Estere

2008-08-02.

1.

Wa amukeleka eka nongonoko wa hina wa tidyondzo ta rivoningo ra matilo. Leyi i dyondzo ya vu 25 leyi vulavulaka hi buku ni vumunhu bya Estere.

2.

Eka tidyondzo timbirhi leti hundzeke, hi vulavule hi riendzo ra tiko ra Xikwembu, Israele loyi a a ri evuhlongeni etikweni ra Egipta. Hi dyondzile hi Daniele ni vanghana va yena vanharhu, ni hi ndlela leyi xi nga tihlavutela hi yona eka vona, hikwalaho ka swifaniso swa swikwembu ni vanhu va kona. Kambe a ku ri ni vavasati lava nga khomiwa va yisiwa evukhumbini lava a va rhandza Xikwembu ni ku xitirhela, un’wana wa vona a ku ri Estere.

3.

A vatswari va Estere a va file, yena a a hlayisiwa hi malume wa yena Mordekayi, loyi naswona a a ri nkulu eka vanhu va ntanga ya kona. Mordekayi a a ri wanuna loyi a a chava Xikwembu ni ku xi tirhela hi ku hetiseka, a endla leswaku Estere na yena a rhandza Xikwembu ni ku xi tirhela. Enkarhini lowu hosi Ahasuerus a nga fuma hi wona, a ve a hlundzukisiwa ngopfu swinene hikwalaho ka nkosikazi ya yena Vhasti, hikuva a a nga yingisi milawu ya yena. Hikokwalaho, a susiwile eka vukhosikazi, leswaku a ndzhawu ya yena yi nyiketiwa un’wana wa nsati.

4.

Kutani hosi yi lerisa malandza ya yona leswaku ku tisiwa van’whana lava nga si tekiwaka hambi ku tiva wanuna eka matiko hinkwawu, leswaku a hosi yi ta hlawula nkosikazhi exikarhi ka vona. A van’hwanyana lava a va fanela ku va lavo saseka ngopfu. Estere a ve un’wana wa lava tisiweke endlwini ya hosi entsindza wa munti wa xuxani. Estere a nghenisiwa endlwini ya vatshenhiwa va hosi leswaku a lulamisiwa ku kondza ku fika siku ra ku ya nghena endlwini ya hosi. A a fanela ku tola mafurha yo nyuwhela yo thambhisa miri wa yena ni ku dya swakudya leswo xawula ku ringana 12 wa tiwheti. Kutani swi n’wi endle a engeta ku saseka ngopfu. Kutani ku fika siku ra ku ya nghena endlwini ya hosi. Kutani hosi yi tsakisiwa ngopfu hi Estere ku tlula van’whana lavan’wana hinkwavu. Laha hi vona hi laha Xikwembu xi pfuneke Estere hikona. A hi hlayeni eka Estere 2:17-18:

17.Kutani hosi yi rhandza Estere ku tlula vavasati hinkwavo, yi n’wi tsakela yi n’wi komba tintswalo ku tlula vanhwana lavan’wana hinkwavu; kutani yi tlhandleka harhi enhlokweni yi n’wi nyika vunkosikazi ematshan’wini ya vhasti.18.Kutani hosi yi endla nkhuvu lowukulu wa ku amukela Estere, yi rhamba tihosana ta yona hinkwato ni malandza ya yona hinkwawo; yi veka siku leri leswaku ri va ra ku wisa, eswifundzeni hinkwaswo, yi tlhela yi phakela ni tinyiko to saseka leti faneleke ku ynyikiwa hi hosi.

Hi vona hi laha Xikwembu xi nga tihlavutela hi kona eka vafumi lava va misava ne ka matiko, kutani xi veka Estere eka xitshamu xo tlakuka, leswaku hikwalaho ka yena Xikwembu xi yisa emahlweni makungu ya xona.

5.

Kutani Hosi yi veka wanuna loyi va nge i Hamani kuva eka xisthamu xa vumbirhi xa nfumo wa yona. Munhu un’wana na un’wana a a fanela a n’wi khinsamela, kun’wana na kun’wana laha a n’wi kumaka kona. Hi mukhuva lowu, Hamani a tlakusiwa kuva hosi. Kambe malume wa Estere Mordekayi, loyi a nga endla leswaku a tlakusiwa a nga khinsamanga emahlweni ka Hamani, evuton’wini bya yena hinkwabyo a a khinsamela Xikwembu ehandle ka munhu. Loko Hamani a twile maendlele ya Mordekayi, a hlundzuka ngopfu, kutani a vona leswaku a ku khatisa yena ntsena a swi nge pfuni nchumu. A endla makungu ya ku dlaya Mordekayi ni mayuda hinkwawu ku nga rixaka ra Mordekayi. Hiloko a ya eka hosi a ya kombela mpfumelelo. A hi hlayeni eka Estere 3:8-11:

Kavaloko Hamani a byela hosi Ahasuwerusi, a ku: “Wena hosi, ku ni vanhu va rixaka rin’wana lava tlholokeleke exikarhi ka vanhu va wena; minkhuva ya vona, yi hambanile ni minkhuva ya vanhu van’wana, hi tlhelo a va hlayisi milawu ya wena hosi, kutani a swi nga ku vuyiseri nchumu ku tama wa ha va hlayisa, we hosi! 9.Loko u khensa we hosi, a ku hume nawu wa leswaku vanhu lava va herisiwa; mina ndzi ta tshembisa ku tisa tisilivhere leti tikaka tithani ta 410 emavokweni ya lava tirhelaka mfumo, va ta yi nghenisa evuhlayiselweni bya xuma xa wena, we hosi.” 10 Kutani hosi yi humesa xingwavila xa yona xo fungha ha xona, yi nyika nala wa Vayuda, Hamani n’wana Hamedata wa rixaka ra Agaga.11. Hosi yi n’wi byela yi ku: “Ma “Malii ndzi ku nyika yona, ni vanhu lava ndzi ku nyiketa vona, endla leswi u swi rhandzaka hi vona”.

Kutani Hamani a tsalela mimfumo hinkwayo ya swifundza hinkwaswo tipapila. A hi hlayeni eka 3:13:

Mapapila ma yisiwa eswifundzeni hinkwaswo swa hosi hi varhumiwa lava kota ku tsustuma, ma lerisa leswaku, Vayuda hinkwavo, lavakulu ni lavatsongo, vavasati, ni vana va dlawa, va dlayiwa, va herisiwa, va nyamalala hinkwavu hi siku rin’we ra vu 13 ra n’hweti ya vu 12 yi nga ya Adara, ku phangiwa ni xuma xa vona.

6.

Mordekayi a hlundzuke ngopfu swinene loko a twile mahungu ya khombo leri nga ta wela Vayuda hinkwavu hikwalaho ka yena. Kambe a a ta endla yini; Xikwembu a xi n’wi alela ku khinsamela vanhu e handle ka xona. A hi hlayeni eka Estere 4:1-2:

Loko Mordekayi a twa hinkwaswo leswi endliweke, a handzulela swiambalo swa yena, a ambala swiambalo swo hwaxa, a ticheletela nkuma, a famba exikarhi ka munti karhi a ba huwa a rila hi xiviti, 2.A fika a yima enyanghweni ya huvo ya hosi, hikuva munhu loyi a ambaleke swiambalo swo khwaxa a a nga pfumeleriwi ku nghena evuhosini.

Loko malandza ya nkosikazi Estere, ma n’wi hlamuserile hinkwaswo leswi nga humelela, a tshuke ngopfu ni ku chava hikwalaho ka leswi a swi ta humelela malume wa yena Mordekayi. A n’wi rhumela rito leri nge: “hluvula timpahla to khwaxa u ambala letintshwa. Kambe a swi nga ha koteki leswaku Mordekayi a cinca mpahla ni matshamelo ya yena. Kambe a byele loyi a nga rhumiwa ka yena hi Estere marito lawa: Estere 4:7-9:

Kutani Mordekayi a byela Hataki timhaka hinkwato leti ti n’wi humeleleke, a tlhela a n’wi byela ni ntsengo wa mali leyi Hamani a tshembiseke ku yi nghenisa evuhlayiselweni bya xuma xa hosi, leswaku Vayuda va dlawa va hela. Mordekayi a n’wi nyika ni tsalwa ra nawu lowu humesiweke eXuxani, lowu lerisaka leswaku Vayuda va herisiwa, leswaku Hataki a ta ri komba Estere, a n’wi komba rona, ni ku n’wi rhuma ku ya rila eka hosi, a yi khongotela leswaku yi tsetselela vanhu va rixaka ra ka vona. 9.Kutani Hataki a ya byela Estere marito ya Mordekayi.

Estere a n’wi rhuma ku tlhelela a ya eka Mordekayi, a ya n’wi byela leswaku, a ku na munhu na un’we loyi a nga yaka eka hosi a va a pona, loko yona yi nga n’wi kombi tintswalo, hi ku n’wi komba hi nhonga, kumbe yi nga n’wi vitananga. Hosi yi ta vona leswaku munhu loyi I wa titsongohata, loko swi nga ri tano, munhu yoloye a fanele ku dlawa. Xin’wana a a n’wi byerile leswaku ku hundza makume manharhu ya masiku na a nga si vitaniwa endlwini ya hosi. Kutani Mordekayi a hlamula marito lama landzelaka: Estere 4:13-14:

13.Mordekayi a va rhuma va tlherisela Estere nhlamulo leyi nge: “U nga hleketi leswaku loko u ri entsindza, u hlayisekile ku tlula Vayuda lavan’wana hinkwavo. 14.Hikuva loko u miyela hi nkarhi wo kota lowu, ku ntshunxeka ni ku ponisiwa ka Vayuda ku ta huma kun’wana, kambe wena ni varikwenu mi ta lova. Nakona swi tiviwa hi mani leswaku u tele nkarhi wo kota lowu kwala vuhosini?”

Xana wa swi twisisa leswi Mordekayi a swi byelaka Estere? A te: “U nga hleketi leswaku u kume vukosikazi hikuva wu yo saseka ni xiyimo xa kahle, e-e, Xikwembu xi ku veke lano hikuva a xi ri ni xikongomelo na wena. Xi swi tivile leswaku ku le ku teni ka khombo ro fana ni leri, kutani xi lava ku tirhisa lwena leswaku a vito ra xona ri ta dzunisiwa. Ni hleketa leswaku hinkwavu vavasati lava yingiselaka dyondzo leyi, va n’wi twela vusiwana Estere. A vasati hinkwavu va tiko leriya, a va vona Estere a ri wansati wa njombo leyikulu, a ku va nsati wa hosi a yi ri njombo yikulu swinene. Kamebe Estere a a tlula kwalaho, a a ri wansati wa risima ku tlula vavasati va yona hinkwavo, yena a a ri nkosazana. Loko hosi yi tshama exiluvelweni xa vuhosi Estere yena a a tshama etlhelo ka yona. Kutani a a ri nkateko hinkwawu wa le ntsindza, a swakudya leswo xawula hinkwaswo, timpahla leto saseka leti naveriwaka hi vavasati hinkwavo, a a ri ni vatirhi vo tala va xisati lava a va n’wi tirhela vusiku ni nhlikanhi, nasona a a hlayisekile laha a a tshama kona. A valanguteri lavakulu va hosi a va langutela Estere vusiku ni nhlikanhi leswaku ku nga tshuki kuva ni loyi a n’wi endlaka lexio biha. Kutani, a a boheka ku tshika tinfanelo ta yena hinkwato a nghena enghozini yo ya nghena endlwini ya hosi. Hi xinkarhana a a ta fanela ku humesiwa ehandle ku fana ni ntsumbu.

7.

Wa swi vona murhandziwa mudyondzi, Estere, xo sungula a a lumba Hosi ya Tilo ni misava, Xikwembu lexikulu xa matimba hinkwawu, Ahasuwerusi, ova xihosana xa laha misaveni lana Estere a a tshama endzindza ka yona, laha naswona a a etlela ekamereni ya yona loko ku fika nkarhi wa ku vitaniwa ka yena. A yi nga n’wi fumi, Estere a a lumba Hosi ya Tilo leyi a yi fuma tihosi hinkwato ta misava. A mahungu lawa Mordekayi a marhumeleke eka Estere, ma n’wi pfunile ma n’wi pfunile leswaku a tsumbula xihundla lexi, kutani a hlamula leswi:  4:15-17:

Estere a va byela ku ya hlamula Mordekayi va ku: “16.Yana u ya hlengeleta Vayuda hinkwavo lava nga Xuxani, kutani mi tsitsona swakudya masiku manharhu mi ndzi khongelela, mi nga dyi nchumu, mi nga nwi nchumu vusiku ni nhlikanhi. Mina ni malandza ya mina ya xisati, na hina hi ta titsona swakudya. Endzhaku ka sweswo ndzi ta ya eka hosi, hambileswi nawu wu alaka. Loko swi vula ku fa ndzi ta fa.” Kavaloko Mordekayi a famba a ya endla hinkwaswo leswi a n’wi leriseke swona.

Leyi a yi ri nhenha ya wansati, n’wana wa Xikwembu wo chivirika ni ku tinyiketa. Swa ni fanela ku ndzi nga vulavula marito yo khutaza vavasati lava nga ku yingiseleni ka dyondzo leyi: Na wena u wa risima eka Xikwembu, xi nga ku tirhisa ku fana ni leswi xi tirhisisaka xiswona wanuna un’wana na un’wana. Xa ku lava ku fana ni leswi xi laviska xiswona wanuna un’wana na un’wana. Hikokwalaho, u nga yime hi lendzhaku, tinyiketele hi ku hetiseka eka xona leswaku xi ku tirhisa ku ya hi ku rhandza ka xona.

8.

Hi siku ra vunharhu, endzhaku ka loko Mordekayi na Estere va vulavurile, Estere a endle hi laha a nga tshembisa hi kona. Hi hlaya eka Estere 5:1-9:

1. Loko ku hundzile masiku manharhu, Estere a ambala swa yena swa vukosikazi, a ya a ya yima endzeni ka munti wa hosi exivaveni lexi langutaneke ni yindlo ya xiluvelo. Hosi a yi ri endlwini yoleyo, yi tshamile exiluvelweni yi languta enyangweni. 2.Loko yi vona nkosikazi Estere a yimile exivaveni, yi n’wi tsetselela; kutani yi tlakusa nhonga ya yona ya nsuku, yi n’wi komba, kutani Estere a tshinela, a khumba makumu ya nhonga yoleyo. 3.Hosi yi vutisa yi ku: “Swi lo yini, nkosikazi Estere? Ndzi byele leswi u lavaka swona, u ta swi kuma, hambi loko u nga kombela ku averiwa mfumo wa mina hi le xikarhi!” 4. Estere a hlamula a ku: “Loko u khensa we n’wini wanga, a ndzi navela leswaku u ta na Hamani namuntlha, enkhubyeni lowu ndzi ku lunghiseleke wona.” 5.Kutani hosi yi ku hantlisani mi vitana Hamani, hi ta endla leswi Estere a kombelaka swona!” Kutani hosi na Hamani va ya dya nkhuvu lowu Estere a wu lunghiseke. 6.Loko va ri karhi va n’wa, hosi yi ku ka Estere: “Ndzi byele leswi u kombelaka swona, u ta swi kuma; ndzi ta ku nyika leswi u swi lavaka, hambi loko u kombela ku averiwa mfumo wa mina hi lexikarhi!” 7.Estere a hlamula a ku: “Leswi ndzi swi kombelaka ni leswi ndzi swi lavaka, hi leswi: 8 Loko u ndzi tsakela, we n’wini wanga, ni loko u khensa ku ndzi nyika leswi ndzi swi kombelaka ni ku endla leswi ndzi swi lavaka, ndzi navela leswaku u ta na Hamani kambe mundzuku, enkhubyini lowu ndzi nga ta mi lunghisela wona; kwalaho hi kona ndzi nga ta ku byela leswi ndzi swi kombelaka, we hosi. 9.Siku rero Hamani a suka a tikhorwisile, ni mbilu yi tsakile. Kambe a hlundzukisiwa swinene hi Mordekayi, loko a n’wi vona ehubyeni a nga tlakuki, nakona a nga kombi xichavu.

A ku dzunisiwe Xikwembu, lexi kombeke titswalo eka Estere loko a tshinelele hosi, ematshan’wini ya ku n’wi dlaya, yi amukele xikombelo xa yena ni ku ya dya na yena.

9.

Hamani a a tsakile hikuva a ri munhu wo titlakusa, naswona a ku ri mahaka ya risima ngopfu ku vitaniwa a ya dya ni hosi ni nsati wa yona. Kambe a ntsaku wa yena a yanga helo, hikuva loko a ha ku huma entsindza, a tlhele a vona Mordekayi a ala ku n’wi khinsamela. Loko a fike ekaya a hlengelete vasati va yena ni vanghana va yena, a va byela hi laha a kombiweke risima hi hosi ni hi laha a poyiriweke hikona hi Mordekayi hi ku ala ku n’wi khisamela. Kutani vasati va yena ni vanghana va yena va n’wi pfune hi marito lawa: Estere 5:14:

14 Hiloko nsati wakwe Zerexa ni vanghana va yena hinkwavo va ku ka yena: “A ku dzimiwe timhandze to leha 25 m, kutani mundzuku u kombela eka hosi leswaku Mordekayi a hayekiwa eka tona, kutani wena u ta ya na hosi enkhubyini u titsakerile.” Xitsundzuxo lexi xi tsakisa Hamani, kutani a lerisa leswaku timhandze ti dzimiwa.

10.

A swilo swi languteke swi ya emahlweni swi tika eka Mordekayi, kambe naxona Xikwembu a xi ri ntirwheni endzhaku ka mhaka leyi. Eka vusiku lebyiya, a hosi a yi etlelanga kahle evurhongweni bya yona, loko a pfukile a lerisa malangadza ya yena leswaku ma n’wi tisela a buku ya matimu ya tiko leswaku va hlaya leswi humeleleke eka malembe ya le ndzhaku emahlweni ka yena. Yin’wana ya timhaka leti nga humelela leyi va nga yi hlaya, yive ya leswaku, kuve ni tinghanakana timbirhi Bigitana na Teresi leti nga luka makungu ya ku dlaya hosi. Kutani loko Mordekayi a ma twile makungu ya vona yo lava ku dlaya hosi, a rhumele mahungu eka Estere leswaku a ta tivisa hosi mhaka leyi. Kutani a mhaka leyi yi kambisisiwa, kutani loko ku kumiwe leswaku a a ri ntiyiso, a tinghanakana letimbirhi ti khomiwe ti dlayiwa. Loko ka ha hlayiwa matimu, a hosi yi vutisa leswaku xana Mordekayi a a kungiwile eka mhaka leyinene xana; loko ku kumiwe leswaku a nga endleriwanga nchumu, hi ku hantlisa a hosi yi ku: Estere 6:4-14:

Hosi yi tlhela yi vutisa yi ku: “Xana ku na mani laha xivaveni?” Ekarhini wolowo Hamani a ha ku nghena erivaleni ra le ntsiindza, a tela ku ta vulavula ni hosi hi ta ku hayeka Mordekayi etimhandzeni leti a n’wi dzimeleke tona. 5.Malandza ya hosi ma ku ka yona: “Ku na Hamani, u lo tiyimela laha xivaveni,” Hosi yi ku: “A a nghene!” 6.Hamani a nghena, kutani hosi yi ku ka yena: “Ku na munhu un’wana loyi ndzi navelaka ku n’wi fundza. Xana munhu wa kona ndzi nga n’wi endlela yini xana?” Embilwini ya yena Hamani a ku: “A nga va mani loyi hosi yi navelaka ku n’wi fundza loko a nga ri mina ke!” 7.Kutani a hlamula hosi a ku: “Munhu loyi u tsakelaka ku n’wi fundza, we Hosi, 8.A a nyikiwe tinguvu ta vukosi leti u tiambalaka; a ku tisiwe ni hanci leyi u gadaka yona, leyi nga ni harhi ya vuhosi enhlokweni;9.Kutani tinguvu leti ni hanci leyi a swi nyikiwe un’wana wa tinghanakana leto chaviseka, leswaku a ambexa munhu loyi we hosi u tsakelaka ku n’wi fundza, a tlhela a n’wi rhendzelekisa ni rivala ra munti a ri karhi a huwelela a ku: ‘Munhu loyi hosi yi tsakelaka ku n’wi fundza a endleriwa swilo leswi swo tani!’” 10.Kutani hosi yi byela Hamani yi ku: “Hantlisa u teka tinguvo ni hanci, u fundza hi ndlela yoleyo Mordekayi loyi wa Muyuda, loyi a tirhaka ehubyeni. N’wi endlele hinkwaswo leswi u swi vuleke, u nga siyi nchumu!” 11.Kutani Hamani a teka tinguvu a ambexa Mordekayi, a n’wi gadisa hanci erivaleni ra munti a ri karhi a huwelela a rhangile emahlweni a ku: “Munhu loyi hosi yi tsakelaka ku n’wi fundza a endleriwa swilo swo tani!” 12.Kutani Mordekayi a tlhelela ehubyeni ya hosi, Hamani yena a hantlisa a tiyela ekaya a khunguvanyekile swinene, a tisiva xikandza hi ku nyuma. 13.Hamani a rungulela Zerexa nsati wa yena ni vanghana hinkwavo va yena, hinkwaswo leswi n’wi humeleleke; kutani vatsundzuxi lava va yena ni nsati wa yena Zerexa va ku ka yena: “Loko Mordekayi loyi a ku wiseke a ri wa rixaka ra Vayuda a ta ku wisela makumu, u nga ha pfuki!” 14.Loko va ha vulavula ku fika vatsheniwa va hosi va hantlisa va teka Hamani, va ya na yena enkhubyeni lowu Estere aa wu lunghisile.

11.

Ina murhandziwa mudyondzi, a swilo a swi famba hi ku hantlisa swinene, Hamani a suke ekaya ka yena hi moya wo tsaka ngopfu swinene. A vatirhi va yena a va ri karhi va vatla mhandze leyi leyi a a lva ku hayeka Mordekayi eka yona, enkarhini wolowo a a rindzela nhlamulo yo huma eka Hosi a nga ri na ku kanakana eka swona. A tlhele a ya enkhubyeni swn’we ni hosi na nkosikazi, kutani eku tlheleni ka yena a a tibyela ku vona Mordekayi na a hayekiwile emhandzeni. Kambe khombo ra kona, a swilo swi hundzulukele yena. Hi ku hantlisa a swilo swi dyikele yena. Hikuva Mordekayi a a ponisile, a a fanele ku ponisiwa. Hi ndlela leyi Mordekayi a nga xanisiwa hi yona, a a fanele ku xaniseka hi yona, a rhendzelekela ni doropa hinkwarho a ri karhi a huwelela a landzelela hanci leri Mordekayi a ri gadeke. Endzhaku ka tingana letikulu leti, a tlhelele ekaya a ya rungulela nsati wa yena ni vanghana va yena hinkwaswo leswi n’wi humeleleke. Kutani vona va ye emahlweni va n’wi heta matimba hi ku vula leswaku, loko Mordekayi a a ri Muyuda hakunene, a a nga ta ala ku khinsama emahlweni ka yena. Loko va ha vuvlavula, a varhumiwa va hosi va fika va ta ta vitana Hamani kuya enkhubyeni lowu Estere a wu lulamiseke.

12.

A hi hlayeni eka Estere 7:1-10 ni 8:1-2:

Kutani hosi yi famba na Hamani va ya dya nkhuvu ni nkasikazi Estere. 2.Loko va ri karhi va nwa vhinyo hi siku leri ra vumbirhi, hosi yi engeta yi ku ka Estere: “Nkosikazi Estere, ndzi byele leswi u kombelaka swona, u ta swi kuma; u ta nyikiwa hinkwaswo leswi u swi lavaka, hambiloko u kombela ku averiwa mfumo wa mina hi lexikarhi!” 3.Nkosikazi Estere a hlamula a ku: “Loko u ndzi tsakela we n’wini manga, ni loko u khensa, ndzi kombela ku tshikiwa ndzi hanya, naswona ndzi lava leswaku varikwerhu va tshikiwa va hanya. 4.Mhaka hileswaku hi xavisiwile, mina ni varikwerhu leswaku hi dlayiwa, hi herisiwa, hi nyamalala hinkwerhu. Loko a hi lo xavisiwa kunene leswaku hi va mahlonga ya xinuna ni ya xisati, a ndzi ta miyela. Kasi khombo leri hi nga na rona sweswi ri ta ku vangela ku lahlekeriwa lokukulu we hosi.” 5.Kutani hosi Ahasuwerusi a vutisa Estere a ku: “Loyi a nga I tiya-nhlana wo endla mhaka yo tani I mani xana, u kwihi ke? 6Nkosokazi Estere a hlamula a ku: “Nala ni muxanisi wa hina I mubihi loyi, Hamani!” Kutani Hamani a khomiwa hi ku chava lokukulu emahlweni ka hosi na nkosikazi. 7Kutani hosi yi suka eswakudyeni yi hlundzukile swinene, yi ya entangeni wa munti wa yona. Hamani yena a sala a xavelela nkosikazi Estere, a kombela ku tsetseleriwa, hikuva a a swi vona leswaku hosi yi pikile ku n’wi endla swo biha. 8 Loko hosi yi vuya hi le ntangeni wa yona, yi nghena laha a ku nwiwa vhinyo kona, nkarhi lowu Hamani a tiwiselaka exitshan’wini lexi Estere a a hleyamile a ri eka xona. Kutani hosi yi ku: “Xana munhu loyi u lava ni ku tlimbeleta nkasikazi kwala emahlweni ka mina endlwini ya mina xana?” Loko hosi ya ha ku vula sweswo, va khubumeta nhloko ya Hamani. 9 Kutani Harabona, un’wana wa vatsheniwa lava a va tirhela hosi a ku: “Tlhandlakambirhi, Hamani u dzimile timhandze to leha 25 m ekaya ka yena, leswaku a ta hayeka Mordekayi eka tona, munhu loyi a ku pfuneke ngopfu we hosi!” 10 Hosi yi ku: “Hayekani yena Hamani eka tona!” Kutani va hayeka Hamani etimhandzeni leti a a ti dzimerile ku hayeka Mordekayi eka tona. Kutani vukarhi bya hosi byi vohla.

8:1.Hi siku rero, hosi Ahasuwerusi a nyika nkosikazi Estere swilo hinkwaswo leswi a swi ri swa Hamani nala wa Vayuda. Kutani Mordekayi a pfumeleriwa ku hamba a ta eka hosi hikuva Estere a a byerile hosi leswaku Mordekayi I xaka ra kwe. 2.Hosi yi humesa xingwavila xa yona lexi a yi xi tekerile Hamani yi xi nyika Mordekayi; kutani Estere a veka Mordekayi leswaku a va mulanguteri wa swilo hinkwaswo leswi a swi ri swa Hamani.

Nakambe ha ha vona hi laha Xikwembu xi cincaka ha kona swilo hi ku hantlisa. Hi xinkarhana Mordekayi a a ri ekhombyeni ra ku hayekiwa emhandzeni, kambe hi nkarhi lowulandzelaka, a tlakusiwa kuva xitulwini xikulu hi hosi. A vutomi bya Estere a byi ri engozini, kambe hi ku tsopeta ka tihlo swilo hinkwaswo swi n’wi lulamerile. Kutani Estere na Mordekayi va ponise vutomi bya Vayuda ni bya tiko hinkwaru. Xana wa mavona mahetelelo ya xitori lexi xana. Hmbi hi namuntla a Vayuda va ha endla nkhuvu lowu vuriwaka purimi, va tsundzuka ni ku khensa xivindzi xa Estere na Mordekayi ni masingita ya Xikwembu ya ku ponisa vanhu va xona.

13.

Mudyondzi la rhandzeka, ni tlhela ni vula, a hi minkarhi hinkwayo swi olovaka ku tirhela Xikwembu xin’we xa ntiyiso, mutumbuluxi wa tilo ni misava, kambe swi na risima ni ntikelo, ina, hi nga xaniseka kambe emakumu hi ta hlula. Nkarhi un’wana swi ga hi tekela ni vutomi ku landzela vito ra Yesu emisaveni leyi, kambe eku heteleleni hi tava ni hakelo leyikulu.

//////////