Daniele xiyenge 2

2008-08-07

1.

Na ku amukela eka tidyondzo ta hina ta rivoningo ra matilo. Leyi I dyondzo ya vu-24 ya xiyenge xa vumbirhi eka dyondzo ya Daniele.

2.

Eka dyondzo leyi hundzeke, hi dyondze hi Daniele loyi a a ri jaha ra Israele. Loko a tiko ra Israele ri khomiwile hi hosi Nebukadnetsara, a jaha leri ri ve rin’wana wa vakhomiwa, yena ni vanghana va yena vanharhu, Hananiya, Mixaele, na Azariya va ve majaha yo tlhariha. Va yimele ntiyiso hi ku tirhela Xikwembu kwale etikweni ra mfumo wa vuhedeni laha Hosi yi nga va pfumelela leswaku va ya va kona. Xikwembu a xi ri ni makungu ya kahle hi vutomi bya vona, xi va tirhise ngopfu ku endlela leswaku a vito ra xona ri tiviwa hi vamatiko. Hi vone hi laha Xikwembu xi hlavuteleke hikona Daniele a norho wa hosi ni hi laha a nyikeke ha kona nhlamuselo wa wona. Hikwalaho ka swona, a hosi yi ve na ntsaku wu kulu ngopfu swinene yi ko yi tlakusa Daniele ni vanghana va yena lavanharhu eka swiyimo swa le henhla emfun’wini wa yona.

3.

Kambe a hi minkarhi hinkwayo swi va fambeleke kahle, Daniele ni vanghana va yena, minkarhi yin’wana va hlangane ni miringo yi kulu ngopfu hikuva a va tirhela Xikwembu xin’we lexi hanyaka. Siku rin’wana hosi Nebukadnetsara a endle xifaniso xikulu xa nsuku, kutani a rhamba tihosi hinkwato ta yena leti nge matikweni hinkwawu ya yena, ku ta va komba xifaniso lexi a xi yimiseke a tlhela a va komba tindlela ta magandzelele ya xona loko va twa ku biwa timhalamhala. Vanhu hinkwavu loko va ha yimile, ku twala mpfumawulo wa tinsimu ematlhelo hi nkwawu ya tiko. A nhlayo leyikulu ya tihosana ta Nebukadnetsara hinkwato, va khinsama hi matsolo ya vona va gandzela xifaniso. A a ri kwihi Daniele enkarhini lowuya, a hi ku tivi, kambe a vanghana va yena lavanharhu a va yile emhlanganweni. A va swi tiva leswaku Xikwembu xi va lerise ku va nga tshuki va tiendlela xifaniso xihi na xihi va xi khinsamela va xi gandzela. Hikwalaha ka xileriso lexi, a va khinsamanga emahlweni ka xifaniso lexi hosi Nebukadnetsara a xi yimiseke. A tindhuna ta hosi loko ti vone majaha lawa ma nga khinsami, ti ya tivisa hosi ni ku yi tsundzuxa a marito ya nfungo wa yena lowu nge; loyi a nga ta ka a nga khinsami emahlweni ka xifaniso, a ta hoxiwa ekheleni ra ndzilo. A mhaka leyi yi hlundzukisa hosi swinene, kutani yi vitana a majaha lamanharhu. Kutani yi ma vutisa leswaku va lo endla hi maxivomo ku kala va nga khinsamanga emahlweni ka xifaniso xa yona. Kutani a vula leswaku a ta va nyika khambi ra vumbirhi, kambe loko vo kala va nga yingisi, a ta va hoxa ekheleni ra ndzilo. Kutani I mani Xikwembu lexi nga ta va ponisa emavokweni ya yena?

Yingisela leswi humeleleke, hlaya eka buku ya; Daniele 3:16-30:

16.Xadraka, na Mixaka, na Abedi-Nego va hlamula hosi va ku: “We Nebukadnetsara, mhaka leyi u yi vulaka, hina a hi boheki ku yi hlamula. 17.Loko ho tshuka hi hoxiwa ekheleni ra ndzilo lowu pfurhaka, Xikwembu xa hina lexi hi xi tirhelaka, xi ta hi humesa, xi hi kutsula ni le mavokweni ya wena. 18.Kambe hambi loko xi nga hi kutsuli, swi tive we hosi leswaku a hi nga gandzeli swikwembu swa wena, kumbe ku khinsamela xifaniso xa nsuku lexi u xi yimiseke.” 19. Kutani Nebukadnetsara a hlundzuka ku tlula mpimo; loko a languta Xadraka, na Mixaka, na Abedi-Nego, nghohe ya yena yi hundzuka; kutani a lerisa malandza ku hlanganyeta ndzilo, ku hisa ka wona ku tlula ka 7 leswi a wu hamba wu hisisa xiswona. 20.Kutani a lerisa tinhenha tin’wana ta yena leswaku ti boha Xadraka, na Mixaka, na Abedi-Nego, ti va hoxa ekheleni ra ndzilo lowu pfurhaka hi matimba. 21.Kutani tinhenha ti boha vavanuna lava, ti va hoxa ekheleni ra ndzilo lowu pfurhaka va ri ni swiambalo swa vona hinkwaswo. 22.Leswi a ku tirhiwa hi ku landzelela nawu wa hosi, ni leswi ndzilo a wu hlanganyetiwile ngopfu, malangavi ya wona ma dlaya tinhenha leti a ti dlidlimbetela Xadraka, na Mixaka, na Abedi-Nego endzilweni. 23. Kutani vavanuna lavanharhu, Xadraka, na Mixaka, na Abedi-Nego, va wela ekheleni ra ndzilo na va bohiwile. 24.Kutano hosi Nebukadnetsara a hatla a yima, a vulavula ni vatsundzuxi va yena a ku: “Ndza hlamala! Xana a hi hoxanga vavanuna vanharhu ntsena endzilweni lava a va bohiwile xana?” Kutani vatsundzuxi va hlamula hosi va ku: “Ina hosi, u vula swona!” 25.Nebukadnetsara a ku: “Kambe sweswi, ndzi vona vavanuna va mune, naswona a va bohiwanga, va tifamba-fambela exikarhi ka ndzilo, kambe a va tshwi; wanuna lowa vumune u fana ni xin’wana xa swikwembu.” 26.Kutani Nebukadnetsara a tshinela enon’wini wa khele ra ndzilo, a ku: “We Xadraka, na Mixaka, na Abedi-Nego, n’wina malandza ya Xiwekbu xa le henhla-henhla humani mi ta haleno!” Hiloko Xadraka, na Mixaka, na Abedi-Nego, va huma endzilweni. 27.Kutani tihosana, ni tindhuna letikulu ni letitsongo, ni vatsundzuxi va hosi, va ta va ta xiyaxiya vanhu lava, kutani va vona leswaku a ndzilo a wu va endlanga nchumu, hambi yi ri misis ya vona a yi vavukanga, ni swiambalo swa vona a swi tswanga, ku ri hava ni risema leri kombaka leswaku a va ri endzilweni. 28.Nebukadnetsara a ku: “Xikwembu xa Xadraka, na Mixaka, na Abedi-Nego, a xi dzunisiwe, hikuva xi rhumerile ntsumi ya xona ku ta ponisa malandza ya xona lama ya xi tshembeke, malandza lawa, a ma yingisanga xileriso xa mina hosi; ma hlawurile ku nyiketa miri wa wona leswaku wu xanisiwa, ku ri ni ku khongela swikwembu swin’wana, ma fularhela Xikwembu xa wona.  29.Kutani sweswi ndzi veka nawu lowu nge: “Munhu un’wana ni un’wana loyi a nga ta vulavula vubihi hi Xikwembu xa Xadraka, na Mixaka, na Abedi-Nego, u ta phatluleriwa a fa, munti wa yena wu hundzuka rhumbi, hikuva a ku na Xikwembu xin’wana lexi nga ponisaka hi ndlela leyi.” 30.Kutani hosi yi veka Xadraka, na Mixaka, na Abedi-Nego exiyin’wini xa le henhla exifundzeni xa Babilona.

4.

Murhandziwa mudyondzi, na sweswi wa ha le ku voneni ka matimba ya Xikwembu. Xi tikombisile eka hosi Nebukadnetsara, hi ku tirhisa Daniele, loko Daniele a n’wi byerile leswi a lorheke swona ni nhlamuselo wa kona. A vurile leswaku, I mpela ku na Xikwembu xin’we xa ntiyiso, Xikwembu xa Daniele. Kambe eka khambi leri, a a rivarile leswaku a a ngo sungula ku vona matimba ya Xikwembu xa le matilweni. Xi tlhele nakambe xi tirhisa malandza ya xona ra vumbirhi leswaku mahlo ya hosi ma pfuleka, a ku pfulekanga ya hosi ntsena, kambe ni ya malandza ni tihosana letin’wana. U nga hlenketa leswi mahungu ya majaha lamanharhu ekheleni ra ndzilo ma hangalakiseke xiswona ematikweni hinkwawu, loko lava hosi a yi va rhambile va tava va muke etindzawini ta vona ni le makaya. Ni hleketa leswaku vanhu vo tala va sungule ku pfumela eka Xikwembu xa ka Israele loko va twe vumboni lebyi.

5.

Kambe wu ve wihi ndzingo wa Xadraka, na Mixaka, na Abedi-Nego. A va boheka ku riska vutomi bya vona, va riska ku nghena endzilweni va fa hi rifo ro tshwa, leri ni tshembaka leswaku I rin’wana ra mafo yo vava ngopfu swinene. Hambiswiritano, va tibohe ku fa ku tlula ku landzula Xikwembu xa vona lexihanyaka va ya khinsamela xifaniso. Murhnadziwa mudyondzi, a ku va Mukriste wa ntiyiso a swi vevukanga minkarhi hinkwayo. Diavulosi a zondzha Mukriste un’wana ni un’wana hikuva I wa swi tiva leswaku Yesu a hanya endzeni ka hina, hikokwalaho a endla hinkwaswo leswi a swi kotaka ku hi twisa ku vava. Kambe hi lawa mahungu lamanene; Yesu u na matimba kutlurisa, loko a majaha lawaya ma hoxiwe endzilweni, a nghene na wona. A nga hi tshiki hi xaniseka hoxe hikwalaho ka voto ra yena. A na hina na swona I wa hi tiyisa.

6.

A hi languteni eka mhaka yin’wana leyi humeleleke ebukwini ya Daniele. A mhaka leyi, yi humelele Daniele, yi humelele endzhaku ka ku fuma ka hosi Nebukadnetsara. A hosi leyi a yi fuma enkarhini wa kona a ku ri Dariyosi. Daniele 6:1-28:

1. Hosi Dariyosi u vonile swi lulamile ku veka tihosana ta 120 etikweni ra yena hinkwarhu. 2.A veka ni valanguteri vanharhu ehenhla ka tihosana leti, leswaku va tifambisa, ni leswaku a hosi yi nga lahlekeriwi hi nchumu. Daniele a a ri un’wana wa valanguteri lava. 3.Kambe a a hambene ni tihosana ni valanguteri lavan’wana, hikuva yena a a lulamile ngopfu, kutani hosi Dariyosi a ehleketa ku n’wi veka mulanguteri wa tiko ra yena hinkwaro. 4.Kutani tihosana ni valanguteri lavan’wana va lava lexi va nga hehlaka Daniele ha xona entirhweni wa yena wa mfumo, kambe a va kumanga na xin’we lexi hoxekeke, hikuva a a tirha hi ku tshembeka.5.Hiloko vavanuna lava va ku: “A hi nga kumi nchumu xo hehla Daniele ha xona, ehandle ka loko ho n’wi hehla hi ta nawu wa Xikwembu xa yena.” 6.Kutani tihosana ni valanguteri lavan’wana va twanana exihundleni, va ya eka hosi Dariyosi va fika va ku: “We hosi, hanya hi laha ku nga heriki! 7.Hina hinkwerhu valanguteri va tiko ra wena, ni tindhuna letikulu ni letitsongo, ni tihosana, ni vatsundzuxi, hi twananile leswaku, we hosi, u fanele ku veka nawu lowu nga ta tirha ku ringana masiku ya 30, u vona leswaku u nga tluriwi; nawu wa kona hi lowu: “Munhu loyi a khongelaka xikwembu xin’wana kumbe munhu un’wana ehandle ka wena, u fanele ku hoxiwa ekheleni ra tinghala. 8.Kutani we hosi, nawu lowu u nga ta wu veka, u ta wu funga hi mfungo wa wena leswaku ku nga vi na munhu loyi a wu hundzuluxaka, hikuva hi ntolovelo wa Vameda ni Vaperesi, milawu a yi hundzuluxiwi.” 9.Kutani hosi Dariyosi a funga nawu wa kona, a wu tiyisa. 10.Kambe loko Daniele a twa leswaku nawu wa wolowo wu fungiwile, a muka a ya nghena endlwini ya yena ya le henhla, leyi mafastere ya yona a ma pfulekele ra le Yerusalema; kutani a khinsama a khongela, a tlangela Xikwembu xa yena kanharhu hi siku, ku kotisa leswi a a endlisa swona eminkarhini leyi hundzeke. 11.Hiloko vavanuna lava va twanana ku ya eka Daniele, va fika va n’wi kuma a ri eku khongeleni, a vulavula ni Xikwembu xa yena. 12.Kutani va suka va ya ehosini, va yi tsundzuxa nawu lowu yi wu vekeke va ku: “We hosi, xana a hi wena u fungeke nawu, u vula leswaku hi masiku ya 30, munhu loyi a khongelaka xikwembu xin’wana kumbe munhu un’wana ehandle ka wena u ta hoxiwa ekheleni ra tinghalaxana?” Hosi yi ku: “Mhaka leyi ya ha yimise xisweswo, hikuva hi ntolovelo wa Vameda ni Vaperesi, milawu a yi hundzuluxiwi.” 13.Kutani va hlambanya emahlweni ka hosi, va ku: “Un’wana wa vabohiwa loyi a humaka etikweni ra Yuda, loyi va nge I Daniele, a nga ku yingisi we hosi, hambi nawu lowu u wu fungeke, yena a nga na mhaka na wona; u ya emahlweni a khongela Xikwembu xa yena kanharhu hi siku!” 14. Loko hosi yi twa mhaka leyi, yi vaviseka ngopfu emoyeni, yi lava mano yo ponisa Daniele, dyambu ri kondza ri pela. 15.Kutani vavanuna lava va twanana ku ya eka hosi, va fika va ku ka yena: “We hosi, hi ntolovelo wa Vameda ni Vaperesi, milawu leyi vekiweke hi hosi a yi hundzuluxiwi.” 16.Kutani hosi yi lerisa leswaku Daniele a tekiwa a hixiwa ekheleni ra tinghala, kutani yi ku ka yena: “Xikwembu lexi u xi tirhelaka minkarhi hinkwayo we Daniele, a xi ku lamulele!” 17.Kutani ku vumbuluxiwa ribye, ri pfala nomo wa khele! Hosi Dariyosi ni tinghanakana ta yena va ri tiyisa hi ku ri lema, leswaku ku nga tshuki ku hundzuluxiwa nchumu emhakeni ya Daniele. 18.Endzhaku ka sweswo, hosi yi suka yi ya endlwini ya yona ya vuhosi, yi titsona swakudya vusiku hinkwabyo, yi ala ni ku vona vasati va yona, ni vurhongo byi nga phahi. 19.Kutani hosi Dariyosi a pfuka hi vurhonga a hantlisa a ya ekheleni ra tinghala. 20.Kuteloko a fika ekheleni, a huwelela Daniele hi rito leri kombaka ku vaviseka a ku: “We Daniele, nandza wa Xikwembu lexi hanyaka, xana Xikwembu xa wena lexi u xi tirhelaka minkarhi hinkwayo, xi swi kotile ku ku lamulela etinghaleni xana?” 21.Daniele a hlamula a ku: we hosi, hanya hi laha ku nga heriki!” 22.Xikwembu xa mina xi rhumile ntsumi ya xona yi ta siva milomo ya tinghala, kutani a ti ndzi endlanga nchumu, hikuva xi ndzi kumile ndzi nga ri na xisandzu emahlweni ka xona; hambi ku ri emahlweni ka wena hosi, a ndzi endlanga nchumu xo biha.” 23.Kutani hosi yi tsaka ku tlula mpimo, yi lerisa leswaku Daniele a humesiwa ekheleni ra tinghala; kutani loko ku endlisiwe sweswo, va kuma leswaku Daniele a nga vavisiwanga ni ku tsongo, hikuva a a tshembile Xikwqembu xa yena. 24.Hiloko hosi yi lerisa leswaku ku tisiwa vavanuna lava hehleke Daniele; kutani vona ni vana va vona ni vasati va vona, va hoxiwa ekheleni ra tinghala, kutani tinghala ti va tlulela, ti va phatlulela va nga se fika ni le hansi. 25Kutani Dariyosi a tsalela vanhu hinkwavu lava akeke etikweni ra yena hinkwaro lava vulavulaka tindzimi to hambana-hambana a ku: “Ku rhula a ku ve na n’wina! 26.Ndzi lerisa leswaku vanhu hinkwavu etikweni ra mina va khongela ni ku chava Xikwembu xa Daniele, hikuva hi xona Xikwembu lexi hanyaka, lexi nga ta va kona hi laha ku nga heriki; mfumo wa xona wu nga ka wu nga herisiwi, ni vuhosi bya xona a byi nga vi na makumu. 27.Xikwembu lexi xa ponisa ni ku lamulela, xi endla swikombiso ni mahlori etikweni ni la misaveni; hi xona xi lamuleleke Daniele etinghaleni ta matimba.” 28.Kutani, enkarhini wa ku fuma ka Dariyosi, ne nkarhini wa ku fuma ka Korexi lowa Muperesi, Daniele a a ri ni xiyimo xa le henhla.

A vukwele/ jelasi, I vulala byikulu embilwini ya munhu, byi endla leswaku a va ni vukarhi ni ku navela ku dlaya van’wana na va nga n’wi onelanga nchumu. Ri ve vukwele leri endleke leswaku valanguteri ni tihosana va twanana ku hehla Daniele. Xana I mani loyi a ngheniseke rivengo lero nghasi etimbilwini ta vona, a ku na un’wana ehandle ka diavulosi hikuva I makungu ya yena yo lava ku lovisa. Hi yena loyi a endleke leswaku a vanghana lava nharhu va Daniele va hoxiwa endzilweni. Na sweswi hi yena Sathana a tirhiseke valanguteri lava va hosi ku leswaku Daniele a hoxiwa ekheleni ra tinghala. Sathana a a lava ku herisa majaha lawa ya mune hikuva a va kombisile ku tsandzeka ka yena emahlweni ka hosi na le ka tinghanakana ta yona. A tiko hinkwaro ri sungule ku twa hi ta Xikwembu lexihanyaka xa Israele na hi ta hinkwaswo leswi xi swi endleke  hikwalaho ka vona.

7.

Ni hleketa leswaku hambi hi vanhu va Israele, lava va hohloteriweke tempele ya vona, lava nga khomiwa va yisiwa evukhumbini, a va tsaka ngopfu loko va twa vumboni lebyi. Va kote ku vona leswaku a kuva va wele emavokweni ya hosi leyi ya muhedeni, a hi leswaku Xikwembu xa vona xo kala xi nga ri na wona matimba. Va swi vonile leswaku a ve hikwalaho ka swidyoho swa vona, leswi endleke leswaku Xikwembu xi va nyiketa, leswaku va ta tshika ku gandzela swifaniso. Va swi vonile leswaku Xikwembu xa vona xa ha ri xona xa ntiyiso. Kutani a ku tshemba ku sungule ku va kona etimbilwini ta vona ka leswaku siku rin’wana, Xikwembu xi ta va tlherisela etikweni ra vona, xi tlhela xi va pfuna ku pfuxeta tempele hi vuntshwa ni doropa ra vona tani hi laha vaprofeta lava xi va rhumeleke eka vona va nga vula leswaku swi ta va tano.

8.

Murhandziwa mudyondzi, ni nga ku vutisa loko hakunene u ri Mukriste, xana a vutomi bya wena bya komba leswaku u n’wana wa Xikwembu eka vanhu xana? Xana loko a vahedeni va languta vutomi bya wena, va nga yima va ku: “Hakunene a Xikwembu xa yena hi xona xa ntiyiso.” Xana va kona lava nga pfumela eka Xikwembu hikwalaho ka vutomi bya wena? Xana a Vakriste van’wana va khutazeka hi vutomi bya wena xana? Leswaku u hanya vutombi byo endla leswaku van’wana va hundzukela eka Kriste, swi na hakelo leyi u faneleke ku yi hakela a yi mahala. Kambe endzhaku ka swona wa hakeriwa ku tlula leswi wena u hakeriseke swona. Loko u ta fika emakumu ka vutomi bya wena, kutani u languta laha u fambeke hi kona, a wu nga tisoli. Eka siku leriya, u ta va na ntsaku hikuva a vutomi bya wena a byi luzanga kambe byi tirhiseriwe ku nyika vudumu Xikwembu. Kutani loko u fika etilweni u ta vona mihandzu ya vumbhoni bya wena. Munghana wa mina, a Rito ra Xikwembu ri vula leswaku loyi a tihlayiselaka vutomi bya yena, a ta lahlekeriwa hi byona, kambe loyi a lahlekeriwaka hi vutomi bya yena hikwalaho ka ku rhandza Xikwembu ni mfumo wa xona, a ta byi kuma hi ntalo. Kutani ke, khutazeka hi xikombiso xa Daniele ni vanghana va yena, nyiketa vutomi bya wena eka Yesu. Kutani yena a ta byi endla byi pswala mihandzu leyo tala hi Vito ra Yena.

//////////