2009-09-10
1. A dyondzo ya hina leyi hundzeke a yi vulavula hi ku avanyisa ka Xikwembu eka Ananiya na Safira, ku hlawuriwa ka Vadiyakoni leswaku va ta pfuna eka swivilelo swa tinoni ni hi laha mudyondzisiwa la vitaniwa Stefano a khandliweke ha kona hikwalaho ka ripfumelo ra yena eka Yesu.
2. A dyondzo leyi yi vulavula hi ku hundzuka ka ndhuna ya tiko ra Etiyopiya hi ntirho wa Filipe ni hi ta ku hundzuka ka Sawulo, loyi a hundzukeke mutirheli wa dyondzo ya Yesu, a va muapostola wa vu-chumu na vanharhu.
3. Hi hlaya eka Mintirho 8:26-31:
Ntsumi ya Hosi yi vulavula na Filipi, yi ku ka yena: “Suka, u ya tlhelo ra dzonga endleleni leyi yaka eYerusalema, leyi rhelelaka yi ya eGaza.” (A ku tali ku famba munhu endleleni leyi.) 27 Kutani Filipi a suka, a famba. Kavaloko ku humelela wanuna wa Muetiyopiya, mutsheniwa loyi a a ri ndhuna leyikulu ni mulanguteri wa rifuwo hinkwaro ra Kandake, hosi ya wansati ya Etiyopiya; munhu loyi a a tile eYerusalema ku ta ta gandzela kona; 28 kutani a a tlhelela kaya, a tshamile egolonyini ya yena, a ri karhi a hlaya buku ya muprofeta Esaya. 29 Moya wu ku ka Filipi: “Famba, u tshinelela golonyi liyaa.” Filipi a ya kona hi ku tsutsuma, a twa Muetiyopiya la hlayaka buku ya muprofeta Esaya; a ku ka yena: “Xana wa swi twisisa leswi u swi hlayaka xana?” 31 Yoloyi a ku: “Ndzi nga swi kotisa ku yini ku swi twisisa loko ndzi nga ri na loyi a ndzi hlamuselaka xana?” Kutani a kombela leswaku Filipi a khandziya a ta tshama na yena.
4. Eka dyondzo leyi hundzeke hi dyondzile hi Filipi loyi a a ri un’wana wa vadiyakoni lava 7, lava hlawuriweke ku hlayisa tinoni leti a ti ri kona ekerekeni. A a ri munhu loyi a a tshembekile naswona swi nga endleka a a ti tiva leswaku a nga na nyiko ya vu-administrador ntsena, kambe naswona a ni ya vu-vhangeli, ni xivono xo yisa Evhangeli ehandle ka Yerusalema. Swi nga endleka a lulamise un’wana leswaku a sala ni ntirho wa yena wa Vudiyakoni, kutani a tilulamisela ku ya eSamariya laha Xikwembu xi n’wi tirhiseke ku hundzula nhlayo ya vanhu vo tala eXikristeni. Ku ve ni ntsaku wu kulu emutini wa Samariya. A mhaka leyi yi kumeka eka 8:1-25.
5. A mahlo ya Yehova a ma nga languti ntsena eka tindhawu leti a ti ri kusuhi na Yerusalema ntsena, kambe ni ta le kule ku fana ni Etiyopiya, edzongeni ka Egipta. Swi nga endleka u ke u twa hi tiko leriya, laha vanhu va Afrika va hanyaka kona, leri namuntlha ri nga tiko ra vusiwana swinene, vanhu vo tala va xaniseka hi ndlala. Hambiswiritano, eka masiku lawaya, swi languteka ri ve tiko leri a ri pfundzile swinene, hikuva Kandaki hosi ya wansati leyi a yi fuma a a pfundzile. Hi vona hi laha a nga hlawula wanuna a tsheniwa leswaku a va ndhuna ya rifuwo ra tiko. Swi languteka onge ndhuna leyi, yi ve ni xinakulobye ni vakhongeri va Xiyuda, naswona swi languteka onge a a pfumela eka Xikwembu xa Abrahama, hikuva a fambe mpfuka wo leha ku suka Etiyopiya ku ya eYerusalema ku ya humesela Xikwembu magandzelo eTempeleni. Loko hi langutisisa etilweni hi mahlo ya moya, Hosi Yesu a vone wanuna loyi loko a tlhelela Etiyopiya hi ndlela ya Gaza, ni leswaku a a ri ni torha ra ku tiva Xikwembu, hikuva a a xavile a buku ya ku dura ya testamente ya khale, kutani a yi hlaya na a tshamile egolonyini ra yena. Loko a ri hlaya a a nga twisisi leswi a ri vula swona, a ko a tlakusa rito loko a hlaya, hambi swiritano, a a nga swi twisisi.
6. Xikwembu a xi lava loyi xi nga n’wi tirhisaka ku va muvhangeli, leswaku a ta ya hlamusela Muetiyopiya leswi a a swi hlaya. Xikwembu xi hlawule Filipi hi ku tirhisa ntsumi ya xona, yi ku: “Suka, u ya tlhelo ra dzonga endleleni leyi yaka eYerusalema, leyi rhelelaka yi ya eGaza.” Filipi a nga alanga, hambi leswi a yi ri ndlela leyi a yi nga tali ku fambiwa hi vanhu vo tala, naswona a a nga tivi leswaku a ya endla yini, kambe a fambile. A ya kuma wanuna ehenhla ka nqolo, Xikwembu xi tlhela xi n’wi hlavutela, eka khambi leri, Xikwembu xi vulavule na yena hi Moya lowo Kwetsima xi ku: “Famba, u tshinelela golonyi liyaa.” Loko a ri karhi a tshinelela a twa wanuna loyi a hlayaka matsalwa lawa a a ma tiva swinene kutani a vutisa wanuna loyi a ku: “ Xana wa swi twisisa leswi u swi hlayaka xana?” Wanuna a hlamula a ku: “Ni nga swi twisisisa kuyini loko ni nga ri ni muhlamuseri xana?” kutani a vitana Filipi leswaku a khandziya egolonyini va ta tshama swin’we, kutani a n’wi hlamusela leswi ma vulaka swona.
7. A Vakriste vo tala va navela kuva ni microfone emavokweni ya vona ni swipikara swikulu kutani va vulavula ni vanhu vo tala. Hi ndlela leyo, va ti twa onge va tirhisiwe ngopfu hi Xikwembu. Kambe Xikwembu xi vona xivundza xa vanhu misaveni hinkwayo, lava nga eku laveni ka ntiyiso ya rito ra xona, kutani xi le ku laveni ka loyi xi nga n’wi rhumaka eka vona. Ko tala ni vona vatirhi ku fana ni vavhangeli ni vafundhisi, va tshamile emakaya ya vona emindzhutini hi midqivela, va tikhegela eswitulwini swa vona, va ri karhi va tiphini hi leswi ni leswiya, va va bisi hi swilo swo kala swi nga pfuni nchumu swa misava, kambe a va fambi va wina mahika la ma lahlekeke, kutani na hlamala. “ Makwerhu la rhandzekaka, xana tindleve ta mbilu ya wena ti pfulekile ku twa leswi Moya lowo Kwetsima wu ku vitanelaka ku endla swona xana? Xana u khongerile mixo wa namuntlha u vutisa Xikwembu leswaku xi ku komba lomu ku nga ni mbilu leyi lulamisiweke hi Xikwembu?” Murhandziwa nakulori, a hi dyondzeni hi Filipi; a a hlawuriwile kuva Mudiyakoni, kambe loko a tinyiketerile eka Xikwembu, a endle mpfuxelelo ni ntsaku etikweni ra le kule ra Samariya, a endzeriwile hi ntsumi kutani a ti kuma a tshame ni ndhuna ya xiyimo xa le henhla egolonyini ra yena, a phemelana na yena evhangeli. A a le emananga laha a kereke ni vangana a va nga n’wi voni, kambe a a tshembekile eka Xikwembu.
8. Hi ya emahlweni hi hlaya eka ndzimana ya 32- 35:
Ndzimana ya buku leyi a a yi hlaya hi leyi: “ A a fana ni nyimpfu leyi yisiwaka eku tlhaviweni, kumbe xinyimpfana lexi miyelaka loko va xi tsemeta voya: A nga pfulanga nomo. 33 U tsongahatiwile, a aleriwa leswo lulama. I mani la nga ta vulavula hi vatukulu va yena, leswi vutomi bya yena la misaveni byi fikeke makumu, ke?” 34 Kutani ndhuna yi ku ka Filipi: “Wa nga ndzi byela, xana muprofeta u vula mani hi mhaka leyi? Xana wa tivula, kumbe u vula un’wana ke?” 35 Hiloko Filipi a sungula ku vulavula. A rhanga hi buku yoleyo, kutani a n’wi tivisa Evhangeli ya Yesu.
9. A matsalwa lawa ma tekiwe eka buku ya muprofeta Esaya 53:7, ehandle ka marito man’wana lama vulavuriwaka hi ndhuna. A ndhuna leyi a yi nga swi twisisi leswi buku leyi a yi vulavula hi swona, hikuva eka testamente ya khale, a vapfumeri a va nga ri ni vuentelelo byikulu mayelano ni ta N’wana wa Xikwembu, loyi a ta ta hi le tilweni a ta ta fa exihambanwini leswaku a ta ponisa vanhu. Kambe Filipi a a ri na byona vutivi byo enta mayelano ni ta Kriste, kutani a swi kotile ku n’wi pfuna. A n’wi hlamusele hi ndlela yo vevuka swinene wanuna loyi a a ri ni torha ra ntiyiso. A kotile ku n’wi byela hi ta Yesu loyi a tswariweke Betlehema hi Mariya loyi a a nga tivi wanuna, a kuleleke Nazareta, a tiviwa kota n’wana wa muvatli, loyi a chumayeleke ni ku dyondzisa ku ringana malembe manharhu ni hafu, a hanyisa lava vabyaka, a hlongola mademona, a pfuxa lava feke, a dyondzisa swisiwana hi ta mfumo wa wa Tata wa yena, kutani a vambiwa hikwalaho ka swidyoho swa vanhu. Kutani a ndhuna yi swi twisisa.
10. Hi ya emahlweni hi hlaya eka vhesi 36-38:
Va ku va ha famba endleleni, va fika laha a ku ri ni mati, kutani ndhuna yi ku: “Vona, mati hi lawa; ku nga sivela yini leswaku ndzi khuvuriwa xana?” [37 Filipi a ku: “Loko u pfumela hi mbilu ya wena hinkwayo, u nga khuvuriwa.” A hlamula a ku: “Ndza pfumela leswaku Yesu Kriste i N’wana wa Xikwembu.”] 38 Kuteloko a lerisile leswaku golonyi yi yima, va ngirimela ematini hi vumbirhi bya vona, Filipi ni ndhuna; kutani Filipi a yi khuvula.
11. Eka hundzuluxo yin’wana ya Bibele, ku tsariwe leswaku Filipi a hlamule a ku: “Loko u pfumela hi mbilu ya wena hinkwayo wa pfumeleriwa” Laha ndhuna yi hlamuleke yi ku: “Ndza pfumela leswaku Yesu Kriste i N’wana wa Xikwembu.” Swi na ri sima ku tiva leswaku hi ponisiwa hi ku pfumela eka Yesu Kriste, a yi nkhuvulo. A nkhuvulo i vumbhoni bya le rivaleni bya leswaku hi ku amukela Yesu Kriste tani hi muponisi wa hina, hi pfumela leswaku hi file na Kriste hi tlhelo ra swidyoho swa hina, naswona hi pfukile swin’we na yena emirini ni le vuton’wini byintshwa, kutani a ha ha hanyi hi ku ti lawula, kambe hi lawuriwa hi Moya lowo Kwetsima lowo ngheneke ka hina. Swi nga endleka a ndhuna yi ve ni malandza yo tala hikuva a a ri wanuna wa xiyimo xa le henhla, kutani a a lava leswaku vanhu hinkwavo va va kona leswaku va va timbhoni ta leswaku a veke ku tshemba ka yena eka Hosi Yesu Kriste.
12. Hi ya emahlweni hi hlaya eka vhesi 39-40:
Kuteloko va humile ematini, Moya wa Hosi wu susa Filipi. Ndhuna a ya ha vuyanga yi n’wi vona; hambiswiritano, yi yile emahlweni ni riendzo ra yona, yi tsakile swinene. 40 Loko a ri Filipi a ti kuma a ri le Azoto; kutani a famba-famba emitini hinkwayo a ri karhi a twarisa Evhangeli, a kondza a fika eKhezariya.
13. A ndhuna yi fambe yi tsakile. A nga ha lavanga ku pfuniwa hi Filipi, hikuva a a n’wi kumile mupfuni ku nga Yesu, loyi a a ta n’wi khumbarhta eriendzweni a ko a ya fika Etiyopiya, na tshemaba leswaku loko a fikile, a tivise mahungu ya ntsaku wa yena eka eka Kandake hosi ya wansati, ne ka hinkwavo varhangeri va xiyimo xa le henhla, hikuva a ve eriendzweni ro leha kutani a a vuye ni ndzhaka yikulu etikweni ra yena, yi nga ya vutomi lebyi nga heriki swin’we na Yesu Kriste Hosi ya hina.
14. Xana Filipi a humeleriwe hi yini? A ku nga ha ri na xilaveko xa leswaku a tlhelela eYerusalema, kumbe eSamariya, hikuva a Moya lowo Kwetsima a wu lava ku ya n’wi tirhisa laha Xikwembu a xi n’wi lulamisele kona.
15. Sweswi hi fikile eka capitulo ya risima ya buku ya Mintirho 9, leyi vulavulaka hi ku hundzuka ka Pawulo. Hi hlaya eka 9:1-9:
Leswi Sawulo a a hisekela ku chavisa ni ku dlaya vadyondzisiwa va Hosi, a ya eka Muprista lonkulu, 2 a ya kombela mapapila lama tsaleriweke masinagoga ya Damaska, leswaku loko a tshuka a kuma van’wana lava landzaka ndlela ya Hosi, vavanuna kumbe vavasati, a va yisa eYerusalema va bohiwile. 3 Loko a ri endleleni, a ri kusuhi na Damaska, hi nomo lo ku vonakala loku humaka etilweni ku n’wi rhendzela. 4 Kutani a wela ehansi, a twa rito leri nge ka yena: Sawulo, Sawulo! U ndzi xanisela yini?” 5 Yena a ku: “U mani Hosi?” Rito ri ku: “Hi mina Yesu, loyi u n’wi xanisaka. 6 Kambe pfuka u yima, u nghena emutini, kutani u ta byeriwa leswi u fanelaka ku endla swona.” 7 Lava a va famba na yena, va yima va nga vuli nchumu, hikuva a va twa rito, kambe va nga voni munhu. 8 Sawulo a suka a yima, kambe loko a pfula mahlo, a nga ha koti ku vona; kutani va n’wi khoma hi voko, va n’wi yisa eDamaska. 9 Kutani a tshama masiku manharhu, a nga voni, a nga dyi, a nga n’wi nchumu.
16. A ku xanisiwa ka Vakriste a Yerusalema a ku hlurile vumbhoni bya vona, ku ko ku fika laha ntalo wa vona va nga hangalaka ni tiko hinkwarho ra mfumo wa Va-rhoma. Hi ndlela leyi, a ku xanisiwa ka Vakwetsimi, ku ve ndlela ya ku yisa mfumo wa Yesu emahlweni, hikuva hinkwaku laha a va balekela kona, a va hangalasa mahungu lamanene ya Evhangeli ya Yesu Kriste muponisi loyi a feke a tlhela a pfuka leswaku vanhu hinkwavo va kuma ku ponisiwa. A mahungu lawa hi ku hantlisa ma fikile etidnleveni ta muprista lonkulu, tani hi laha yena a a tsake hikona, a ko a nyika mapapila Sawulo ya ku ya xanisa vapfumeri lava a va hlengeletana etikweni ra Damaska.
17. Kutani Sawulo ni man’wana masocha, kumbe maporisa, va suka eYerusalema. A a hiseka swinene hikwalaho ka vukhongeri bya Xiyuda, naswona a a kholwa leswaku a le ku tsakiseni ka Xikwembu loko a xi pfatlanya xintiwhani. A Bibele yi vula leswaku Sawulo a a hefemula vukarhi ku fana ni humo leyi hlundzukeke loko yi bhonga, yi ri karhi yi mpfhumpfha rihlakahla, ni ku phandha na yi nga se lwa. Ni sweswi eka nkarhi wa ka hina, swa humelela swo fana etikerekeni ta Xikriste, van’wana va khomelele xivhesana xin’we, va fika ni laha va nga vuriki nchumu hi tikereke tin’wana va hleketa leswaku i ya ka vona ntsena leyi tiviwaka etilweni, naswona hi yona yi yaka kona, kutani leti n’wana tona ti bihile. Ku fika ni laha loko un’wana wa vakriste va kereke yoleyo, va ya pfuxela letin’wana, a bohiwaka hi vakulukumba va bandla a nga ha tirhi nchumu ekerekeni. Hi fanele ku dyondza rito ra Xikwembu hi ku enta kutani hi titsongahata eka Moya lowo Kwetsima leswaku wu hi pfula mahla ya le Moyeni leswaku hi ta kota ku twisisa leswi matsalwa ma vulaka swona. Ehandle ka swona, hi to mpfhumpfha-mpfhumpfheka mahala, hi avanyisa vana va Xikwembu hi tlhela hi hohlota ntirho wa yena.
18. Loko a ko va ku hi fanele ku avanyisa leswi Sawulo a swi endleke, hi ta boheka ku n’wi khatisa swinene hi leswi a swi endleke, kambe languta leswi Xikwembu swi endleke. A Hosi yi xi twile xikhongelo xa Stefana, loko a khongelela vaxanisi va yena, a ku lexi va xi endlaka a va xi tivi, kutani Xikwembu, xi tiyimisela ku kombisa ntiyiso wa xona eka Sawulo. Kutani ke, loko Sawulo a ri kusuhi ni ku heta riendzo ra yena ro ya Edamaska, a ri karhi a hefemuteka, a songa makungu ya ku ya boha vanonon’hwi lavaya va va Kriste, hi nomo lo, hi ku tsopeta ka tihlo, Xikwembu xi veka nkondzo wa xona, kutani hinkwaswo swi hundzuka swi va eka xiyimo xin’wana. Yesu Kriste a tikombisa eka yena hi rihati leri tlunyeke mahlo ya yena na Yesu a ri karhi a vulavula na yena hi rito leri tlakukeke ngopfu a ku: Sawulo! Sawulo, u ni xanisela yini?” tiva leswaku Hosi Yesu a hanya endzeni ka mupfumeri un’wana na un’wana, loyi a xanisaka mudyondzisiwa wa Kriste, a le ku xaniseni ka Yesu ha yexe. Sawulo tshuke ngopfu swinene. A ku: “U mani Hosi?” A a tshame a twa hi ta Yesu Kriste, a twe vumbhoni byo tala bya leswi Yesu a swi endleke, kambe a a nga pfumeri leswaku Yesu a a ri n’wana wa Xikwembu ni leswaku a pfukile esirheni ni ku tlhantuka a ya etilweni, hikokwlaho, a vutiseke a ku: “ kasi i mani munhu loyi ni ngo twa rito kambe a ni n’wi voni, naswona a vulavula ku sukela etilweni a ri karhi a heleketiwa hi rihati xana?” Hi mina Yesu loyi u n’wi xanisaka; na tshema leswaku Sawulo a ve ku chaveni ku kulu swinene, a ku ni le ku xaniseni ka N’wana wa Xikwembu! Na tshemba leswaku a a hlekeka leswaku a nga ta hanya, a misava yi ta n’wi minta ku fana ni leswi yi swi endleke eka Koraga, Datani na Abirama. Kambe Xikwembu a xi nga tiyimiselanga ku dlaya mudyohi, kambe xi n’wi pfune leswaku a ya ku tisoleni a hundzuka, kutani xi n’wi tirhisela ku tlakusa ni ku dumisa mfumo wa xona. Hi loko Hosi yi te: “Pfuka u nghena emutini, kutani u ta byeriwa leswi u fanelaka ku swi endla”
19. Loko Sawulo a pfukile, a a nga ha voni, a Mufarisi loyi a a tikurisa ngopfu, a tibyela leswaku a ta ya khotsa vavanuna ni vavasati hambi vana, eDamaska, a ku hundzuke yena loyi a a khomiwe hi voko a nghena eDamaska. Lawa i masingita ni maendlela ya Xikwembu. A hete masiku manharhu a nga voni, a nga dyi ni ku n’wana nchumu. Wu ve wona nkarhi lowu a a le ku tisoleni a ya exiluvelweni xa Xikwembu, na Moya wa xona wu ri karhi wu n’wi nyika ku twisisa ni swihundla swa Evhangeli ya Kriste.
20. Sweswi a hi hlayeni eka tivhesi ta 10-19:
A ku ri ni mudyondzisi un’wana le Damaska loyi a va ku i Ananiya; Hosi yi vulavula na yena hi xivono, yi ku: “Ananiya!” Yena a ku hi mina loyi Hosi” 11 Hosi yi ku ka yena: “Suka u yima, u ya endleleni leyi vuriwaka ‘leyo lulama’, kutani endlwini ya Yuda u lava munhu wo huma eTarso loyi va nge i Sawulo; wa karhi wa khongela; 12 hi xivono, u vonile munhu loyi va nge i Ananiya a ri karhi a nghena, a n’wi tlhandleka mavoko leswaku a tlhela a vona.” 13 Ananiya a hlamula a ku: “Hosi, ndzi twile lavo tala va vulavula hi munhu loyi, ni leswaku u endlile leswo biha ngopfu eka vahlawuiwa va wena le Yerusalema. 14 Kutani ni kwala, u nyikiwile matimba hi vaprista lavakulu ku khoma vanhu hinkwavo lava khongelaka vito ra wena.” 15 Hosi yi ku ka yena: “Yana, hikuva munhu loyi i xitirho lexi ndzi nga tihlawulela xona ku ya twarisa vito ra mina eka vamatiko, ni ka tihosi, ni ka Vaisraele; 16 naswona mina ndzi ta n’wi komba hinkwaswo leswi a fanelaka ku vaviseka ha swona, hikwalaho ka vito ra mina.” 17 Ananiya a famba, a ya nghena ndlwini, kutani a tlhandleka Sawulo mavoko, a ku: “Sawulo makwerhu, ndzi rhumiwile hi Hosi, a nga yena Yesu la tikombiseke ka wena endleleni leyi u nga ta ha yona; u ndzi rhumile eka wena leswaku u tlhela u vona, ni leswaku u tala Moya lowo Kwetsima.” 18 Hi nomo lo, swilo leswi fanaka ni tihakatimba swi suka ematihlweni ya Sawulo, kutani a tlhela a vona, a suka a yima, a khuvuriwa. 19 Kuteloko a dyile swakudya, a tlhela a kuma matimba.
21. Eka matsalwa lawa, a hi languteni hi laha Xikwembu xi tirhisaka vanhu vo kala va nga pfuni nchumu ku fana na wena na mina entirhweni wa xona. Yesu a nga ha tirhi hi xiviri xa yena emisaveni leyi, a lo tshama evokweni ra xinene ra Tata wa yena, a lulamisa ntirho wa yena wa le misaveni, kutani a lava milenge, mavoko ni nomo wa wena leswaku swi endla ntirho wa yena. Yesu a a lava ku tirhisa Ananiya eka ntirho wa risima swinene, ntirho wa ku chavelela hika leri nga ku vileleni ka ku ntshuxiwa, a ya ri pfula mahlo ni ku ri tlhandleka mavoko leswaku a tala Moya lowo Kwetsima. A byi ri vutihlamuleri bya risima ngopfu swinene, hikuva a wanuna loyi a a yo hlawuriwa hi Xikwembu leswaku a ta va wa matimba exikarhi ka vaapostola lavan’wana, n’wamahungu wa Xikwembu loyi a a ta huwelela Evhangeli eka tihosi leti kulu ni vafumi va misava. Kambe Ananiya a chava. A teke ku avanyisa ka yena ku ri ka risima ku tlula ku avanyisa ka Xikwembu, a ku: “A swi nge endleke Hosi, wanuna luya, ni tiva hinkwaswo hi yena. A nha hundzukanga luya, a tele ku ta ta hi khoma la, a hi nghenisa ekhotsweni ni ku hi dlaya; e-e Hosi, a ni nga yi.” Hambiloko ematsalweni hi twa Xikwembu xi vitana vanhu, leswaku va endla leswi kumbe leswiya, va ala, va nyika marazawu yo tala. Swi kahle ku veka swikhalo swa wena eka Hosi, yi ta ku hlamula yi va yi susa ku chava ka wena, tani hi laha yi endleke hikona eka Ananiya. Yi te: “Ni tiva hinkwaswo hi Sawulo, leswaku a a xanisa vanhu va mina, kambe naswona, ni tiva xiyimo xa yena xa sweswi, leswaku, a le ku khongeleni, a le ku ni vitanene leswaku ni n’wi pfuna naswona ni tiva hinkwaswo leswi nga ta n’wi humelela eka masiku lamataka, hileswaku, i xibya xa mina lexi ni tihlawuleleke. A a nga ta vula vumboni bya mina ntsena, naswona a ta xaniseka hikwalaho ka mina. Kutani famba u ya n’wi khongelela.” Ni tshemba leswaku loko a twe marito lawa Ananiya, a hantlise a ya endlwini ya Yuda hi xitarata lexi kongomaka laha Sawulo a a ri kona. A fika a n’wi hlamusela leswaku, a Hosi leyi yi tikombiseke eka yena endleleni, yi n’wi rhumile. Kutani a n’wi tlhandleka mavoko a n’wi khongelela. Kutani Xikwembu xi tirha hi Ananiya, ku suka swilo swin’wana swo fana ni tihakatimba ematihlweni ya Sawulo leswaku a tlhela a vona ni ku tala Moya lowo Kwetsima endzhaku ka loko a khuvuriwile hi mati leswaku a vula vumboni bya ku hundzuka ka yena a amukela Yesu Kriste tani Hosi ni Muponisi wa yena.
22. A tindlela ta Xikwembu ta hlamarisa. A hi fanele ku vula leswaku munhu loyi a ni swidyoho swinyingi a nge he ponisiwi. Xikwembu xi le ntirhweni etimbilwini ta vanhu hi ndlela leyi nga voniwiki, ku fana ni moya lowu hungaka kambe hi nga voniki laha wu humaka kona ni laha wu yaka kona. A xa hina, i ku khongela, hi tshemba Xikwembu leswaku eku ponisa vadyohi, kutani loko hi ri karhi hi endla leswo, hi ta vona mahlori ma endleka hi ndlela yo hlamarisa. Pawulo a nga lo hundzuka ntsena eka Kriste, kambe hi xihantla a sungule ku vula vumboni bya ku hundzuka ka yena ku sukela eDamaska, ku ko ku fika laha Vayuda va lavaka ku n’wi dlaya, kutani Vakriste va n’wi pfuna leswaku a chupuka.
23. Vona matimba ya Yesu. Xana i mani loyi a nga yimaka a lwa na yena xana? Tshika sathana a ringetani leswi a swi lavaka, a ta hluriwa minkarhi hinkwayo kutani a mudyondzisiwa wa yena wa matimba, eku heteleleni a ta hundzuka mulandzeri wa Krsite hi matimba.
//////////
To copy (DOWNLOAD) tap: Filipe, ndhuna ra Etiyopiya, Pawulo