Magoza eku ponisiweni

Se hi hundzile eka leswo, laha Kriste a swi kumeleke munhu, kambe xana munhu a nga swi kotisa kuyini ku khomelela eka swona xana? Leswi hi swona leswi hi lavaka ku ya swi langutisa; maghoza lama lavekaka ku amukela mfumo wa Xikwembu.

A. MAGOZA

  1. Hundzuka

Petro a ku ka vona: “Hundzukani, kutani un’wana ni un’wana wa n’wina a khuvuriwa hi vito ra Yesu Kriste, leswaku mi rivaleriwa swidyoho swa n’wina; kutani mi ta amukela nyiko, wu nga Moya lowo Kwetsima (Mint 2:38).  

Ku hundzuka a swi vuri ntsena ku ti laya hi swidyoho swa wena, kambe swi vula ku hundzuka  ka miehleketo hi tlhelo ra xidyoho, u xi vona hilaha Xikwembu xi xi vonaka hakona: I xilo xo homboloka, I nyoka yo biha leyi nga ni vuxungu, I xi nghunghumana, u fanele ku xi venga na ku xi fularhela hi mbilu ya wena hinkwayo . Leri hi rona goza ro sungula ku va u kota ku amukela mihandzu leyi vutliweke hi Kriste, kutani u ya emahlweni ni maghoza laman’wana.

  1. Rivala hi Ku Langutela ku ti Ponisa Wena Nwinyi

Ghoza ra Vumbirhi I ku va u rivala hi ku langutela ku amukeriwa hi Xikwembu hi ku tikarhata ka wena, ku va u ringeta ku hanya vutomi byo kwetsima hi matimba ya wena. Vula eka  Xikwembu ni le ka wena u ku (hi rito ro tlakuka), “Ndzi mudyohi loyi a lahlekeke endleleni ya yena yo ya eku khatisiweni hi laha ku nga heriki.” Loku unga khorhwiseka leswaku u lahlekile, a wunge ponisiwi, hikuva u ta swilavela yini ku ponisiwa xana? Anakanya hi Matsalwa lawa hi ma tshaheke endzhaku ni xikombiso xo fambisa xi kanyaka-kanya ehenhla ka njhanjhi(xiporhweni). Naswona u fanele ku anakanya hi tindzimana le ti landzelaka.

Muluvisi yena a a yimele kule, a chava ni ku tlakusa mahlo a languta etilweni, kambe a a komba ku vaviseka, a ku: ‘Xikwembu, ndzi twele vusiwana, mina ndzi nga mudyohi.! (Lk 18:13).

 Hikuva hi tona tintswalo ta Xikwembu leti ti mi poniseke, hikwalaho ka ku pfumela; kutani leswi, a swi humi eka n’wina, kambe i nyiko ya Xikwembu.  Ku hava xo tikurisa ha xona emhakeni leyi, hikuva a swi humi eku tikarhateni ka n’wina .(Ef 2:8,9 )

Swi teki u ri endzeni ka xihaha-mpfhuka lexi timpampa ta xona se ti khomeke ndzilo, kutani munhu loyi a ti khameke hi paraxuta a ku huba hi voko , a pfula xipfalo a huwelela a ku , “Tana ndzi ku Khama swin’we na mina ndzi tlula hi huma hi hlayisekile swin’we.” U langutisa hansi emisaveni kutani u khomiwa hi rhumbyani, u tikhoma mbilu u huwelela u ku, “E-e, e-e,”. Kutani u sungula ku twa ku hisa ka malangavi hi le hansi ka swi tulu. U swi vona kan’we leswaku u le khombyeni endzeni ka xi haha-mpfhuka, a wa hari ni rhengu rin’wana ku ponisa vutomi bya wena … 

  1. Amukela Nyiko ya Xikwembu ya Ku ponisiwa hi Ripfumelo

 … U hela matimba, tlakusa mavoko ya wena ehenhla mahundza nhloko ya wena, u huwelela u ku , “Ina, swiendli, ndzi ponisi!” U ta ku Khama emirini wa yena, a tlula eka xi haha-mpfhuka, kutani u twa moya wu ku pepisa; hi ku copeta ka tihlo, paraxuta yi pfuleka, u chuwela, u hlula kuwa, kutani u pengwa u rhelela u ya ehansi emavokweni ya muponisi wa wena. U langutisa xi haha-mpfhuka xi buluka xi va ndzilo xi ya wela ehansi kule nyana.

Lexi hixona xi faniso xo ponisiwa. Misava leyi yi le nghozini, hambana na yona, u teka Xikwembu xi fuma vutomi bya wena. Tshikela Yesu vutomi bya wena, u namarhela Yena hi ripfumelo ra wena hinkwaro hikuva Vito ra Yena ri vula leswaku Muponisi. Bhaleka emisaveni ya nghozi nkarhi wa ha ri kona!

Amukela tinyiko ta Yena ku fana ni xihlangi: ku nga ndzivalelo , ku endliwa loyi a lulameke, ni vutomi lebyi nga heriki. Ehleketa hiloko xihlangi xi ri karhi xi tlanga ehandle mana wa xona a tshamile kola etlhelweni, a ri karhi a rhunga, kambe a vekile tihlo eka xona. Hi ku copeta ka tihlo a dumeriwa hi mbyana ya tihanyi, yi bhonga ni ku vukulela. Xana xi nga endla yini: Xana xi nga yi hoxa hi misava? E-e, xi to kala-kala xi tsutsumela eka manana, kutani yena a xi teka a xi tlakusela ehenhla ku hundza nhloko ya yena laha mbyana yi nga ta tsandzeka ku xi fikelela.

Ehleketa nakambe kuri xana xi nga endla yini loko mana wa xona a xi nyika xinkwa xana? Xana xi nga rhanga hi ku hlengeleta swibya hinkwaswo ni ku swi  hlantswa  hinkwaswo kuri kona xi nga ta amukela xinkwa? E-e! Manana na Tatana va xi hakerile khale; lexi saleke I kuva xi hlekelela hi ku tsaka, xinanavuka xi ya emahlweni xi pfurile swiandla swa phanga xi huba xi dya.

Akuna xilaveko xa kuva u tirhela vutomi lebyi nga heriki, Yesu u byi hakerile, xa wena I ku va u byi amukela hi ripfumelo.

Hi lexi xikhongelo xo olova lexi u nga xi endlaka:

“Hosi ndza pfumela leswaku u mu Tumbuluxi wa tilo ni misava. Swivumbiwa hinkwaswo swi lumba wena-ku katsa na mina. U Xikwembu lexi kwetsimaka naswona ndzi ku fularhelile hi ku ku dyohela. Sweswi ndza xivenga xidyoho, ndza hundzuka ni ku xi fularhela. Ndza pfumela leswaku Yesu I N’wana wa Xikwembu, ni leswaku u hakerile nxavu lowu heleleke wa ku ponisiwa ka mina exihambanweni. Hosi Yesu, ndza ku amukela sweswi tani hi Muponisi wa mina ni ku ti tshikela emavokweni ya Wena. Ndzi pfula mbilu ya mina, ndzi kombela Moya lowo Kwetsima wu nghena wu tshama endzeni ka mina hilaha ku nga heriki, naswona hundzula vutomi bya mina byi fana ni bya Kriste Amen.”

Loko u khongerile xikhongelo lexi, pfumela leswaku Xikwembu Xi yingisile naswona se xi hlamurile xikhongelo xa wena, swi tshamisekile.

Hambiswiritano, hinkwavo lava nga n’wi amukela, lava nga pfumela eka vito ra yena, ú va nyikile matimba ya ku hundzuka vana va Xikwembu (Yoh 1:12).   

B. RIPFUMELO LERI NGA VURIKI NCHUMU

Ku ni muxaka wun’wana wa ripfumelo lowu ti kombaka onge I ripfumelo, kambe a hi rona ra ntiyiso wa Biblele. Ri fana ni Nsuku wa ku xisetela, ri fana ni Nsuku, kutani ri kanganyisa lavo tala, va ehleketa leswaku va kumile xilo xa ntiyiso. U n’wanyani a nga vula a ku , “Ntiyiso hi leswaku, ripfumelo I ripfumelo: Loko munhu a pfumela  leswi tsariweke eBibeleni mayelano na Hosi Yesu Kriste, yoloye u ni ripfumelo, naswona u ponisiwile. Xana a hi swona leswi Pawulo a swi vuleke eka mukhotsiwa wa le Filipiya xana? Loko swi ngari tano, swirho leswo tala swa kereke swi lahlekile.”

Vona va ku: “Pfumela eka Hosi Yesu, kutani u ta ponisiwa, wena ni va ndyangu wa wena.”  (Mint 16:31).

Nhalamulo yiri e-e, vo tala lava vulaka leswaku va pfumela eka Kriste, hi ntiyiso va ha lahlekile hikuva ripfumelo ra vona a hi ra ntiyiso. Muxaka lowo tano wa ripfumelo I ra le miehleketweni ntsena, vova ni vutivi ntsena bya leswaku Yesu u fele vadyohi, kambe a swi susumeti  “mupfumeri” ku va a tinyiketa eka Yesu leswaku a ponisiwa Eka xikombiso lexi nga laha ehenhla, swi fana ni mukhandziyi wa xi haha-mpfhuka, loyi a pfumelaka leswaku xi haha-mpfhuka xile ku tsweni, naswona munhu wa xi lamulela mhangu a nga swikota ku ponisa vutomi bya yena, kambe a nga tinyiketi emavokweni ya  yena. A hi languteni eka swi kombiso leswi landzelaka:

Wena u pfumela leswaku ku ni Xikwembu xin’we ntsena. U endla swona. Hambi ma ri mademona ma pfumela sweswo, ma ri karhi ma rhurhumela. (Yak 2:19).

Mademona  ma pfumela hi ntiyiso  leswaku  Mutumbuluxi wa tilo ni misava I Xikwembu Xi ri Xin’we , kambe a ma Xi rhandzi, ma Xi fularhela ma famba, mari karhi ma rhurhumela, hikuva ma xi tiva xikhatiso xa wona lexi ma yimeleke.

Swi ve tano eka wanhwana loyi a ri ni mademona e Filipiya.

 Kutani a hi landza, hina na Pawulo, a ri karhi a huwelela, a ku: “Vavanuna lava i malandza ya Xikwembu xa le henhla-henhla, lava va mi tivisaka ta ndlela ya ku ponisiwa.” A hamba a endlisa sweswo hi masiku layo tala ku kondza Pawulo a karhateka swinene, kutani a hundzuluka, a ku ka moya: “Hi vito ra Yesu Kriste ndza ku lerisa ndzi ri: Huma eka wanhwana loyi!” Kutani hi nomu lo moya wu huma. (Mint 16:17, 18).

Nhwana loyi a fanele a nga vulanga ntiyiso lowu, hikuva a nga ri ni xi kongomelo xa ku ti veka ehansi ka leswi nhloko ya yena yi pfumelaka eka swona, hikuva mbilu ya yena a yi nga ri kona eka ripfumelo ra yena. Ripfumelo ra ntiyiso ri huma eku enteni ka le ndzeni, ku suka embilwini:

Loko u vula hi nomo wa wena leswaku Yesu i Hosi, ni loko u pfumela embilwini ya wena leswaku Xikwembu xi n’wi pfuxile exikarhi ka vafi, u ta ponisiwa.  Hikuva munhu ú pfumela hi mbilu, kutani sweswo swi n’wi endla a va la lulameke; ú vula hi nomo, kutani sweswo swi n’wi endla a va la ponisiwaka. (Rho 10:9,10).  

 //////////   

Leave a Reply

Your email address will not be published. Required fields are marked *