Ku hanyisiwa ka nandza wa ndhunha

LUKA 7:1-10

Hi le ku voneneni ka mahlori man’wani ya Yesu.
A hi rhangeni hi ku hlamusela leswi humeleleke hi ndlela ya kahle. A mahlori lawa ma hlamuseriwa ne ka Mat. 8:5-13 kutani leswi swa tiyisa mhaka leyi humeleleke. Loko hi hlaya eka tibuku hi timbirhi, swi vonaka na loyi wa ndhuna a rhume ntlawa wa vurhangeri bya Vayuda leswaku va ya kombela Yesu leswaku a ya ekaya ka hosi a ya hanyisa nandza wa yena loyi a a vabya. Yesu a twile xikombelo xa vona kutani a sungula ku teka goza ro ya emutini, kambe loko va ha ri endleleni, a hlangana ni ntlawa un’wana wa malandza ya ndhuna, lawa a ma rhumiwile hi yona, loko ma hlangana na Yesu ma vula leswaku a hambi a nga tikarhati hi kuya ekaya ka ndhuna, kambe loko a nga vula rito ra hi matimba ya yena a muvabyi a ta hanya. Kutani a ndhuna yi ta hi yoxe endzhaku ka malandza ya yena, a tlhela a phindha leswi nga vuriwa hi malandza ya yena eka Yesu. A wanuna wa risima loyi a a ri mutirheli wa tiko, murhangeri wa 100 wa masocha, wanuna wa matimba ni xiyimo xa le henhla loyi a xiximiwa hi tiko.
Naswona a a ri munhu wa vukhongeri byo enta. A a pfumela eka Xikwembu xa Israel, hambi leswi a a nga ri muisraele. A Moya lowo Kwetsima wu n’wi hlavutele ntiyiso wa matsalwa kutani a ma A twisisa leswaku i ntiyiso leswaku ku ni Xikwembu xin’we ntsena, kutani a tiyimisela ku xi tirhela, hambi leswi a a nga amukeriwi ku landza swileriso hinkwaswo swa vukhongeri bya xiyuda.
A a pfumerile leswaku i mihandzu ya mbewu ya Xikwembu. Ntalo ka varhangeri va tiko eka masiku lawa va tlanga hi swiyimo swa vona, ematshanwini ya ku tirhela vanhu, va le ku laveni leswi va nga vuyeriwaka hi swona eka xitshungu. Va yivela vanhu lava nga vekeriwa ku va tirhela ni ku va biyelela. Hikwalaho, ematshanwini ya leswaku vanhu va hlonipha maphorisa loko va hlangana na vona vo va chava. Kambe wanuna loyi wa Ndhuna, swa vonaka leswaku a a nga ri na yona mbilu yo lava ku vuyeriwa yena ntsena eka tiko, kambe a tirhise leswi a a ri na swona ku va akela kereke. A vanhu lava rhandzaka Xikwembu va swi rhandza ku phemelana ni van’wana leswi va nga na swona, kambe lava ma nkolo va endla hi matimba ku tihlengeletela leswi nga tava swa vona ntsena.
A ndhuna leyi a yi ngo rhandza vanhu va tiko ntsena, kambe ni malandza ya yona loko ma ni swikarhato, a yi endla hi matimba leswaku ma kuma nhlulelo, ku fana ni leswi humeleleke eka nadza loyi a a vabya, a kote ku hanya hi ku hentekeriwa hi murhangeri wa yena.
A nga pfumeri eka Xikwembu Tatana ntsena, kambe a a pfumela ni ka Yesu, N’wana wa Xikwembu loyi a teke misaveni hi xivumbeko xa munhu, leswaku a ta ta kutsula vanhu emahlomulweni. Kutani a a nga ti filhi, a a vula vumbhoni lebyi humaka eku enteni ka mbilu ya yena, naswona a a byi vula erivaleni, na a nga vileri leswaku vanhu va ri yini hi yena, twana leswi a swi vuleke; Ndhuna ya dzana yi hlamula yi ku: “Hosi a swi ndzi fanelanga leswaku wena u ta nghena endlwini ya mina, kambe vula rito ntsena, kutani nandza wa mina u ta hanya; hikuva mina ndzi nga munhu la fumiwaka hi van’wana, ndzi ni masocha ehansi ka mina; loko ndzi ku eka rin’wana ra wona: ‘Famba!’ ra famba; ni ka rin’wana, ‘Tana!’ ra ta; ni le ka nandza wa mina; ‘Endla leswo karhi’ wa swi endla.” (Mat. 8:8,9) Xana a vone Yesu tani hi N’wana wa Xikwembu ni Hosi ya matimba leyi nga ni vuswikoti bya ku lerisa mavabyi ma huma eka vanhu, ni leswaku va kuma vutomi lebyi va fanelaka. A a kholwa leswaku Yesu a ni matimba lama nge henhla ka miehleketo ni ku pima ka vanhu. Yesu a tirhise yena tani hi xikombiso, ku khomisa tingana Vayuda lava a va nwi landza. Yesu vule leswaku a nga se tshama a vona munhu wa ripfumelo ra matimba ro fana ni ra wanuna loyi wa ndhuna ya dzana A a ri ni ripfumelo rikulu ku tlula ni lava kuleleke exiyudeni.
Xana Yesu a endle yini? A hlamarisiwile hi ku vona ripfumelo rikulu eka muhedeni wo taniya. A a ri wanuna wa ntumbuluko wa vuhedeni kambe a veke ripfumelo ra yena eka Yesu N’wana wa Xikwembu!
I ntiyiso lowu swi nga kotekiki ku kanetiwa. Ntalo ka vanhu lava a va ri na Yesu a va ri ni masiku yo tala na va n’wi landza. Va fambe na yena hi milenge tindhawu to tala, ni ku vona mahlori yo tala lawa Yesu a ma endleke. Va n’wi vonile loko a pfula mahlo vanhu, lama feke, vanhu lava a va ri ni nhlokonho va basisiwa, hambi hi ntlhanu wa swinkwa ni tihlampfi timbirhi swi andzisiwa leswaku swi dyisa 5000 wa vanhu, hambi leswi va voneke mahlori lawaya hinkwawu, a ripfumelo ra vona a ra ha ri ritsongo. A vutomi bya vona a byi fana ni mathumbo ya mati lama ttatiwaka hi mati mixo ku ko ri pela, kambe, kambe loko va lava ku ka van’wa, va kuma leswaku a thumbo ri phanga, mati hambi yo nwisa vona vinyi a ma nga ri kona.
Xana a swi fani ni van’wana va hina? Ku na vo tala lava nghenaka tikereke, va fambe mpfhuka wo leha na Yesu, naswona va amukele tidyondzo to tala ta rito ra Xikwembu ku sukela ka Genesa kuya fika eka Nhlavutelo; swirho leswi dyondzeke mahlori hinkwawu lawa Yesu a ma endleke, naswona, vona vinyi va endlekeriwe hi mahlori evutonwini bya vona. Ko tala va khomiwe hi vuvabyi, kambe Yesu a va hanyisa. Loko va twa ndlala, Yesu a va humesele swakudya, ni loko va ri ni swivilelo swa mali, a a rhumela munhu kuya va pfuna. A phamele ripfumelo ra yena hi swikombiso swo tala swa tintswalo ta yena, hambiswiritano, a ka ha voneka vuphanga bya ripfumelo etimbilwini ta vona. Hikwalaho ka yini? Xana a timbilu ta vona a to kala ti nga se pfumela ku amukela, kumbe a va fana ni swibya swi boxekeke leswi nga kotiki ku hlayisa leswi cheriwaka endzeni ka swona, xana a vo va ni timbilu ta ku pfuta xana?
Yesu a hundzukela eka ndhuna ya dzana a ku ka yona: “Tlhelela ekaya! A ku endleki hi laha u pfumeleke hi kona” (Mat. 8:13). Yesu a nga vulanga leswaku: Ndza n’wi hanyisa nandza wa wena.” Kambe a te, a ku endliwi hi laha u pfumelaka hi kona.
Loko Yesu a nga ku eka hina: “A ku endleki hi laha mi pfumelaka hi kona”, xana hi nga amukela swo fika kwihi? Loko wo tikuma na wu hanya a ma-aldeia laha vanhu hinkwavo va kaka mati empopini un’we, kutani u ya eku keni ka mati hi xipunwana xa chani kutani a thumbo ra kona u tirhisa cikiri, xana unga muka ni mati yo ringana? E-e, kambe loko wo teka thumbo ri kulu, a wu ta muka ekaya ni mati yo ringana swilaveko va vandyangu hinkwawu. Xana hi langutela yi eka Xikwembu? Leswi hi langutelaka swona hi leswi hi nga ta kuma amukela swona.
A hi fikeni makumu ka dyondzo leyi. A ndhuna ya dzana yi pfumerile leswaku Yesu a nga swi kota ku hanyisa nandza wa yona, kutani loko a fike ekaya, a kume hakelo ya ripfumelo ra yena, a nga khomisiwanga tingana.

//////////