Ku khomiwa ka Petro

2009-09-10

1. A dyondzo ya hina leyi hundzeke, a yi vulavula hi  ta ku ta ka Moya lowo Kwetsima, ni mihandzu leyi humeleleke endzhaku ka swona.

2. A dyondzo leyi hi nga eka yona, yi vulavula  hi ta ku hanyisiwa ka xigono, laha hi kuma a kondzo ya vumbirhi ya Petro ni ku khomiwa ka yena hi vaprista.

3. A matsalwa lama tsariweke eka dyondzo leyi, a ma vileri nhlamuselo yikulu, hikokwalaho ni to hlamusela switsongo.

4. A hi hlayeni eka Mintirho 3:1-26:

Siku rin’wana, Petro na Yohane a va tlhandukela eTempeleni nindzhenga, hi nkarhi wa xikhongelo. 2 Kona eTempeleni, enyangweni leyi vuriwaka “Leyo saseka”,  a ku ri ni munhu la velekiweke a ri xigono;  a va hamba va n’wi rhwala va n’wi veka kona masiku hinkwawo, leswaku a ta kombela swihanano eka lava nghenaka eTempeleni. 3 Loko munhu loyi a vona Petro na Yohane va ri ku suhi ni ku nghena eTempeleni, a kombela swihanano eka vona. 4 Kambe Petro na Yohane va n’wi honokela, kutani Petro a ku: “Hi langute”. 5 Munhu loyi a va languta swinene, a hlenketa leswaku va ta n’wi nyika xanchumu. 6 Kambe Petro a ku ka yena: “ Silivere ndzi hava,  ni  nsuku a ndzi na wona, kambe lexi ndzi nga na xona, ndzi ta ku nyika xona: Hi vito ra Yesu Kriste wa Nazareta, ndzi ri: Famba!” 7 Kutani a n’wi khoma hi voko ra xinene, a n’wi yimisa; hi nomu lo minkondzo ya yena ni mahlakala ya yena swi va swi tiya. 8 Kutani o kákátsuku, a yima a famba; a nghena  eTempeleni swin’we na vona, a ri karhi a famba, a tlula-tlula, a dzunisa Xkwembu, 9 kutani vanhu hinkwavo va n’wi vona a ri karhi a famba, a dzunisa Xikwembu. 10 Loko va vona leswaku hi yena loyi a a tshamela ku kombela swihanano eTempeleni, enyangweni leyi vuriwaka “Leyo Saseka”, va khomiwa hi ku chava, va hlamarisiwa swinene hi leswi humeleleke eka yena.

12. Loko Petro a swi vona, a ku ka vona: “Vavanuna va Israele. Hikwalaho ka yini mi hlamala mhaka leyi, mi hi tlhava hi mahlo hi mukhuva lowu xana, wonge hi loko ku ri hina hi nga endla leswaku munhu loyi a famba, hi matimba ya hina kumbe hi vukhongeri bya hina? 13 Xikwembu xa Abrahama ni xa Isaka ni xa Yakobo, Xikwembu xa vatata wa hina, xi dzunisile nandza wa xona Yesu, loyi mi n’wi nyiketeke, mi tlhela mi n’wi landzula emahlweni ka Pilato; kambe Pilato yena a a vurile leswaku a ntshunxiwa. 14 Yesu a a ri la hlawulekeke, la lulameke; kambe n’wina mi n’wi landzurile, mi kombela ku ntshunxeriwa mudlayi, 15 kutani mi dlaya munyiki wa vutomi; kambe Xikwembu xi n’wi pfuxile eku feni; hina hi timbhoni ta swona. 16 Hikokwalaho, leswi tiyiseke munhu loyi mi n’wi tivaka ni ku n’wi vona, i vito ra Yesu ni ku pfumela eka vito leri; kutani ku pfumela loku, ku hanyise munhu loyi hakunene, hi matimba ya Yesu, hilaha mi swi vonaka hakonan’wina hinkwenu.  17 Kutani vamakwerhu, ndza swi tiva leswaku n’wina ni tihosi ta n’wina, mi endlile swilo sweswo hi ku pfumala vutivi, 18 kambe hi mukhuva wolowo, Xikwembu xi endlile leswaku ku hetiseka leswi xi nga swi tivisa khale hi milomo ya vaprofeta hinkwavo; Hileswaku Mesiya wa xona a a ta twisiwa ku vaviseka. 19 “Loko swi ri tano, hundzukani, mi tlhelela eka Xikwembu, leswaku swidyoho swa n’wina swi rivaleriwa, 20 ni leswaku minkarhi yo phyophya leyi humaka eHosini yi sungula, ni leswaku Hosi yi mi rhumelela Yesu, yena loyi a nga vekiwa ku va Mesiya wa n’wina; 21 u fanele ku tshama etilweni, ku ko ku fika minkarhi ya ku pfuxetiwa ka swilo hinkwaswo, leyi Xikwembu xi nga yi vula ni khale, hi milomo ya vaprofeta va xona lavo hlawuleka. 22 Hakunene Muxe u vurile, a ku: ‘Hosi Xikwembu xa n’wina xi ta mi humesela muprofeta la fanaka na mina, a huma exikarhi ka va ka n’wina; mi ta n’wi yingisa eka hinkwaswo leswi a nga ta mi byela swona. 23 Kutani un’wana ni un’wana loyi a nga yingisiki muprofeta yoloyi, u ta susiwa etikweni.”

24 Naswona, vaprofeta hinkwavo lava nga vulavula ku sukela eka Samiele ni ka lava teke endzhaku ka yena, na vona va tivisile ta masiku lawa. 25  Hi n’wina valandzeri va vaprofeta, hi n’wina va ntwanano lowu Xikwembu xi nga wu endla ni vatata wa n’wina, loko xi te eka Abrahama: ‘Hi vatukulu va wena, ndzi ta katekisa tinxaka hinkwato ta misava.’ 26  Loko Xikwembu xi rhumerile nandza wa xona, xi n’wi humesile hi le ka n’wina eku sunguleni leswaku a mi katekisa hi ku hundzuluxa un’wana ni un’wana wa n’wina emikhuveni ya yena leyo biha.”

A vakriste lava a va ri Vayuda, a va nga tshikanga madzunisele ya vona ya ntumbuluko. Petro na Yohane, va ye eTempeleni ni nhlikanhi tani hi ntoloveto kuya khongela. Navona tanhi hi vapfumeri va xiyuda, a va fanele va tamela macheleni nyana ku ya nyikela, kambe loko Moya wu take Vakriste, va ti kume va famba ehenhla ka ntoto wa Xikwembu, va sungule ku nyika tani hi laha Xikwembu xi nyikeke hikona. A va ri ni xinakulobye ni Xikwembu, naswona a va lulamile ku tirhisiwa hi Xikwembu nkarhi wun’wana ni wun’wana.

A nyangwa leyo “Saseka” a wu ri wona lowukulu wo nghena hi wona eTempeleni, kutani xigono lexi a xi tihlawulele ndzawu ya kahle leswaku xi ta kombelela eka yona. A  Vayuda a va swi nyika risima ku nyika swigono, kutani nkarhi un’wana a a kuma male yo tala siku na siku. Kambe a xivilelo xa yena entiyisweni a ku nga ri mali, a a lava ku famba,  hikuva a ve xigono kusukela loko a twariwile, swi nga endleka a va n’wi tlakula loko a lava ku ya endzhawini yo karhi.

Loko a komberile Petro na Yohane, vona, va lo n’wi honolela, hikwalaho ka yini? Naswona va n’wi kombele leswaku a va languta. A a nga langutelanga ku hanyisiwa hi vona, naswona a a nga va kombelanga swona. Ko tala Yesu a hanyise lava nga n’wi kombela. Ni tshemba leswaku a va le ku yingiseni ka Xikwembu leswaku hakunene xi lava ku n’wi hanyisa ke? Loko Petro a kume nhlamulo, a vule marito ya ripfumelo, a khoma voko ra xinene ra xigono a xi pfuxa xi yima. Hi ku tsopeta ka tihlo a milenge ya yena a yi lulamile, kutani a sungula ku famba a tlula-tlula a dzunisa Xikwembu a ri karhi a tsunyeta Petro na Yohane.

A mahlori lawa, ma tshinete ntsungu wa vanhu hi xihantlha. Kutani Petro loko a vona ntlalo wa vanhu a sungula ku chumayela Evhangeli. A nkondzo ya yena a yi fana ni leyi a yi chumayeleke hi siku ra Pentekosta, a hlamusela leswaku a ku ri Xikwembu xa vona, Xikwembu xa lava a va n’wi yingisela, Xikwembu xa Abrahama, na Isaka, na Yakobo lexi endleke mahlori lawaya leswaku ku dzunisiwa N’wana wa xona, Yesu loyi xi n’wi rhumeke eka vona, kambe va n’wi vamba. Vhesi 16:

Hikokwalaho, leswi tiyiseke munhu loyi mi n’wi tivaka ni ku n’wi vona, i vito ra Yesu ni ku pfumela eka vito leri; kutani ku pfumela loku, ku hanyise munhu loyi hakunene, hi matimba ya Yesu, hilaha mi swi vonaka hakonan’wina hinkwenu.”

Kutani Petro a olovisa nyana nadzu wa vona, hi ku va nyika ku langutela, a vula leswaku va n’wi vambe hi ku kala va nga swi tivi, kambe a va khutaza leswaku va hundzuka, vhesi 19:

“Loko swi ri tano, hundzukani, mi tlhelela eka Xikwembu, leswaku swidyoho swa n’wina swi rivaleriwa”  

Mi ta tsundzuka leswaku Yesu a vule leswaku a nga telanga ku ta ta lovisa vanhu, kambe ku va ponisa. A tinxumayelo ta hina ti fanele ti va tano. Loko ha ha tamerile a nawu wa Xikwembu leswaku vanhu va ti vona nandzu, hi fanele minkarhi hinkwayo hi tamerile naswona rito ra Xikwembu ra tintswalo eka lerin’wana voko. Hi nga tsakeleni leswaku vanhu va tsutsuma Xikwembu hi ku chava milandzu ya vona, kambe a hi chumayeleni leswaku vanhu va tsutsumela eka Xikwembu leswaku va ta ya kuma tintswalo.

Loko Petro na Yohane va ha vulavula ni vanhu, ku fika vaprista, va ri ni ndhuna ya Tempele ni Vasaduki; 2 a va vilela hikuva vaapostola a va dyondzisa vanhu ni ku vula ta ku pfuka ka vafi hikwalaho ka ku pfuka ka Yesu eku feni. 3 Hiloko va va khoma, kutani leswi a ri perile, va va pfalela ekhotsweni ri ko ri xa. 4 Hambiswiritano, lavo tala exikarhi ka lava tweke Rito, va pfumela. Nhlayo ya vavanuna enkarhini wolowo a yi lava ku fika eka 5 000.

5. Sweswi hi hlaya eka 4:5-22:

Loko ri xa, tihosi ta Vayuda ni vakulukumba ni vatsari va hlengeletana eYerusalema; 6 a va ri na Anasi Muprista lonkulu, na Kayafasi, na Yohane, na Aleksandro, ni hnkwavo va rixaka ra vaprista lavakulu. 7 kuteloko va yimisile vaapostola ehubyeni, va va vutisa va ku: “ Mi endlile swilo leswi hi matimba wahi kumbe hi vito ra mani xana, n’wina vanhu ndzin’wina?” 8 Kavaloko Petro a tala hi Moya lowo Kwetsima, a ku ka vona: “Tihosi na n’wina vakulukumba va tiko! 9 Leswi hi vutisiwaka namuntlha hi mhaka leyinene leyi endliweke eka munhu lowa xilema loyi, ni ku vutisiwa hi lexi nga n’wi hanyisa, 10 swi tiveni n’wina hinkwenu, ni tiko hinkwaro ra Israele a ri swi tive: Munhu loyi a yimeke emahlweni ka n’wina a ololokile, u hanyisiwile hi viro ra Yesu Kriste wa Nazareta, yena loyi mi nga n’wi vamba exihambanweni, loyi Xikwembu xi n’wi pfuxeke eku feni. 11 Hi yena la nga ribye leri n’wina vaaki mi nga ri nyenya, leri kambe ri endliweke ribye lerikulu ra yinhla.’ 12 “Kutani kuponisiwa a ku kumeki eka munhu un’wana, hikuva vanhu a va nyikiwanga vito  rin’wana laha misaveni, ehandle ka vito ra ra Yesu, leri hi fanelaka ku ponisiwa ha rona.”

13 Loko va vona ku tiya ka Petro na Yohane, va hlamala, hikuva va va tiva va ri vanhu ntsena, lava ni ku dyondza va nga dyondzangiki; kambe va swi vonile leswaku hileswi a va ri va khale va Yesu. 14 Kutani loko va vona  munhu la hanyisiweke a yimile kwalaho na vona, va pfumala lexi va nga xi kanetaka. 15 Kuteloko va va lerisile ku huma ehubyeni ya Sanedri, va vutisana, va ku: 16 “Xana hi ta endla yini hi vanhu lava xana, hikuva swi tiveka hinkwako eYerusalema leswaku hi vona va endleke mahlori lama kulu lawa; a hi koti ku swi kaneta. 17 kambe ku endlela leswaku timhaka leti ti nga yi emahlweni ti hangalaka evanhwini, a yi va layeni hi va chavisa, leswaku va nga ha tshami va vulavula hi vito rero, hambi ku ri ka mani na mani.”

18 Kuteloko va va vitanile, va va lerisa leswaku va nga ha tshuki va vulavula hi vito ra Yesu, hambi ku ri ku dyondzisa ha rona. 19 Kambe Petro na Yohane va va hlamula, va ku: “A ku avanyise n’wina: Xana swi lulamile emahlweni ka Xikwembu ku yingisa n’wina ku tlula xona xana? 20 Loko hi ri hina, hi nga ka hi nga koti ku tshika ku vulavula leswi hi swi voneke ni leswi hi swi tweke.”

21 Hiloko va huvo va va ntshunxa, va ri karhi va va laya ni ku va chavisa; a va nga voni hi laha va nga va baka hakona, hikuva vanhu hinkwavo a va dzunisa Xikwembu hikwalaho ka leswi humeleleke; 22 naswona munhu loyi mahlori ya ku hanyisiwa ma endliweke eka yena, a a ri wa malembe lama tlulaka 40.

A chumayelo ya Petro swin’we ni mahlori, swi endle mahlori ya ku hundzula mahika man’wana ya 2000, kutani a Kereke ya Vakriste va le Yerusalema a yi ri ni nhlayo leyi ringanaka 5000 wa va pfumeri.

Hinkwako lomu a Evhangeli yi chumayeriwaka hi matimba, a ncila wa sathana wu sungula ku tshwa kutani a sungula ku endla hasa-hasa. A vaprista ni vasaduki va yi twile vhangeli ya ndzilo, loko va fikile va n’wi twile Petro loko a ha chumayela. A vasaduki a va hlundzuke ngopfu hikuva a va nga pfumeri eka leswi va swi tweke, hikuva a va nga kholwi hi ta ku pfuka ka vafi, kambe hiswona leswi Petro a a xumayela hi swona, a huwelela leswaku Yesu a pfukile exikarhi ka vafi.

Kutani, hi siku leri landzelaka, a huvo ya Sanedri, yi hlangana hi matimba lamakulu, yi rhangeriwe hi Muprista lonkulu Kayafasi. Kutani va va vutisa leswaku, va hanyise munhu loyi wa xilema hi matimba ni vito rihi. Petro loko a tatiwile hi Moya lowo Kwetsima, a a nga ha ri yena loyi wa toya, loyi a landzuleke Yesu hi ku chava, kambe a vulavula hi xivindzi lexikulu, a ku leswi swi endliwile hi vito ra Yesu loyi vona va n’wi vambeke, kambe Xikwembu xi n’wi pfuxile eku feni, kutani wanuna loyi a a ri xilema a a yimile emahlweni ka vona.

Na ku kombela hlayisa marito ya Petro eka ndzimana ya 12:

“Kutani kuponisiwa a ku kumeki eka munhu un’wana, hikuva vanhu a va nyikiwanga vito  rin’wana laha misaveni, ehandle ka vito ra ra Yesu, leri hi fanelaka ku ponisiwa ha rona.”

A huvo a yi nga ha tivi lexi yi nga ta xi endla. Lexi va hlamariseke, hileswaku va tive Petro na Yohane va ri vanhu ntsena, vo kala xiyimo ni ku dyondzeka, a va nga swi koti hambi ku vulavula kahle, xin’wana a va nga koti ku kaneta leswaku a mahlori lawaya ni swikombiso leswiya, swi endliwile hi vona. A va va tiva tani hi va landzeri va Yesu kutani va tsundzuka leswaku a kinga leyi ya Yesu a yi helanga, va chava leswaku magidigidi ya vanhu va ta hundzuka valandzeri va Yesu, loyi va n’wi vambeke loyi Petro na Yohane va ngo wa hanya. Loko va tsandzeka ku va avanyisa, va tsema mhaka hi ku va laya va ku: mi nga ha vulavula ni ku dyondzisa hi vito ra Yesu.

Laha a ku hetiseka marito ya Petro, loko a te: “Xikwembu xi tihlawulele swihuguki, leswo tsana, leswaku swi khomisa tingana leswa matimba.

1. Loko u pfumela ku va mulandzeri wa Kriste ku fana na Petro na Yohane, u ta ambexiwa matimba yo susa nchavo.
2. A ku nga tava matimba ya wena yo tihlamulela emahlweni ka vakaneti va evhangeli, kambe ku tava matimba ya Moya lowo Kwetsima.
3. U nga vileri lomu unga ta makuma kona marito ya ku hlamula swivutiso hinkwaswo swa tintivi ta misava leyi, wena veka mahlo ya wena eka Yesu Kriste, a tinvi ya tintivi ni Hosi ya tihosi hinkwato, u ta ku nyika yo antswa.

Twana marito ya Petro hi ku vula ka tindzimana ta 19 ni 20:

Kambe Petro na Yohane va va hlamula, va ku: “A ku avanyise n’wina: Xana swi lulamile emahlweni ka Xikwembu ku yingisa n’wina ku tlula xona xana? 20 Loko hi ri hina, hi nga ka hi nga koti ku tshika ku vulavula leswi hi swi voneke ni leswi hi swi tweke.”

6.  Sweswi hi hlaya eka tindzimana ta 23-31:

Kuteloko Petro na Yohane va ntshunxiwile, va tlhelela eka vanakulobye, kutani va va tivisa hinkwaswo leswi vaprista lavakulu ni vakulukumba va nga va byela swona. 24 Loko vona va swi twile, va huwelela eka Xikwembu hi ku khongela va ri mbilu yin’we, va ku: “N’wini wa hina, wena la endleke tilo ni misava ni malwandle, ni hinkwaswo leswi nga ka swona! 25 U vurile hi Moya lowo Kwetsima, hi nomo wa tata wa hina Davida nandza wa wena, u ku: ‘Xana vamatiko va karihela-karihela yini, ni matiko ma bohela yini makungu ya hava xana? 26 Tihosi ta misava ti pfukile, ni vafumi va matiko va twananile ku lwa na Hosi Mesiya wa vona.’ 27 “ Hikuva kunene Heroda, na Pontiyo Pilato, ni vamatiko, ni tinxaka ta Israele, va hlangane kun’we emuntini lowu ku lwa swin’we na Yesu nandza wa wena la hlawulekeke, loyi u nga n’wi endla Mesiya; 28 va hlangene ku endla hinkwaswo leswi u swi boheke khale, hi ntamu wa wena ni makungu ya wena, leswaku swi ta humelela. 29 Sweswi ke Hosi, languta ku tshukisa ka vona, u nyika malandza ya wena ku vula rito ra wena va tiyile va nga chavi nchumu; 30 tshambuluta voko ra wena ku horisa, u endla leswaku mahlori ni swihlamariso swi va kona hi vito ra Yesu, nandza wa wena la hlawulekeke.” 31 Kuteloko va hetile ku khongela, xivandla lexi va hlengeletaneke ka xona xi tsekatseka, hinkwavo va tala hi Moya lowo Kwetsima, kutani va vula rito ra Xikwembu va tiyile.

Lana hi hlayeke kona, hi kume leswi:

1. Va tlhelele eka vanakulobye va ya kombela ku seketeriwa.
2. Va dzunise Xikwembu kutani xi va tiyisa hi matimba ya xona
3. A va yi tiva a Testamente leya khale ni leswi a yi vula swona kutani va sungule ku profeta
4. Va ve mbilu yin’we eku khongeleni va ko va hlula matimba ya munyama.
5. Xikwembu xi hlamurile xikhongelo xa vona hi ku tsekatsekisa yindlo leyi a va hlangane eka yona, xi va tata hi Moya lowo Kwetsima, kutani va tala xivindzi xo ya emahlweni va ya xumayela evhangeli.

Eka leswi hi dyondza leswi landzelaka:

• Hlangana ni van’wana leswaku mi ta seketelana eka ntirho wa Hosi.
• A ku dzunisa Xikwembu swa nyika matimba yo ya emahlweni.
• A ku tiva matsalwa i khiya ra ku kaneta ni ku hlula matimba ya sathana.
• A ku hlula nyimpi ya vukaneti bya Sathana, swi huma evun’weni ni mbilu yin’we
• A hlamulo ya xikwembu yi ta loko u khongela ku ya hi ku rhandza ka xona.

7. A Xikwembu xa vona i Xikwembu xa hina, Haleluya, na hina a hi yeni emahlweni, hi tirha ku kota Petro na Paulo.

//////////

To copy (DOWNLOAD) tap: Ku khomiwa ka Petro