2009-09-10
01. A dyondzo ya hina leyi hundzeke a yi vulavula hi ntirho wa Mupostolo Petro ni mahlori lawa a ma endleke eka Eniyasi ni wansati loyi a vitaniwaka Tabita/ Dorkasi ni ku dyondzisa ka yena evhangeli eka wanuna wa mutaliyana loyi a a vitaniwa Korneliyo.
02. A dyondzo leyi yi vulavula hi ta ntirho wa Moya lowo Kwetsima ni riendzo ro sungula ra Pawulo na Barnaba a Antiyoka.
03. Swilo swimbirhi swa nkoka swa tikomba eka dyondzo leyi. A xo sungula u ta vona leswaku eka kuavanyisa ku sungula eka buku ya Mintirho, a Moya lowo Kwetsima hi vatirhi va xona vo hambana-hambana, wu tirhile exikarhi ka Vayuda, ku nga vanhu lava Xikwembu xi tihlawuleleke vona, a vatukulu va Abrahama ni ku tsongo eka Vaisraele lava lahlekeke ku fana ni Va-Samariya, ni le ka ndhuna ya Mutiyopiya na le ka Korneliyo ni ndyangu wa yena swin’we ni vangana. Loko hi hlaya ku avanyisa ka 13, hambi leswi a tintswalo ta Xikwembu a ta ha tikombisa eka Vayuda, kambe a xikongomelo xa wona a xiya xi suka, xi kongoma eka vamatiko.
04. A xa vumbirhi hi leswaku a 12 wa swiahluko, swi vulavula hi ntirho wa Petro, ni ku vitaniwa ka Sawulo a va Pawulo, kasi 14 kuya fika 28 yi vulavula hi ntirho wa Pawulo tani hi xibya eka vamatiko. Lana hi kuma leswaku Petro a ve Muapostolo wa Vayuda kasi Pawulo a ve wa vamatiko.
05. A hi hlayeni ku suka eka Mintirho 11:19-26:
Loko va ri lava a va hangalasiwile hi ku xanisiwa loku nga humelela enkarhini wa ku dlayiwa ka Stefano, va hundzele emahlweni ku ya fika efinikiya, ni le Kipra, ni le Antiyoka, va ri karhi va dyondzisa rito eka Vayuda ntsena. 20 Kambe van’wana va vona, va nga vavanuna lava humeke eKipra ni le Kirena, loko va fike le Antiyoka, va vula rito ni le ka Vagriki, va va tivisa Evhangeli ya Hosi Yesu. 21 Matimba ya Hosi a ma ri na vona; kutani vanhu lavo tala va pfumela, va hundzukela ka Hosi. 22 Kuteloko mahungu ya timhaka teto ma ya fika etindleveni ta kereke ya le Yerusalema, ku rhumiwa Barnaba leswaku a ya eAntiyoka. 23 Loko a fika kona, ni loko a vona leswi tintswalo ta Xikwembu ti tirheke swona, a tsaka; kutani a va khongotela hinkwavo ku namarhela Hosi ni ku yi chivirikela hi mbilu. 25 Kava loko Barnaba a ya eya eTarso ku ya lava Sawulo. 26 Kuteloko a n’wi kumile, a vuya na yena eAntiyoka. Va hlengeletana ni kereke lembe hinkwaro, va ri karhi va dyondzisa ntshungu lowukulu. Emutini wa Antiyoka, hi kona laha vadyondzisiwa va nga sungula ku vuriwa Vakriste kona.
06. Lana hi vuna leswaku a va pfumeri lava hangalasiweke va suka eYerusalema ni hi laha van’wana va vona va kongomeke emutini wa Antiyoka, en’walungu (Norte) ka Palestina, va vula Evhangeli eka Vagriki, kumbe eka Vayuda lava a va vulavula Xigriki. Kutani a nhlayo leyi kulu ya vapfumeri yi vekile ku tshemba ka yona eka Yesu, kutani ku sunguriwa kereke kona. Loko va ri karhi va amukela a mahungu lawa ya ntsaku, a kereke ya le Yerusalema, yi rhumele Barnaba ku ya va pfuna. Loko Barnaba a vone ku kula ka ntirho ni hi laha Xikwembu a xi tikombisa hikona, a tala hi ku hlamala hi ku vona xilaveko xa tidyondzo to enta eka vapfumeri lavantshwa, kutani a vona leswaku yena yexe a nge swi koti. I mani loyi a a tava mutirhisani wa yena xana? A a vilela munhu loyi a a ri ni ku twisisa ko enta hi matsalwa ni ku twisisa makungu lawa Xikwembu xi nga na wona ya ku hundzula vanhu va misava hinkwayo, ku nga ri Vayuda ntsena ku sukela eku sunguleni. A vapostola ni varhangeri lavan’wana, a va nga dyondzisi ku vilela loko enta ka Xikwembu eka vamatiko, hikokwalaho, Barnaba a nga tlhlelelanga eka vona ku ya kombela ku pfuniwa. Hi ku pfuniwa hi Moya lowo Kwetsima, a miehleketo ya yena yi tsundzuke Pawulo, hikokwalaho a ye eTarso ku ya n’wi lavetela leswakua a ta kombela ku ta ta n’wi pfuna.
07. U ta tsundzuka leswaku Pawulo a a vitaniwa leswaku i Sawulo, a hundzuriwe hi mahlori lama kulu, loko a ri endleleni yo ya eDamaska yi Hosi Yesu hi byakwe, a vulavula na yena hi rito leri twalaka empfhukeni. Loko hi hlaya tindzimana tin’wana eka Va-Galatiya 1:17, hi kuma leswaku hambi loko a vula vumbhoni hi xivindzi lexi kulu eka vanhu, ni leswaku vanhu hinkwavo va vona ripfumelo ra yena lerintshwa, a nga tekelanga ku nghena entirhweni, kambe a ve ku dyondzisiweni hi mpfhuka wo ringana malembe 3. kambe a a ri munhu loyi a a dyondzekile swinene, loyi loko a nga se ponisiwa a dyondzisiweke a matsalwa ya Tetamente leya khale hi mudyondzisis Gamaliyele. Kutani loko a hlangane na Yesu, ni le nkarhini wa yena wa ku dyondzisiwa ta ripfumelo ra yena lerintshwa, Pawulo a fananise tidyondzo leti a ti amukeleke mayelano na Yesu Kriste ni leti a tidyondzeke mayelano ni nawu wa Muxe ni vaprofeta, kutani a tsumbula leswaku hinkwato ti komba eka munhu un’we ku nga Kriste. A ku hlavuteriwa loku hi Moya lowo Kwetsima, ka yena ku teke nkarhi, hikuva a a fanela ku tirhisa miehleketo ku ringanisa ni mbilu ya yena ku ti kholwa. Ku fana na Petro, a a fanele ku hlula ku nonon’hwa ni ku tsuvula timintso ta ku hlamusela matsalwa hi ndlela yo biha embilwini ya yena, ku nga ku khomelela enawini ni ku endla Xikwembu xihlawula nhlonge. Kutani a fika eku twisiseni ka ku nandzika ka tintswalo ni ku leha ka tona, ku nga ri ntsena eka Vayuda, kambe ne ka vamatiko. Ekuheteleleni, Xikwembu lexi tivaka ku enta ka miehleketo ya vana va xona, xi pfumelele Pawulo leswaku leswaku a nghena etirhweni wa Evhangeli evutomi bya yena hinkwabyo. Kutani loko nakulobye wa yena Barnaba a te eka yena ku ta ta n’wi kombela ku ya n’wi pfuna ntirho eAntiyoka, a swi tivile Barnaba leswaku Pawulo a a vitaniwile ni ku lulamisiwa hi Xikwembu ku ya endla ntirho eAntiyoka.
08. Barnaba na Pawulo va twananile ku vumba ntlawa wo hlamarisa swinene, kutani va tirhe swin’we lembe hinkwaro, va ri karhi va dyondzisia nhlayo yo tala ya vapfumeri edyondzo ya Kriste. Hi ndlela leyi, Pawulo a kume ndlela yintshwa ya ku dyondzisa hi ku endla, a ri karhi a hlamula swivutiso swa vapfumeri lavantshwa, a ri karhi a pfuna lava a va ri ni swivilelo etimbilwini ta vona, a rhangela tinhlengeletano letintshwa ti ko ti kula ni ku veka varhangeri lava nga swi kotaka ku tekelela yena. Leri a ri ri lembe ro wupfusa Pawulo ku ya entirhweni wa Hosi malembe lama saleke ya vutomi bya yena.
09. Tiva leswaku a kuva wena na mina hi vitaniwa Vakriste, swi sungule ekerekeni ya le Antiyoka. Loko va nga se vitaniwa Vakriste, a va tiviwa hi leswaku: “ Valandzeri va ndlela”, kambe a vito leri a ro va vito ro kala nhlamuselo, a yi ri ndlela yo ya kwihi? A nhlamulo a yi ri leyo: “Hina hi va landzeri va ndlela ya Kriste. Hikuva Kriste a hanyaka endzeni ka hina, hikokwalaho hi Vakriste.
10. A hi yeni emahlweni hi hlaya eka Mintirho 13:1-3:
Ekerekeni ya le Antyoka, a ku ri ni vaprofeta ni vadyondzisi van’wana, va nga Barnaba, Simioni loyi a va ku i Nigere, na Lukiyo wa Kirena, na Manaheme loyi a nga kula swin’we na hosi Heroda, na Sawulo. 2 Loko va ri karhi va titsona swakudya va gandzela Hosi, Moya lowo Kwetsima wu ku: “Ndzi hlawuleleni Barnaba na Sawulo, va ya entirhweni lowu ndzi va vitaneleke wona.” 3 Kutani loko va titsonile swakudya ni loko va khongerile, va va dlandleka mavoko, kutani va va pfulela tindlela.
11. A kereke leyi a yi katekisiwile hi mune wa vavanuna lava a va tirhisiwa hi matimba ya Xikwembu. A va ri vamani? A wo sungula a ku ri Barnaba Muyuda, loyi a a huma eYerusalema, loyi hi dyondzeke hi ta yena eka ku avanyisa ka 11:24, a a ri munhu wa kahle, loyi a a tele Moya lowo Kwetsima ni ripfumelo. A wa vumbirhi a ku ri Simiyoni, wanuna wa ntima, swi nga endleka a huma Nigeria. A wa vunharhu a ku ri Lucio wa Kirena kasi a wa vunharhu a ku ri Sawulo loyi a vitaniwaka Pawulo, loyi a a ri Mufarisi wa le Tarso, wanuna loyi a vumbhoni bya ku hundzuka ka yena minkarhi hinkwayo byi khumba timbilu ni miehleketo ya lavo tala. A mintirho ya vona a yi hlamarisa ni ku koka timbilu ta lavo tala lava a va ta ku ta ta xava ni ku tshama etikweni leriya ra bindzu ( ponto Comercial).
12. A vavanuna lava, a va le ntirhweni wa ku dyondzisa ni wa vuprofeta. Xana a mintirho leyi mbirhi yi hambanela kwihi naswona yi fana kwihi? Hosi Yesu Kriste a a vitaniwa leswaku i mudyondzisi. A mudyondzisi i munhu loyi a dyondzisaka vanhu leswi va nga swi tiviki, a va nyika ku twisisa leswi a va nga swi twisisi. A va dyondzisa ku tsala ni ku hlaya, a va hlamusela switoriya swo enta, a va komba ni lowu timhaka leti ti endlekeleke kona eka timapa ni masiku ya kona, a va dyondzisa ni ku konta/matimatica ni swin’wana. A kuva a endla leswi a a fanela kuva amukela tibuku to huma eka ndzawulo ya dyondzo eku sunguleni ka lembe, kutani a dyondzisa leswi nge ndzeni ka buku ya kona, pagina ni pagina kuya hi leswi a Curriculum yi nga xi swona, a nga foneri Ministro ya ndzawulo ya dyondzo mixo wun’wana ni wun’wana a n’wi vutisa, a ku: “Xana ni ta vadyondzisa yini vadyondzisiwa va mina namuntlha ke?”. Kutani hina Vakriste se hi amukerile a buku yo dyondzisa hi yona eka Hosi Yesu, i “Bibele” hi yona leyi fanelaka ku dyondzisisiwa eka kereke hi loyi a dondzsiweke hivan’wana na yena, a dyondzisa tiphedji hinkwato kumbe ku hlawula tibuku to karhi kumbe madotrina ku fana ni ripfumelo kumbe rirhandzu, kutani a hlamusela leswi buku yin’wana na yin’wana yi vulaka swona mayelano yi nhloko-mhaka yo karhi, kumbe a nga hlawula ku vulavula hi mahanyelo yo karhi, ku fana ni ya Abrahama, kutani eka yona a humesa dyondzo leyi khumbaka vutomi bya ximoya ( aplicação na vida espiritual), eku dyondziseni ka yena timhaka leti, a nga tisunguleri swa yena, kambe a dyondzisa ntsena leswi Bibele yi vulaka swona, ni aplicação ya kona yi va yi totiwile hi Moya lowo Kwetsima, kutani ya khumba timbilu hikuva yi huma eka Bibele. Kutani swi endla leswaku a vadyondzi va tikamba ni ku hundzuka eka leswo biha. Naswona a ntirho wa mudyondzisi a hi ku dyondzisa leswi endlekeke endzeni ka Bibele eka vadyondzi va yena ntsena, kambe ni ku aka dyondzo ya ximoya leyi nga ta khumba mimoya ya vona. A ku endla leswi, i ku teka mudyondzi u n’wi veka ematshan’wini ya munhu, kumbe mhaka yo karhi leyi humeleleke endzeni ka Bibele.
13. Kasi a Muprofeta a ni ntirho wo hambana ni wa mudyondzisi. Swi languteka onge swa fana eku sunguleni ni ku dyondzisa kambe swi hambanile hi tinyiko ta kona ( I Kor 12:10), ni ya vuprofeta leyi nga yin’wana ya tinyiko eka ntlhanu wa ma Ministerio lama xaxametimeke eka I Kor 12:28. ko tala munhu loyi a talaka ku tirhisa nyiko leyi ya vuprofeta, a marito ya yena ma kamberiwa endzeni ka kereke ku vona leswaku ma huma eka Xikwembu kumbe e-e, kutani loku ku ri ntiyiso, hi nkarhi lowu fanelaka i wa hlawuriwa a va a khongeleriwa eka ntirho lowu Xikwembu xi n’wi hlawuleleke wona.
14. Kambe ke, he wahi marito ya vuprofeta? A hi tlheleni hi teka xikombiso xa mudyondzisi wa xikolo. A hi swi tekeni ku loko mudyondzisi a ri karhi a dyondzisa física, kutani a director o ghena enyangweni, a yimisa mudyondzisi eku dyondziseni ka yena, kutani a ku eka vadyondzi: “Na ha ku amukela a fone yo huma eka Ministro, i vula leswaku mundzuku i feriado a ku dyondziwi”. A xitiviso lexi a xi yelani ni Curriculum ya dyondzo, kambe xi huma eka Hosi leyikulu ya ndzawulo ya dyondzo. A rito ra vuprofeta ri fana swinene ni xitiviso. A marito ya vuprofeta kumbe miehleketo, i marito kumbe miehleketo leyi huma eka Xikwembu ma ta eka muprofeta. A marito lawa ma nga ta hi norho, kumbe ku ma twa hi ripfalo ti nga tindleve ta moya, kumbe ku tekeriwa emoyeni a vona ni ku twa leswi Xikwembu xi vulaka swona eka munhu wo karhi hi xifaniso xo karhi. Xikwembu xi tirhisa swifaniso swo tala ku swi tisa eka muprofeta xi tlhela xi n’wi nyika tinhlavutelo ta kona, swa endleka leswaku Hosi yi tikombisa hi xivirhi xa yona eka muprofeta. Swi nga humelela loko a le ku hlayeni ka rito, kumbe eku yingiseleni ka risimu, kumbe eku fambeni endleleni a vona xiyimo xo karhi, nsinya, ntshava, nkova, nambu, marhefu, switarata ni swin’wana kuve a a le ku vulavuleni hi munhu wo karhi, kumbe ku famba swin’we na yena. A marito ya vuprofeta ma ni negativo ni posetivo eka loyi ma kongomaka eka yena.
A muprofeta i n’wamahungu ya Xikwembu, a kuma hungu ro huma eka Xikwembu, kutani a ri kongomisa eka munhu. A Mudyondzisi a ri: “Yindgisa ntiyiso leyi tsariweke eritweni ra Xikwembu, kasi a muprofeta a ri yingisa rito leri humaka eka Xikwembu sweswi”.
15. Xana ma nga va ma tshamise kuyini marito ya muprota? A nga vula leswi: “Xikwembu xi ri xi le ku vuyiseni ka mpfula yo tala etikweni ra ka Gaza, leyi nga ta na malembe manharhu. Kambe endzhaku ka sweswo, ku ta va ni djandza rikulu, kutani xi mi tivisa leswaku enkarhini wa ndzalo mi fanele ku hlengeleta leswi mi nga tava mi swi pfunile enkarhini wa ndzalo, leswaku swi ta mi pfuna ekanrhini wa djandza.” Kutani lebyi i vutivi byo huma etilweni (conhecimentos sobrenatural) a ku na munhu loyi a nga swi kotaka ku vula swilo swo tani na swi nga se endleka. A xa vumbirhi hi leswaku, a wu nge yi kumi dyondzo leyi eBibeleni hikuva a ku na laha swi tsariweke kona leswaku etikweni ra ka Gaza ku ta na mpfula kva ni ndzalo kutani eku heteleleni ka malembe manharhu kuva ni djandza. Kambe Xikwembu xi humesa dyondzo leyi hi ntirho wa vuprofeta, ku nga ri hi ntirho wa ku dyondzisa.
16. Hi lexi xin’wana xikombiso: “Xikwembu xi nga vulavula ni kereke ya ka Gaza hi muprofeta loyi a humaka eNigeria kambe a nga tivi nchumu hi ta kereke leyi, kutani a ku: “ Xikwembu xi ri ku ni ku kwetlembetana ni mahlevo exikarhi ka vurhangeri bya kereke leyi, kutani Xikwembu xi ri lava nga vona va endli va swilo leswi va fanele ku tisola, ehandle ka swona xi vula leswaku xi ta tirhisana na vona ku vava.” Swi nga endleka muprofeta loyi a nga hlayi matsalwa lama fambelanaka na swona, kambe a hlaya man’wana lama vulavulaka hi minkateko ni rirhandzu ni ntwanano leswaku a vuyisela vuxaka bya vona ni Xikwembu ni ku tiyisa hungu ra xona. A nkondzo ya muchaka lowu yi vitaniwa ya vuprofeta.
17. Xana wa swi vona ku hambana ka nyiko ya ku dyondzisa ni ya vuprofeta xana? Naswona wa ri vona risima ra mintirho leyi ha yimbirhi xana? Naswona wa swi vona leswaku swa fanela leswaku a kereke ri va na tona tinyiko leti mbirhi endzeni ka rona, leswaku a mirhi wa Kriste wu ta akiwa ehenhla ka masungulo lamatiyeke xana? Xana ti kona tinyiko leti ekerekeni ya n’wina xana? Loko ti nga ri kona, khongela eka Hosi, hikuva hi yena munyiki wa tinyiko hinkwato letinene.
18. A hi yeni emahlweni ni dyondzo ya hina. Loko a ntlawa lowu wa varhangeri wa ha le ku titsoneni ni ku dzunisa Xikwembu, swilo swo karhi swa nkoka swi humelerile. Eka Testamente leya khale, a vaprofeta a va endla hi ku vutisa eka Xikwembu kutani va yimela nhlamulo, ko kala a va kombela muchayi a chaya, kutani loko a ri karhi a chaya, kutani muprofeta a a pfuleka xifuva, kutani a amukela hungu leri Xikwembu a xi lava ku ri khalutisa ri ya eka tiko ra xona. Ne ka masiku ya hina, a ku dzunisa ni ku gandzela Xikwembu hi swichaya-chaya ni hi tisimu, swi na vuyelo yo fana, yi nga ya ku pfula timbilu ta hina eka Xikwembu, kutani hi le ka wona nkarhi lowu a nyiko ya vuprofeta yi tirhaka hi wona. Ni loko hi le ku tistsoneni. Leswi hi swona swi humeleleke ekerekeni leriya ra le Antiyoka. Loko va le ku titsonene ni le ku dzuniseni, a Moya lowo Kwetsima wu vulavula eka un’wana kumbe van’wana va vaprofeta, wu ku: “Ndzi hlawuleleni Barnaba na Sawulo leswaku va ya entirhweni lowu ndzi va vitaneleke wona.” Swi languteka onge loko va tava va amukerile marito lawa ya eka Xikwembu, va ye emahlweni va khongela ku ko hinkwavo varhangeri va kuma mpfuletelo emimoyeni ya vona wo va khorwisa leswaku hakunene swi huma eka Xikwembu, kutani va hlamula hi ku yingisa Xikwembu, kutani va va tlhandleka mavoko ni ku va pfulela tindlela. Hambi leswi a marito ya vuprofeta ma nga kala ma nga hlamuseri leswi ntirho wa vona wu nga ta va xi swona, swi nga endleka ku ri ku eka minkarhi leyi hundzeke, a va ri ni ku navela ku yisa Evhangeli eka lava nga siki yi twa. Kutani a marito ya vuprofeta ma te tani hi xitiyiso xa ku nalela ka vona.
19. I vafundhisi vangani eka masiku lawa, lava akeke tinhlengeletano ta matimba to hantlisa ku kula, ti va ti tiyimisela ku khalutela kun’wana ku ya sungula tin’wana tikereke eka tindhawu ta le kule xana? Naswona i tikereke tingani leti nga pfumelelaka ku ntshunxa va-Risi va tona ni Va-vhangeli va ya laha Xikwembu xi va vitanaka ku ya kona xana?
20. A hi yeni emahlweni. Ku sukela la hi to khumba la na lahaya ngopfu-ngopfu eka vutomi ni ntirho wa Pawulo kutsongo eka buku ya Mintirho, kutani a hi nga vi ni vuxokoxoko bya hinkwaswo swiahluko swa 14. hi hlaya eka 13:4-12:
Vona ke hi ku rhumiwa hi Moya lowo Kwetsima, va ngirimela eSelukiya, va nghena engalaveni va pelela eKipra.
5 Loko va fikile eSalami, va twarisa rito ra Xikwembu emasinagogeni ya Vayuda. A Va ri na Yohane mupfuni wa vona. 6 Kuteloko va tsemakanyile xihlale hinkwaxo ku ya fika ePafo, va ya kuma mungoma un’wana, muprofeta wa ku hemba wa Muyuda; vito ra yena a va ku i Bariyesu; 7 a a tshama na Sergiyo Pawulo, muyimeri wa vuhosi, wanuna wo tlhariha, loyi a a vitanile Barnaba na Sawulo hikuva a lava ku twa rito ra Xikwembu. 8 Kambe va siveriwa hi munhu loyi wa mungoma, loyi vito ra yena rin’wana a va ku i Elima; a ringeta ku endla leswaku muyimeri wa vuhosi a nga pfumeri. 9 Kambe Sawulo a nga yena Pawulo, a tala Moya lowo Kwetsima, kutani a honokela mungoma loyi a ku: 10 “Wena n’wan Sathana, la taleke ku xisa hinkwako ni ku biha hinkwako, wena nala wa hinkwaswo leswi lulameke, xana u ta tshika rini ku hingakanya tindlela leto lulama ta Hosi ke? 11 Vona sweswi, voko ra Hosi ri le henhla ka wena, u ta fa mahlo, u heta masiku u nga ha voni nchumu.” Hi nomo lo, mungoma a tela hi riphume ni munyama, kutani a gunguruteka, a lava vanhu lava va nga n’wi fambisaka hi voko. 12 Loko muyimeri wa vuhosi a vona leswi humeleleke, a pfumela, a hlamarisiwa hi ta Hosi leti a dyondzisiweke tona.
21. A mhaka ya ku sungula ya risima lana hi leswaku a va nga fambi voxe eku vitaniweni ka vona, a va fambisiwa hi Moya lowo Kwetsima. Makungu ya Xikwembu ma hetisekile eka vona, a ku vanga ya vona makungu.
22. Loko va suke eAntiyoka, va kongome eSelukiya laha va khandziyeke engalava yo ya exihlaleni xa le Kipra xa le Lwandle ra mediteraniya. eSalami, swi nga endleka ku ri ndhawu yo sungula laha va xweke kona, ekerekeni ya Vayuda. Tani hikuva a masinagoga a ti ri tindhawu leti a va hlengeletana eka tona eku dyondza Testamente leya khale, Pawulo na Barnaba, va kongome kona ku ya twarisa Evhangeli emintini ni le swimintaneni.
23. Tiva leswaku va fambe ni djaha leri a va ku i Yohane. Yohane a a ri ntukulu wa Barnaba, kutani a va n’wi tekela ku va a ta va pfuna swin’wana. Hi fanele ku va ni tiyiso wo huma eka Xikwembu loko hi lava ku tirhisana ni munhu wo karhi entirhweni wa Hosi. Lota loyi Abrahama a n’wi teke loko a ya etikweni ra Kanana, a hundzuke ndzwalo ku tlula nkateko eka Abrahama.
24. Loko va suke eSalami, va ye etikweni rin’wana leri vitaniwaka Pafo, laha a ntirho wa vona wu endleke ntlhntlho eka tiko, laha ni muyimeri wa vuhosi bya va-Rhoma eka xihlale lexiya a vitaneke Pawulo na Barnaba leswaku va ta ta n’wi byela dyondzo leyintshwa. A a ri munhu wa kahle loyi a a le ku laveni ka ntiyiso lowu hlamuselaka ta vutomi.
25. Hambiswiritano, Sathana se a a lulamise khale muprofeta wa yena loyi a va ku i Bari-Yesu( leswi vulaka leswaku n’wana Yesu), kambe a a nga endli ntirho wa Krsite, a a ri nala wa yena, a a ri nyamusoro, loyi a a tiviwa leswaku i Elima, swi nga endleka a ke a endle mahlori ehubyeni ya vatirhi va Seriyo Pawulo va ko va kuma ntshikilelo wa yena. Loko Elima a twa Evhangeli, a endle xwavi endleleni ya hosi leswaku yi nga koti ku twa rito ra Hosi, yi huma enfun’wini wa munyama yi ngena eku vonakaleni. Barnaba a a ri munhu wo hola, loyi a a nga hantlisi ku hlundzuka, a a nga yitsakeri mpfilumpfilu. Kambe Pawulo a a nga chave ku tlotloma. Loko a vone leswaku a ku ri marito ya mutirhi wa Sathana ( Elima), a ko va ni ndlela yin’we leyi Pawulo a a fanele ku yi teka leswaku a kota ku hlula, ku nga ku nghena enyimpini ya moya. A xo sungula, a vulavule na a chavanyana, a n’wi byela leswaku Bari-yesu a a ri n’wana Sathana, loyi a taleke ku kanganyisa hinkwaku ni ku lwisa hinkwaswo leswi nga swa ntiyiso. Kutani a kuva a kota ku tiyisa marito ya yena Pawulo, a rhukane nyamusoro luya leswaku a fa mahlo. Hi nomo lo, a fa mahlo, kutani a sungula ku lava loyi a nga n’wi khomaka hi mavoko a n’wi komba ndlela. Ni tshemba leswaku vanhu hinkwavo a va le ku chaveni ka leswi va swi voneke, hambi ku n’wi khumba, va hleketa leswaku na vona va nga tluleriwa hi vukarhi bya Xikwembu. Loko Sergiyo a twe marito ya Pawulo ni ku vona leswi endlekeleke Bari-yesu, a sungule ku pfumela eka Yesu Kriste ni ku veka ku tshemba ka yena eka Xikwembu. Lana hi vona hi laha Pawulo a a fambisiwa hi kona hi Moya wa Xikwembu, ni xivindzi lexi a a ri na xona xo yimela ntiyiso. Kutani Xikwembu xi n’wi fungile leswaku a va xibya xa xona.
26. Sweswi a hi hlayeni eka Vhesi 13-16:
Pawulo ni lava a va ri na yena, va suka ePafo hi ngalava, va pelela le Perge, muti wa Pamfiliya. Kambe Yohane a hambana na vona, a tlhelela eYerusalema. 14 Loko va ri vona, va suka le Perge, va ya fika emutini wa Antiyoka wa Pisidiya; kutani va nghena esinagogeni hi siku ra Savata, va tshama hansi. 15Endzhaku ka loko ku hlayiwile tindzimana ta Nawu ni ta vaprofeta,vafambisi va sinagoga va va rhumela rito, va ku: “N’wina varikwerhu, loko mi ri ni rito ro khongotela vanhu, mi nga vulavula.” 16 Kwalaho Pawulo a suka a yima; kutani loko a va khwehletile hi voko, a ku: “Vavanuna va Israele, na n’wina lava chavaka Xikwembu, yingisani:
27. A xa ku sungula lexi hi vonaka, hi leswaku Barnaba a ve yena loyi a laveke Pawulo leswaku a ya n’wi pfuna ntirho wa le Antiyokiya, kambe sweswi hi vona Pawulo a ri yena loyi a rhangaka emahlweni, swi komba leswaku hikunene Xikwembu a xi ri ni makungu na yena .
28. A xa vumbirhi hi kuma leswaku va tlutele etikweni ra Perge emutini wa Pamfiliya.
29. A xa vunharhu, hi leswaku a ntshikilelo wu hundzuke wu va lowukulu eka Yohane. A a nga ha genti ku ya emahlweni ni tiendzo leti to nghena enyimpini ya munyama, leyi a yi rhangeriwa hi Sathana hi yexe, a nga ha amukelanga ku khutaziwa ka yena hi Barnaba na Pawulo, kutani a tlhelela eYerusalema.
30. Pawulo na Barnaba, hi vona leswaku va kongome edoropeni leri vitaniwaka Aniyoka, leri kumekaka etikweni ra Pesidiya, laha va yeke va ya pfuxela a sinagoga ra Vayuda, kutani va nyikiwa nkarhi wo khongotela vanhu hi rito ra 5 wa tibuku ta Muxe ni hi ta vaprofeta. Ni kwale, a ve Pawulo loyi a nga teka vurhangeri bya kuva xivulavuri.
31. A hi nga yi hlamuseri hi ku enta mhaka ya Yohane, hi to languta eka mbuyelo wa kona, hi hlaya eka tivhesi 42-52:
Loko Pawulo na Barnaba va huma esinagogeni, vanhu va va khongela ku ta nakambe hi siku ra Savata leri tlhandlamaka, va ta ta va dyondzisa timhaka teto. 43 Kuteloko nhlengeletano yi hangalakile, Pawulo na Barnaba va landziwa hi Vayuda lavo tala ni vamatiko lavo tala va vukhongeri, lava amukeriweke eXiyudeni; vaapostola va vulavula na vona, va va khongotela ku tiyisela etintswalweni ta Xikwembu. 44 Endzhaku ka vhiki, hi siku ra Savata, vanhu lavo tala va muti va hlengeletana ku yingisa rito ra Hosi. 45 Kambe loko Vayuda va vona mintshungu, va tala mavondzo, kutani va kaneta ni ku sandza leswi vuriwaka hi Pawulo. 46 Kambe Pwulo na Barnaba va hlamula va nga chavi nchumu, va ku: “A swi fanela leswaku rito ra Xikwembu ri byeriwa n’wina eku sunguleni; kambe leswi mi ri cukumetaka, ni leswi mi ti avanyisaka hi n’wexe, mi ku a mi faneriwi hi vutomi lebyi nga heriki, maswivo, hina hi hundzela eka vamatiko. 47 Hikuva Hosi yi hi lerisile leswi, yi te: ‘Ndzi ku vekile kuva ku vonakala eka vamatiko, ni ku va ndlela ya ku ponisiwa ematlhelweni hinkwawu ya misava.’” 48 Loko vamatiko va twa sweswo, va tsaka, va dzunisa Rito ra Hosi; kutani hinkwavo lava hlawuleriweke vutomi lebyi nga heriki, va pfumela. 49 Rito ra Hosi ri hangalaka etikweni hinkwaro. 50 Kambe Vayuda va hlohlotela vavasati lavo chaviseka va vukhongeri, ni vakulukumba va muti; va sungula ku xanisa Pawulo na Barnaba, kutani va va hlongola etikweni ra vona. 51 Kambe vona va phumunha ntshuri emilengeni ya vona, ku komba leswaku va hambana na vona, kutani va ya emutini a Ikoniya. 52 Loko va ri vadyondzisiwa, va tala hi ku tsaka ni Moya lowo Kwetsima.
32. A hi voneni dyondzo yo karhi lana. A ku vitaniwa ni ntirho wa vavanuna lava mbirhi, ku ve ni xipfuno xikulo hinkwaku lomu va hundzeke hi kona.
33. A xa vumbirhi, tiva leswaku lava a va fanele ku kuma nkateko lowu eku sunguleni,a va ri vanhu lava a va vitaniwa hi vito ra xona, va nga Vayuda. A va ri ni nkateko wo vekiwa eka ndhawu yo sungula eku tweni ka rito ra Xikwembu ro kutsula, kambe hi vona lava aleke hunge leri ra xihambano. Tiva nakambe leswaku a ku nonon’hwa hinkwaku lokuya, a ku endliwa hi vukwele lebyi a va ri na byona. Kutani va hlongola Pawulo na Barnaba. Kambe lexi va endleke xona Pawulo na Barnaba, kuve ku landza leswi Yesu a swi leriseke vadyondzisiwa va yena loko va nga amukeriwi emutini wo karhi, va phumune ntshuri va hundzela etikweni leri landzelaka.
34. A xa vunharhu, vona hi lava a vamatiko va tsakeke hi kona, hambi loko va boheke ku yima vhiki hinkwaro leswaku va ta kota ku twa rito ra Xikwembu ni tintswalo ta Hosi Yesu Kriste, ni hi ta vutomi lebyi nga heriki. Kutani leswi swi endle leswaku Pawulo na barnaba, hi ku pfuniwa hi Moya wa Xikwembu va yisa hungu ra ku ponisiwa eka vamatiko.
35. A xa vumune, hi kuma leswaku a vatirheli lavambirhi va Xikwembu, va suke va famba na va tarile hi ntsaku etimbilwini ta vona. Onge na wena u nga tatiwa hi Moya wa Xikwembu loko u ri karhi u endla ntirho wa xona.
36. Hi ku pfala, hlaya eka 14: 26-28, leyi yi hi byela hi laha Pawulo na Barnaba va tlheleleke Antiyoka laha va sukeleke kona hi ku rhumiwa hi va kulukumba va ya nyikela relatorio ra leswi Xikwembu xi swi endleke hi vona ni hi laha xi va pfuleleke hi kona swipfalo swo vula Evhangeli eka vamatiko.
Ka ha ri ni leswo tala, leswi hi fanelaka ku swi tiva hi Pawulo na Barnaba, kambe sweswi hi fike emakume. Tlhela u va kona eka dyondzo leyi taka. Xikwembu xi ku pfuna.
//////////
To copy (DOWNLOAD) tap: Riendzo ro sungula ra Pawulo