanwini hi Kriste. Ehenhla ka swona, a nhlengeletano hinkwayo a yi le ku tikeriweni, hikuva a ntalo wa vona, a va nga ri Vayuda, se a swi va tikela ku hambana na vona a ya tisungulela nhlengeletano ya vona. A dyondzo leyi lwaka ni ntiyiso wa Hosi ya hina Yesu Kriste, yi vitaniwa ku i heresia, kutani hi fanele ku tivonela swinene. Hlaya swinene matsalwa u ma tiva hi ku enta, hikona u nga ta swi kota ku kaneta ni ku dyondzisa van’wana. Pawulo na Barnaba, a va swi tiva hikuva a va rhange hi ku dyondza, malembe yo tala na va na se ya eku dyondziseni ka van’wana.
06. A swi na mhaka ku va ringete ku kaneta ku ya fika kwihi, kambe a nyimpi ya munyama a yi ya emahlweni yi bonga. Kutani va swi vonile leswaku swa fanela ku ya lava ku pfuniwa hi van’wana va pfumeri , kutani va ye eka vaapostola lava Yesu a nga va dyondzisa enkarhini lowu a a ri kona hi xiviri xa yena, lava a nga va siya leswaku va ta n’wi kombisa ekerekeni ya yena, kutani Pawulo, Barnaba ni van’wana vapfumeri, va hlawuriwa ku ya eYerusalema va ya veka mhaka leyi emilengeni ya va rhangeri va nhlengeletano. A hi yi tsalanga hinkwayo buku leyi, kambe u ta va u endla swona loko u yi hlaya hinkwayo. Eka tindzimana leti, u ta vona hi laha a mhaka yi tsemiweke hi kona hi hi ku pfuniwa hi Moya lowo Kwetsima. Kutani ku tsariwa papila yi yisiwa ekerekeni ra le Antiyoka eka vapfumeri lava a va ha khomelerile eka swihena leswi kherisiweke hi rifo ra Kriste. Kutani va va rhumela va vanuna vambirhi hi vuprofeta, ku nga Yudasi na Silasi lava va va heleketeke. Yesu a Hlurile.
07. Sweswi a hi hlayeni eka 15: 36-4:1:
Loko ku hundzile masiku ma nga ri mangani, Pawulo a ku ka Barnaba: “A hi tlhelele hi ya endzela vamakwerhu emitini hinkwayo leyi hi nga twarisa rito ra Hosi eka yona, hi vona hi laha va hanyaka hakona.” 37 Barnaba a a navela leswaku va teka Yohane, loyi a va ku i Marka, va famba na yena. 38 Kambe Pawulo a vona leswaku swi ta va swi hoxekile loko va famba na munhu loyi, hikuva a a hambane na vona ePamfiliya, a nga yanga na vona entirhweni. 39 Kutani ku humelela mholovo exikarhi ka vona, va kondza va avana; Barnaba a teka Marka, a ya eKipra hi ngalava. 40 Loko a ri Pawulo, a tihlawulela Silasi, kutani a suka a kombeleriwile minkateko ya Xikwembu hi vamakwavo. 41 Kutani a tshemakanya matiko ya Siriya na Kilikiya, a ri karhi a tiyisa tikereke.
08. U ta tsundzuka leswaku ni hlamuserile ehenhla leswaku ku na tinyimpi leti hi hlanganaka na tona entirhweni wa Hosi. Ku nga ri khale hi vonile masocha lawa mambirhi ya Xikwembu, un’wana na un’wana na a tamele tlharhi ra rito evokweni ra yena ra xinene, va ri karhi va yima swin’we eku lweni ni tidyondzo to hambuka. Sweswi hi vona va hundzulukelana va hlaselana un’wana na un’wana hi matlharhi ya marito ya vona, va holova hikwalaho ka Yohane loyi a va balekeleke loko va ri eriendzweni ra vona ro sungula. A mhaka, a ku ri leswaku swa fanela leswaku va tlhela va famba na yena kumbe e-e. Vavanuna va mbirhi, tinhenha ta Hosi, ti lwa, ematshan’wini yo lwa ni nala. Vafundhisi vambirhi va lwa emahlweni ka nhlengeletano, va rhendzelekela ematlhelo onge i timbyana leti kwateke loko ti pfhumpfelana, na va ri karhi va hlaleriwa ni ku hlamariwa hi nhlengeletano; yi ku: “ Yoo, indje vafundhisi va hina a va ngo to pfanaga ni ku kokelana kereke hi le xikarhi xana?” Eku heteleleni hi vambirhi va fike laha va tsemaka mhaka hi voxe, laha un’wana ni un’wana a tihlawuleleke vatirhisano va yena, kutani va hambana, un’wana ni un’wana a ti tekela ya yena ndlela. Ina ka, xana i mani loyi a a haxile, naswona i mani loyi a a ri kahle? A ku ngo va mhaka yo yelana ni mavonele kumbe matshamelo ya un’wana? Laha loyi wo miyela a a seketela ku teka munhu wa lolo va famba na yena, kambe loyi wa madumelana, a twisisa leswaku a ku fanele ku siyiwa lolo leri nga khomisa tingana ntirho wa Hosi. Swi nga endleka ku ve ni xi xaka-xaka eka tlhelo ra Barnaba hikwalaho ka ntukulu wa yena, kumbe ni ku kwela leswi Pawulo se a a languteka a ri murhangeri wa ntiro. A Xikwembu se a xi rhange xi yi vona mhaka leyi na yi nga se endleka, xi rhumela Silasi leswaku a ya joyina ntirho wa kereke ya le Antiyoka, leswaku a pfa a lulamisiwa, leswaku loko nkarhi wa ku Pawulo a lava mutirhisani wu fika, Silasi a a tava na a lulamile. Swi languteka swi nga twisiseki leswaku Pawulo a ala ku famba ya Yohane Marka, loyi eku heteleleni Xikwembu xi n’wi tirhiseke ku tsala Evhangeli ya Marka. A swa kahle leswi humeke exikarhi ka mpfilu-mpfilu liya, hi leswaku ku hume mintlawa yimbirhi ya matimba entirhweni wa Hosi, Xikwembu xi phindha matimba ya vona leswaku va ya emahlweni ni ku fikelela mahika lama nge kule hi rito ra Hosi. Eka mpfilu-mpfilu ya vona ku wine Xikwembu!
09. A hi yeni emahlweni hi heleketa Pawulo na Silasi eriendzweni ra vona, hikuva a ha ha twi swin’wana ematsalweni hi Barnaba na Yohane. Kambe na pfumela leswaku a Hosi yi ve na vona, yi va tirhisa ku fana ni leswi yi tirhiseke Pawulo na Silasi. Nakona na tshemba leswaku, eku heteleleni, Pawulo na Marka va tlhele va vuyelelana.
10. Kutani Barnaba na Marka va teke ndlela ya ximatsi, va tsemakanya lwandle va kongoma eKipra, kambe Pawulo na Silasi va teke ndlela ya xinene, va kongome ekhale ka tiko ra Pawulo, eTarso ni le Siriya ni le Silisiya. A kereke ya le Antioka, a yi siyiwile leswaku yi ta pfa yi hola ritsuri, endzhaku ka timpfilu-mpfilu timbirhi leti ti veke kona, vona va ya emahlweni va endla ntirho wa Hosi.
11. Pawulo a a hleketa leswaku a riendzo leriya a a le ka rona na Silasi, a ko va ku ya pfuxela ni ku tiyisa tinhlengeletano leti simekiweke hi van’wana. Kambe a Hosi a yi ri ni makungu na vona, kutani a Moya lowo Kwetsima a wu va yisa emahlweni, minkarhi min’wana a wu va sivela ndlela loko va fikeriwa hi miehleketo ya nyama yo lava ku endla leswi a ku nga ri ku rhandza ka Xikwembu. A hi nga languteni eka riendzo ra vona; hi sungula hi ku hlaya exiahlukeni xa 16. ( Languta ni mapa) a ma tiko lawa va famba-fambeke eka wona hi lawa: “Derbe, Listra, Ikoniya, Trowasi, Samotraka, Neyapoli, Filipiya a doropa leri a ri le hansi ka vukolonyi bya Makedoniya, kutani va ya emahlweni va fika eAmfipoli ni le Apoloniya, ni le Tesalonika, ni le Beriya kutani ku sukela kwale, va kongoma eMutini wa Va-Griki (Grécia) a doropeni ra va Atena, kutani loko va suke kona va kongoma edoropeni ra Korinto, ni le kenikreya, (Atena na Korinto, i maprovincia lama nga ehansi ka Grécia), kutani loko va suke kona va tsemakanye lwandle va kongoma a Efesa. Ematsan’wini ya ku tlhelela etikweni ra vona eAntiyoka, va khandziye ngalava va tsemakanya lwandle ra Mediteraniya va ya khupukela etikweni ra Khezariya. Kutani loko va suke kwaleho, va kongome eYerusalema leswaku va ya hlangana enkhubyeni wa paseka (18:21), hikona loko ku hele nkhuvo wa paseka va nga tlhelela eAntiyoka.
12. Enkarhini lowu landzeleke, Pawulo ni vatirhisani va yena, va tlhele va teka riendzo ra vunharhu va ya eka tindhawu leti va yeke eka tona eka riendzo ra vumbriehi. A ni ku sindzisi leswaku tsundzuka mavito lawa hinkwawo yo karhata, hinkwaswo leswi, ni endlela leswaku u pfuleka miehleketo ya wena, u vona hi laha Xikwembu xa hina xi kuleke ha kona. Xikwembu xi tirhisile wanuna loyi a a ri nala wa ntirho wa xona, leswaku a xumayela matiko ya ndhuma lawa ma tivekaka swinene eka timapa ta misava. Wa nuna loyi a fambe magidigidi ya tikilomitara hi milenge ni hi tingalava, a hlangana ni swikarhato swo tala, kambe a ye emahlweni hikuva aMoya lowo Kwetsima a wu tirha eka yena,
13. A hi languteni hi laha Pawulo a hlamuselaka hikona maxangu ni mahlomulo ya yena hikwalaho ka Kriste. II Kor 11:23-33.
Xana i malandza ya Kriste? Na mina ndzi yena, ku tlula vona ( ndzi vulavula ku fana ni munhu wa rihuhe). Ndzi xanisekile ku va tlula, hi ku tirha swo nonon’hwa, ni ku pfaleriwa emakhotsweni, ni ku biwa ku tlurisa mpimo, ni ku va kusuhi ni ku dlawa minkarhi yo tala. 24.Ndzi biwile ka ntlhanu hi Vayuda, ku biwa kun’wana ni kun’wana ku ri hi minkhavi ya 39g. 25Ndzi biwile kanharhu hi tinhonga; ndzi khandliwile kan’we hi maribye; kanharhu ngalava leyi a ndzi ri eka yona yi tshovekile; ndzi hetile vusiku hinkwabyo ni nhlikanhi hinkwawo ndzi ri karhi ndzi mbekuka elwandle. 26Etiendzweni ta mina leto tala, ndzi lave ku dyiwa hi milambu, ndzi lave ku dlawa hi swegevenga; ndzi lave ku dlawa hi varikwerhu; ndzi lave ku dlawa hi vamatiko; ndzi lave ku dlawa ematini ni le managa; ndzi lave ku dyiwa hi mati ya lwandle; ndzi lave ku dlawa exikarhi ka vamakwerhu va mavunwa; 27ndzi tikarhatile ni ku tivavisa hi mintirho; hakanyingi ndzi pfumale vurhongo; ndzi twe ndlala ni torha; hakanyingi ndzi pfumarile swakudya, ndzi khomiwa hi xirhami, ndzi pfumala ni swiambalo. 28 Ehandle ka swin’wana leswi ndzi nga swi hlayiki, ndza tikeriwa masiku hinkwawo ni ku karhateka emoyeni, loko ndzi anakanya tikereke hinkwato. 29 Loko un’wana a tsanile, xana a ndzi tsananga na mina xana? Loko un’wana a wisiwa, xana na mina a ndzi twi ku vava ngopfu xana? 30 Loko ndzi fanela ku tidzunisa, ndzi ta tidzunisa hi mhaka ya ku tsana ka mina. 31 Xikwembu, Tata wa HosiYesu, xi nga xona lexi fanelaka ku dzunisiwa hi laha ku nga heriki, xa swi tiva leswaku a ndzi hembi.32 Le Damaska, ndhunankulu ya hosi Areta, yi rindzile nyangwa ya muti wa Damaska, yi lava ku ndzi khoma; 33 kambe va ndzi nembeleta hi fasitere erirhangwini, ndzi ri ndzeni ka ngula, kutani ndzi phonyoka emavokweni ya yena hi mukhuva wolowo.
14. Vamakwerhu, a ntirho wa Vukriste wu tirhiwa laha ku nga na nyimpi kona, kambe hi nga tlheleni enyimpini leyi, a yi tsutsumeleni kona, hikuva Xikwembu xa Pawulo i Xikwembu xa hina, xi ta hi khupukisa.
15. A swi olovi ku hlawula xilo xin’we eka leswi humeleleke Pawulo, lexi unga vulaka leswaku xa antswa leswaku xi ku humelela, kambe eka leswo tala, leswi hi hlanganaka na swona eka nkarhi wa ka hina, Xikwembu xa hi yimela, a hi yeni emahlweni. Hi hlaya eka Mintirho 16:11-15:
Kuteloko hi sukile eTrowasi hi ngalava, hi tsemakanye lwandle ku ya fika exihlaleni xa Samotraka, kutani hi siku leri tlhandlamaka, hi ya eNeyapoli; 12 Loko hi suka kona hi kongoma Filipiya, wu nga muti wa xitikwana xo sungula xa Makedoniya, ni ndhawu ya Varhoma. Kutani hi tshama masiku ma nga ri mangani emutini wolowo. 13 Hi siku ra savata hi huma emutini, hi ya enambyeni, laha hi ehleketeke leswaku ku nga va ni ndhawu yo khongela eka yona; kuteloko hi tshamile, hi vulavula ni vavasati lava hlengeletaka kona. 14 Kutani un’wana wa vona loyi a va ku i Lidiya, muxavisi wa tinguvo to vangama ta xivunguvungu, wa muti wa Tiyatira, wansati wo chava Xikwembu, a a ri eku yingiseni; kutani Hosi yi pfula mbilu ya yena leswaku a twisisa leswi vuriwaka hi Pawulo. 15 kuteloko a khuvuriwile swin’we ni va ndyangu wa yena, a hi khongela, a ku: “Loko mi vona leswaku ndzi munhu la pfumeleke ka Hosi hakunene, mi nga nghena ekaya ka mina, mi tshama kona.” Kutani a hi sindzisa ku ya kona.
16. A hi voneni maendlele ya Pawulo. Minkarhi hinkwayo a a le ku languteni ka vanhu lava a va hlangane swin’we hikwalaho ka ku tsakela swa Xikwembu. Loko a twa leswaku ku ni lomu ku nga ni muhlangano wa Vayuda , a a ya hlangana na vona hi tisabatha, kutani a twarisa evhangeli ku ko va n’wi hlongola. Hi ndlela leyi, a fike laha a nga tsumbula leswaku ku ni yin’wana ndlawu ya kahle ehandle ka doropa laha ku nga ni muhlangano wa xikhongelo xa vavasati. Pawulo na Silasi va fike va tshama ehansi na vona, leswi a swi ri swilo swo kala swi nga toloveleki enkarhini lowuya, kambe a xa risima hileswaku va kuma nkarhi wo vula Evhangeli, kutani loko va ha le ku yingiseni, a Hosi yi pfula ku mapfalo ya Lidiya a ko a amukela Hosi, yena ni va ndjangi wa yena, kutani va khuvuriwa. A ku dzunisiwe Xikwembu, Lidiya a ve mupfumeri wo sungula eFilipiya. Kutani i mani loyi a a tava wo landzela.
17. Hi hlaya eka tivhesi ta 16-40:
Siku rin’wana loko hi ya endhawini yo khongelela ka yona, hi hlangana ni wanhwana loyi a a ri hlonga, loyi a a ri ni moya wa vungoma, a fumisa vini va yena hi ku vhumbha. 17 Kutani a hi landza, hina na Pawulo, a ri karhi a huwelela, a ku: “Vavanuna lava i malandza ya Xikwembu xa le henhla-henhla, lava va mi tivisaka ta ndlela ya ku ponisiwa.” 18 A hamba a endlisa sweswo hi masiku layo tala ku kondza Pawulo a karhateka swinene, kutani a hundzuluka, a ku ka moya: “Hi vito ra Yesu Kriste ndza ku lerisa ndzi ri: Huma eka wanhwana loyi!” Kutani hi nomo lo moya wu huma. 19 Loko vini va wanhwana va vona leswaku va lahlekeriwile hi bindzu leri a va ri languterile, va khoma Pawulo na Silasi, va va kokela ehubyeni, emahlweni ka tindhuna; 20 vava yisa eka letikulu ta kona va ku: “Vanhu lava i Vayuda, kutani va pfilunganya muti wa ka hina; 21 va dyondzisa mikhuva leyi nga faneriki ku yi amukela ni ku yi endla, hina hi nga Varhoma.” 22 Na wona ntshungu wu va pfukela hi matimba; tindhuna ti handzula swiambalo swa Pawulo na Silasi, ti lerisa leswaku va biwa hi minkhavi. 23 kuteloko va va humesile mimpfembeti hi ku va ba, va va hoxa ekhotsweni, va lerisa mulanguteri wa khotso ku va rindza swinene. 24 Loko yena a kumile xileriso xexo, a va nghenisa ekhotsweni ra le xikarhi, kutani a manya milenge ya vona hi mintsandza. 25 Exikarhi ka vusiku, Pawulo na Silasi a va khongela, va dzunisa Xikwembu hi ku yimbelela tinsimu, kutani vabohiwa lavan’wana va va yingisa. 26 Kambe hi nomo lo, ku tsekatseka lokukulu ka misava ku va kona; kutani masungulo ya khotso ma tsekatsekisiwa; kan’we-kan’we tinyangwa ti pfuleka, kutani tinketana ta vabohiwa hinkwavo ti ntsunxeka. 27 Mulanguteri wa khotso a pfuka evurhongweni; kakuloko a vona tinyangwa ta khotso ti pfulekile, a hlomula fumu ra yena, a lava ku tidlaya, hikuva a a anakanya leswaku vabohiwa va balekile. 28 Kambe Pawulo a huwelela hi rito ro tlakuka, a ku: “U nga tshuki u tivavisa, hikuva ha ha ri kona hinkwerhu.” 29 Mulanguteri a kombela timboni, a nghena hi ku tsutsuma, a tiwisela emilengeni ya Pawulo na Silasi, a ri karhi a rhurhumela hi ku chava. 30 Kutani loko a va humeserile ehandle, a ku: “Tihosi, xana ndzi fanele ku endla yini leswaku ndzi ponisiwa?” 31 Vona va ku: “Pfumela eka Hosi Yesu, kutani u ta ponisiwa, wena ni va ndyangu wa wena.” 32 Kutani va n’wi byela rito ra Hosi, a ri ni va le kaya ka yena hinkwavo. 33 Kutani, enkarhini wolowu wa vusiku, mulanguteri a va teka a va hlantswa mimpfembeti ya vona; kutani kan’we-kan’we a khuvuriwa, yena ni vanhu va yena hinkwavo. 34 Endzhaku ka sweswo, a yisa Pawulo na Silasi ekaya ka yena, a va phamela swakudya, kutani a tsaka swin’we ni va ndyangu wa yena hinkwavo, hileswi a a pfumerile ka Xikwembu. 35 Loko ri xa, tindhuna ti rhuma maphorisa ku ya lerisa leswaku vanhu lava va ntshunxiwa. 36 Mulanguteri wa khotso a tivisa Pawulo mhaka leyi, a ku: “Tindhuna ti rhumele rito leswaku mi ntshunxiwa; kutani sweswi, humani, famba hi ku rhula.” 37 Kambe Pawulo a ku ka maphorisa: Va hi bile erivaleni hi nga si avanyisiwa, hina hi nga Varhoma, kutani va hi hoxa ekhotweni! Xana sweswi va nga hi ntshunxa exihundleni xana? Nikutsongo!. A va te vona vini, va ta hi humesela ehandle.” 38 Maphorisa ma yisa marito walawo eka tindhuna; loko tona ti twa leswaku Pawulo na Silasi i Varhoma, ti chava. 39 Kavaloko ti ta, ti kombela ku rivaleriwa, ti va humesela ehandle, ti kombela leswaku va huma emutini, va famba. 40 Kuteloko va humile ekhotsweni va ya ekaya ka Lidiya; kona, va vonana ni hinkwavo, va va khongelela, kutani va tifambela.
18. Pawulo ni vanakulobye va yena, va ye endhawini liya ya swikhongelo leswaku va ta ya yisa emahlweni ntirho wa ku hlengeleta ntshovelo. Kambe Diyavulosi, a endle hi matimba hinkwawu leswaku a tsandzekisa ntirho wa Xikwembu. Minkarhi min’wana a tihundzula a fana ni ntsumi ya Xikwembu, leyi tisaka ku vonakala ka le tilweni, kambe entiyisweni a le ku endleni ka makungu yo lovisa lava rivaleke. Loko wena ni vanakulobye va wena, a mo va edoropeni ro kala mi nga ri tivi, mi ri karhi mi kongoma ebazara kuya chumayela kona kutani ko tshuka ku humelela wansati a sungula ku huwelela, a ku: “Vavanuna lava i malandza ya Xikwembu xa le henhla-henhla, lava mi byelaka ndlela ya ku ponisiwa,” xana a wu nga ta tsaka, u n’wi hlekela, u ri karhi u hleketa, u ku: “Heyi, i mhaka ya kahle swinene, hambi hi vanhu vo kala ni nga va tivi va vona Yesu eka mina?” na tshemba leswaku loko a ko va wena na mina hi tava hi n’wi xawetile, hi n’wi komba vunghana ni ku n’wi rhamba a nghena eka ntlawa wa hina. Kambe a swi vanga tano eka Pawulo. A kambisise moya lowuya a ko a wu tsumbula leswaku a wu ri moya wa vukhongeri bya mademona lowu a wu n’wi tirhisa. A a nga vulavuli ehansi ka ntoto wa Moya lowo Kwetsima, kutani Xikwembu a xi nga ta byi nyika risima vumbhoni bya yena hi ku hundzula mahika ma ya eka Kriste, hikokwalaho, loko a twe demona leriya ri li karhi ri endlisa swoleswiya hi masiku layo tala, a lerisiwa hi Xikwembu ku rhukana moya lowu, kutani kan’we-kan’we wu huma eka yena. Hi kuma dyondzo ya risima swinene eka Pawulo. Hambi leswi hi nga ni matimba ya Yesu ya ku hlongola mademina, kambe hi fanele ku endla leswi ehansi ka ku fambisiwa hi Moya lowo Kwetsima. A hi faneri ku tsutsumela eka munhu loyi a langutekaka na a ri ni swikombiso swa mademona, kutani hi fika hi sungula ku wu rhukana. A ntirho wa Xikwembu, wu nga va wu ri wihi na wihi, wu fanele wu endliwa hi nkarhi wa kona.
19. Loko u lava ku ti kuma na u wele enghozini, hi nga tshalambuta voko ra wena u peta ephakithini ra munhu u teka mali ya yena, ngopfu-ngopfu loko o va munhu wa ndhuma ni wo pfundza. Kutani leswi hi swona leswi humeleleke. A swisiwana leswiya swi qale nhwana wa van’warivengo, kutani loko va tsumbule leswaku a ku langutela ka vona ka ku endla mali yi yena, a ku nga ha ri kona. Va hlundzuka swinene, kutani va khoma Pawulo na Silasi, lava a va nga tolovelekanga etikweni, va va yisa ekhotsweni, va va lumbeta hi vumbhoni bya hava, ku ko muavanyisi a pfumela ku va nghenisa ekhotsweni, laha va nga nghenisiwa eka lera le xikarhi.
20. Oh! Va endle yini ke? Va lo rila? Va hlundzuka? Va lumbeta Xikwembu? Va etlela? E-e, va lo khongela leswaku va ta ntsunxiwa va ya emahlweni ni ntirho wa vona. Ku na minkarhi leyi Xikwembu xi vulaka leswaku: “Ndzi swi trwile swikombelo swa wena, ndzi swi tsariwile hi tinambari to vonaka swinene emakhumbini lama languteke emahlweni ka mina, sweswi yima ku khongela, a na ha lavi ku twa ku kombela ka wena.” Kambe wena u nga ya emahlweni u ku: “Oh! Hosi, kambe ni twa ku vava, naswona ni huma ni ngati, ni twa ndlala naswona na chava, na ha swi koti ni ku etlela.” Xana wa swi tiva leswi xi nga ni byela swona loko ni ri karhi ni vabya ku hundza mavhiki yo tala xana? Xi te eka mina: “Ndzi dzunisi u nga karhali, hikuva loko u endla tano hi swona swi ndzi tsakisaka, a ndzi nga karhali ku yingisa ku dzunisiwa.” Kambe twana la, u nga yi ku dzuniseni ni ku gandzeleni ka Xikwembu ni miehleketo ya leswaku u ta hlamuriwa swikombelo swa wena, u fanele ku swi endla hikuva u rhandza Xikwembu ni ku xi tsakela, u xi dzunisa hambi xi nga hlamuri swikombelo swa wena. Leswo swi tisa gandzelo ra ku dzunisa. Leswo swi ntshunxa ku nunh’wela exiluvelweni xa le tilweni. Kutani loko Pawulo na Silasi va nghene eka ripfumelo leri, a ku huwelela ka ntsaku ku tlhantukile etilweni hi tintsumi, kutani khotso hinkwaro ri tsekatseka, ni tinyangwa ti tshoveka ti pfuleka kutani a swi petlo swa ku wa hi ku tsekatseka swi wela ehenhla ka vabohiwa. Oh!, loko a o va mina, a ni tava ni tsutsumele exitarateni. Kambe Pawulo na Silasi a va endlanga swo tano.
21. Hinkwako lomu a va hundzela kona, leswi ava swi khomile emihleketweni ya vona a ku ri ku: “Ponisiswa, ponisiwa ntsena. Loko mulanguteri wa khotso a ringete ku ti dlaya, Pawulo a n’wi huwelerile, a ku: “U nga ti vavisi nakulori, ha ha ri kona hi nkwerhu la.” Lawa ma ve mahlori man’wana. A tinyangwa ta khotso ti pfuriwile, kambe a vabohiwa va yala va tshama endzeni hikwalaho ka vukona bya Xikwembu. Hi mahika lama kulu, loko mulanguteri wa khotso a khorwile ni ku ntsunxeka, a teka rivoni a ya tiwisela ematsolweni ya Pawulo. Kutani a va humesela ehandle a va kombela, a ku: “Tihosi, xana ndzi nga endla yini leswaku ndzi ponisiwa xana? “A swi tikanga” ku hlamula Pawulo, Pfumela eka Hosi Yesu Kriste, kutani u ta ponisiwa, wena ni ndyangu wa wena.” Endzhaku ka loko a hlamuseriwile hi ta vukulukumba bya Xikwembu ni tintswalo, swi n’wi vevukerile ku pfumela eka Hosi Yesu.
22. A ntsaku ni ku khensa a swi khuluka endyangwini hinkwawu wa mulanguteri wa khotso. Kutani va teka mati va va thovela mimpfembeti. Kutani va ya na vona ematini ku ya va khuvula leswaku va tiyisa ripfumelo ra vona eka Kriste. Kutani va phameriwa swakudya swo nandziha ekaha ka mulanguteri wa khotso ni mpundzu, leswi a swi xaviwa hi mali ya mfumo.
23. A hi hlayeni tivhesi to hetelela 16: 36- 40:
… 36 Mulanguteri wa khotso a tivisa Pawulo mhaka leyi, a ku: “Tindhuna ti rhumele rito leswaku mi ntshunxiwa; kutani sweswi, humani, famba hi ku rhula.” 37 Kambe Pawulo a ku ka maphorisa: Va hi bile erivaleni hi nga si avanyisiwa, hina hi nga Varhoma, kutani va hi hoxa ekhotweni! Xana sweswi va nga hi ntshunxa exihundleni xana? Nikutsongo!. A va te vona vini, va ta hi humesela ehandle.” 38 Maphorisa ma yisa marito walawo eka tindhuna; loko tona ti twa leswaku Pawulo na Silasi i Varhoma, ti chava. 39 Kavaloko ti ta, ti kombela ku rivaleriwa, ti va humesela ehandle, ti kombela leswaku va huma emutini, va famba. 40 Kuteloko va humile ekhotsweni va ya ekaya ka Lidiya; kona, va vonana ni hinkwavo, va va khongelela, kutani va tifambela.
24. Loko ri xa, a mulanguteri wa khotso a vone man’wana mahlori, a vaavanyisi va hundzuke va ta ta kombela rivalelo eka malandza ya Xikwembu, hikuva va va khatisile na va nga ri na nandzu, kutani va va humesa hi voxe ehandle ka muti hi xichavo lexikulu.
25. A minitirho ya Xikwembu, ko tala yi ti kombisa laha yi nga languteriwangiki kona. Katekani.
//////////
To copy (DOWNLOAD) tap: Riendzo ra vumbirhi ra Pawulo