Ku hundzuka ka nghohe ya Yesu - M2819 Bible Studies

LUKA 9:28-36:

Lexi i xiahluko xa ku kala swinene xa matsalwa eka tievhangeli, ma vulavula hi ku tlakusiwa ka Yesu; ku khensiwa ka yena hi Tata wa yena. Kun’wana laha Xikwembu xi vulavuleke mayelano ni ku tlakusa Yesu, hi loko a huma ku khuvuriweni, laha hi twa Xikwembu xi vulavula hi rito ro twala na ri huma etilweni, xi tiyisa leswaku Yesu i N’wana wa xona.
Ehandle ka leswi, hi hlaya ngopfu hi maxangu ya yena; a fambe tiendzo to leha hi milenge a ya tindhawini ta le kule, a hlangane ni swidzedze loko a tsemakanya tiva ra Galeliya, a etlele ehandle loko vinyi va muti va ala ku n’wi rhurhela, a vanhu va tiko ra yena va lave ku n’wi cukumetela eriweni; a varhangeri va poyile ni ku rhukatela vito ra yena, etc. Hikokwalaho a layeke vadyondzisiwa va yena leswaku loyi a lavaka ku n’wi landza a fanele ku teka xihambano xa yena a n’wi landza. A vutomi bya yena laha misaveni a byi nga fani ni bya hosi leyi hanyaka ekhokholweni, yi tirheliwa hi malandza lama tshembekeke, Yesu a te ku kota mitirhi loyi a tirhelaka vanhu.
A layile valandzeri va yena leswaku va nga tshuki va lava ku tlakusiwa hi vanhu, kambe va fanele va hisekela ku xiximeka loko humaka eka Xikwembu. A ripfumelo ra hina ra titimela loko hi susa mahlo ya hina eka yena kutani hi lava ku tlakusiwa hi vanhu; Yohana 5:44: Mi nga pfumerisa ku yini ke,kasi mi tsakela ku dzunisana, mi nga lavi ku dzunisiwa loko humaka eka Xikwembu, lexi nga xin’we ntsena!
Hikwalaho ka yini Tata a vona swi fanela ni ku laveka ku dzunisa loku ka N’wana wa xona? A xa ku sungula, ni pfumela leswaku a swi endlela ku seketela Yesu hi byakwe. A a ngo va Xikwembu lexi hetisekeke ntsena, kambe naswona a a ri munhu la hetisekeke, hikokwalaho a a vilela ku tiyisiwa eka maxangu ya ku vambiwa loku a ku n’wi yimerile. Hikuva a ku fambiwa ka munhu exihambanwini hikwalaho ka swidyoho swa vanhu hinkwavo swi rwexiwa ehenhla ka yena, na a xanisiwa hi vanhu lava a va ngheniwile hi moya lowo biha, ni ku fularheliwa hi Xikwembu Tatana, a mhaka ya ku tika ni ku vava leyi nga se tshamaka yi humelela munhu un’wana lana hansi ka dyambu, hikokwalaho Tatana a endla leswaku a n’wi tiyisa na wu nga se fika nkarhi wa maxangu ya yena. A xa vumbirhi, a xi endlela leswaku a vadyondzisiwa va xona va ta kholwa ni leswaku hi vona ku ta kholwa misava hinkwayo leswaku hakunene Yesu a a ri N’wana wa Xikwembu.
Kutani ke, a hi langutisiseni hi kusuhi leswi humeleleke. Yesu a khandziye entshaveni laha a a nga ta phazamisiwa hi munhu. A ye hi xikongomelo xa kuya va ni nkarhi wa ku khongela, a vulavula ni Tata wa yena hikwalaho ka ntirho lowu a teleke ku ta ta wu endla laha misaveni. A magidigidi ya vanhu ma khitikane ma ya ka yena kuya yingisa Rito ra yena ni ku vona mahlori ya yena, kambe a nga pfumelanga leswaku a swivilelo swa vona swi n’wi hambanisa ni Tata wa yena.
Hi fanele ku landza xikombiso xa yena, hi nga pfumeri leswaku a ntirho wa hina laha misaveni wu hi yivela nkarhi wa hina wa ku hlangana ni Xikwembu hi ku dyondza Rito ni xikhongelo. Vamamana hi xikombiso, va ni mintirho yo tala emindyangwini, swi fika laha mintirho leyi ya vona yi va yivelaka nkarhi wa swikhongelo ni ku hlaya Rito.
Yesu a teke vadyondzisiwa vanharhu hikuva a a swi tiva leswaku wu tava nkarhi wa risima swinene, wa ku hlawuleka, kutani a hlawule lava a va ri kusuhi na yena hi ripfumelo, rirhandzu ni ku n’wi yingisa.
A hi tinyiketeni ka yena hi mbilu hinkwayo kutani leswi hi nga ku swi languteleni hi ku titsongahata, a ta hi tlakusa leswaku hi kuma leswi humaka eku kwetsimeni ka yena ka le tilweni. A hi hakela mayelano ni ku tshembeka ka hina. A 120 wa vadyondzisiwa va yena lava a va yimele ku hetiseka ka xitshembiso xa Moya lowo Kwetsima endlwini ya le henhla, a Moya lowo Kwetsima wu xikele eka vona ku fana ni malangavi ya ndzilo.
A hi yeni eka xiyimo xa dyondzo ya hina. Entshaveni, a vadyondzisiwa a va karhele naswona a va ri ni vurhongo. Swi nga endleka va sungule ku khongela na Yesu, kambe va khomiwa hi vurhongo. Hambiswiritano, va pfuke hi nkarhi wa kahle leswaku va kota ku vona mahlori ya ku cinca ka Yesu a fana ni swivumbiwa swa le tilweni, a vangama ku fana ni ku hatima ka tilo. Swi nga endleka swi humelel ni vusiku leswaku swi kota ku voneka kahle ku vangama ka yena.
Vavanuna vambirhi lava a va ambale swiambalo swo vangama a va vulavula na yena. Hambi leswi a va hanye ku tlula madzana ya malembe ni vadyondzisiwa va va vonanga hi xiviri xa vona, Xikwembu hi Moya wa xona, xi endle leswaku swi va swi tiva leswaku a ku ri Muxe na Eliya.
A va vulavula na Yesu hi ta ku vambiwa ka yena ni ku tlakuriwa ka yena.
Hikwalaho ka yini Xikwembu xi hlawule lavambirhi leswaku va tiyisa N’wana wa xona?
Muxe hi yena loyi a nga tirhisiwa hi Xikwembu ku kutsula vanhu va xona ematimbeni ya munyama, a xi tirha hi Faro hosi ya Egipta ku va humesa evukhumbini bya Egipta xi va humesa evuhlongeni leswaku va ya eku tsunxekeni. Naswona Muxe a tirhise marito yo U ta hetisisa swileriso swa Xikwembu ( marito ya nawu) tani hi mutsari wa nawu.
Eliya a a ri socha ra matimba emoyeni. Entshaveni ya Carmel a hlangane ni nala erivaleni, a n’wi hlule hi ripfumelo, a dlaye vapofeta va yena va mavunwa, vaprofeta va Baal a kombisa matimba lama kulu ya ya Xikwembu eka vanhu va xona. Yesu na yena a ta lwa ni ku hlula nala ni mimoya ya yena leyo biha eGolgota leswaku lava n’wi tshembaka va ta tsunxiwa.( Naswona Eliya a tirhise marito ya vuprofeta- “U ta fela eYerusalema”).
Muxe a a kombisa Nawu kutani Eliya a a kombisa Vuprofeta, a swirho leswi lmbirhi swa eka matsalwa, a swi komba ku maxangu ya Yesu ni ku pfuka ka yena leswi a swi ri kusuhi ni ku hetiseka. Entiyisweni, a va le ku tiyiseni leswaku a maxangu ya yena a ma nga faneri ku voniwa tani hi matimba ya sathana, kambe tani hi ku hetiseka ka makungu ya Xikwembu lawa a xi ri na wona ku sukela loko munhu a tumbuluxiwa.
A vavanuna lavambirhi va matimba, va rhumeriwe ku ta ta n’wi khutaza ni ku n’wi tiyisa eka nyimpi leyi a yi n’wi yimerile emahlweni.
Swi ti komba kahle leswaku i vanhu lava rhumeriweke a hi tintsumi, hikuva a tintsumi a ti se tshama ti hlangana ni swiyimo swo tika laha misaveni ku fana ni leswi hina vanhu hi hlanganaka na swona. Muxe na Eliya, hi vumbirhi bya vona va hlangane ni tinyimpi to tika ta mimoya leyo biha, kutani a va swi tiva ku tiyisa ni ku khutaza Yesu hi marito leswaku va tiyisa ripfumelo ra yena ni ku engetela matimba ya yena emoyeni hikuva tani hi laha hi tivaka hi kona, Yesu a a ri munhu la hetisekeke hikwalaho a wu ri kona nchavo eka yena.
Kuma dyondzo eka mhaka leyi; Hambi leswi Yesu a a ri N’wana wa Xikwembu, a titsongahatile, a pfumela ku amukela ku khutaziwa ni ku tiyisiwa hi vana va vanhu.
Eku heteleleni Petro a pfukile evurhongweni, kutani a a lulamile ku vula swokarhi, kambe a a tele hi manyawu laha a nga kala a nga ha swi koti ku va ni vukheta eku vulavuleni ka yena. A nga swi lavanga ku sukeriwa hi leswi a a swi twa embilwini ya yena kutani a ku, “Oh Yesu! Swa tsakisa kuva la, hi ta mi akela mintsonga yinharhu.” Hi ku vulavula hi ku aka mintsonga minharhu, a a hleketa leswaku va ta tshama lahaya hi laha ku nga heriki!
Kambe a ku kwetsima loko a ku nga ta tshama ku nga hetisekanga. Yesu a ha fanela ku vambiwa leswaku a hi kumela ku kwetsima loku kulu ngopfu hi ku halata ngati ya yena, Kutani a vavanuna lavambirhi va nyamalala epapeni. A papa a ri ri xikombiso xa vukona bya Xikwembu. A vavanuna lava, va ve na xona xiphemu xa maxangu laha misaveni, kutani sweswi a va ri etilweni laha a va nga ha xaniseki kona.
Loko vadyondzisiwa va vona va vanuna lavaya va nyamalala epapeni, a ntsaku wa vona wu hundzuke nchavo (9:34). Hikwalaho ka yini? Xana a va chava leswaku na vona va nga tekiwa va yisiwa laha va nga ku tiviki? Ko tala hi hlaya leswaku a vadyondzisiwa a va ri ni chavo, kambe a va ri lava tiyeke emirini, a vatshevi lava a va toloverile ntirho wo tika evutonwini.
Ko tala vanhu va ni nchavo. Hikwalaho ka yini? A hi hlayeni 1 Yohana 4:18: Laha ku nga ni rirhandzu a ku na nchavo. Kambe rirhandzu leri hetisekeke ri susa nchavo, hikuva a nchavo wu yelana ni ku khatisiwa. Loyi a chavaka a nga hetisekanga erirhanzwini.
Eka vhesi leyi swi languteka onge hi chava hikuva hi langutela ku khatisiwa. Hambiswiritano, loko hi rhandza Xikwembu ngopfu, hi ta rhandza ni vanhu swinene, kutana a nchavo wu ta hi hingakanya switsongo, hikuva loko rirhandzu ri nghena ndzeni ka mbilu ri kuma nchavo kona, ra wu hlongola wu huma ehandle. A rirhandzu ri ni matimba ku tlula nchavo. Loko u chava leswaku Xikwembu xi ta ku khatisa, xi kombele leswaku xi ku pfuna leswaku u va ni rirhandzu ro eka eka xona, kutani loko u xi rhandza ngopfu, a wu nga chavi leswaku xi ta ku khatisa. Loko u xi rhandza u ta swi tiva leswaku minkarhi hinkwayo xi le ku ku biyeleleni, kutani loko ku nga tshuka ku humelela swilo leswi a wu nga swi yimelanga, a wu nga chavi hikuva wa swi tiva leswaku xa ku rhandza hikokwalaho xi ta endla ndlela leswaku u huma eka mhaka ya kona. Loko u chava vanhu, xi kombele leswaku xi tata mbilu ya wena hi rirhandzu ra ku va rhandza kutani a nchavo wu ta suka eka wena. Leswi a swi vuli leswaku u fanele ku qala vanhu, e-e, u fanele ku tirhisa vutlharhi ni hi mbilu leyi taleke hi ri pfumelo.
A hi yeni emahlweni ni xitoriya xa hina. Ku twale rito ri huma hi le papeni ri ku, “Loyi i N’wananga loyi ndzi n’wi rhandzaka, n’wi yingiseni!” Na tshemba leswaku Yesu a ve ni ku rhula ku kulu hi ku twa Tata wa yena a vula marito ya kahle eka yena. Na tshemba leswaku ni ripfumelo ra vadyondzisiwa ri engetelekile hi ku twa marito ya ku tiyisa lokuya. Kutani eka masiku lama landzeleke loko va ri karhi va tirha va ma tsundzukile marito ni leswi humeleleke endhawini liya yo hlawuleka. Petro a tlhele a yi hlavutela mhaka leyi eka papila ra yena eka 2 Petro 1:17, Hikuva siku a nga nyikiwa ku dzuneka ni ku twala hi Xikwembu Tatana, rito ri fikile eka yena ri ta hi ku kwetsima loku hlamarisaka, ri ku: “Loyi I N’wananga, loyi ndzi rhandzaka ni ku n’wi tsakela.” Kutani hina hi ri twile rito leri, loko ri huma etilweni, hikuva a hi ri na yena entshaveni yo hlawuleka.
A xin’wana lexi va khumbeke; i ku hlawuleka loku va ku va nga se tshama va ku vula eka munhu ni un’we. Mukriste un’wana ni un’wana loyi a hanyaka vutoni bya xinakulobye xo enta ni Xikwembu, a fanela ku hi nkarhi un’wana ava ni leswi n’wi humeleleke evuton’wini bya yena leswi ku ngo va yena ni Xikwembu ntsena va swi tivaka.
A hi voneni ke loko va xikile hi le ntshaveni.

//////////