Munhu, kuponisiwa ka, nkatsakanyu

A. SWILAVEKO SWI MBIRHI SWA MUNHU 

Akuva munhu ponisa eka rifu leri nga heriki, ni ku n’wi vuyisela eka vutomi lebyi nga heriki, a ku laveka swilo swi mbirhi swi endliwa eka yena:

1. Xo sungula, nandzu wa yena, hikuva a dyoherile Xikwembu a wu fanele ku lulamisiwa.  Xidyoho a xi fanele xi khatisiwa hi ku hetiseka; leswi a swi to kota ku lulamisiwa ntsena hi munhu loyi a lulameke hi ku hetiseka, leswaku afa ematshan’wini ya yena, leswaku a kota ku tlhela a yima emahlweni ka Xikwembu onge hiloko a nga tshamanga a dyoha.

2. Xa vumbirhi, matshamelo ya yena a ma fanele ku hundzuluxiwa ma vuyela eka xifaniso xa Kriste leswaku a kota ku tlhela a famba eku kwetsimeni ku ya emahlweni.

B. NDLELA LEYI KRISTE A YI TIRHISEKE KU FIKELELA SWILAVEKO SWA MUNHU

  1. U rwhalile nandzu wa munhu , a khatisiwa hi ku ti endla mhamba, afa exihambanweni.

Xikwembu Tatana, hikuva a ri Xikwembu xa rirhandzu, u rhandzile ku rivalela munhu swidyoho swa yena ni ku pfuxeta moya wa yena hi vuntswa, kambe a Xi endlanga swona, hikuva ku pfumelela xidyoho a swi ta va ku n’wi pfuneta ku ya emahlweni ni xidyoho . Xidyoho xi fanele xi khatisiwa mudyohi a nga se na rivaleriwa na ku tlhela a amukeriwa evukoneni bya Xikwembu.

Xikwembu N’wana u ti nyiketile ku rhwala mahlomulo yo khatisiwa ematshan’wini ya munhu.

U hundzukile munhu, a fana na Adamu, kambe a hanya vutomi byo tenga na ku hetiseka emisaveni. Yesu u faneriwile hikuva Xinyimpfana xa Xikwembu xo pfumala xivati ku rwhala mpingu wa xidyoho ematshan’wini ya vanhu hinkwavo.

Loko Yesu a ri henhla exihambanweni, swidyoho swa vanhu hinkwavo, va tinguva hinkwato, swi chuluriwile ehenhla ka Yena ku fana ni ndzheko lowu kulu.

Tatana u amukerile ku ti nyikela ka N’wana wa Yena, kutani xi veka vumbhoni hi ku n’wi pfuxa esirheni. Hindlela leyi Yesu u kumele munhu timfanelo hinkwato leti boxiweke laha henhla ka A.

Kasi a a boxiwa timbanga hikwalaho ka milandzu ya hina, a xanisiwa hikwalaho ka swidyoho swa hina. Ku biwa ka yena ku hi tisele ku rhula, hi hanyisiwile hi mafelangati ya yena. Hinkwerhu a hi fana ni tinyimpfu leti lahlekeke, un’wana ni un’wana a a tifambela hi ndlela ya yena; hambiswiritano, HOSI Xikwembu xi tekile swidyoho swa hina hinkwerhu, xi swi rhwexa munhu loyi.  (Es 53:5,6).  

 Xi herisa tsalwa leri khale a ri hi veka nandzu, ri hi mangalela hi milawu ya rona, kutani xi ri susele etlhelo, xi ri belela exihambanweni; (Kol 2:14).  

“Nawu lowu tsariweke hi voko” nakambe swi nga vula leswi “vughevenga/Vuhleri lebyi tsariweke” kumbe “milandzu ya hina” kumbe “ntsengo wa mi Lawu leyi hi yi tshoveke”. Xihambano xi yi Tsemakanyile hinkwayo.

Yena hi byakwe, ú rhwele swidyoho swa hina emirini wa yena le xihambanweni, leswaku na hina hi fa hi tlhelo ra ku dyoha, hi hanyela ku lulama. Mi tshunguriwile hi mimpfembeti ya yena. (1Pet 2:24).  

2. U rhwalile ntumbunuku wa ku dyoha ka munhu exihamban-weni, a ku herisa hi ku fa ka yena, kutani loko a pfukile esirheni, munhu wa ximoya u pfukile na yena eku feni tani hi xivumbiwa xintswha, a ri ni xifaniso xa Kriste hi xiviri.

 Hikokwalaho, a nga ha ri mina la hanyaka, kambe i Kriste la hanyaka eka mina. Sweswi, loko ndzi hanya emirini, ndzi hanya hi ku pfumela, ku nga ku pfumela eka N’wana wa Xikwembu loyi a ndzi rhandzeke, a va a tinyiketa hikwalaho ka mina. (Gal 2:20).

 Hi ku khuvuriwa, mi lahliwile esirheni swin’we na yena, mi tlhela mi pfuxiwa eku feni swin’we na yena, hi ku pfumela leswaku i matimba ya Xikwembu lama nga n’wi pfuxa exikarhi ka vafi. (Kol 2:12)

 Kambe Xikwembu xi ni musa swinene, hikwalaho ka rirhandzu leri kulu leri xi hi rhandzeke ha rona.  Hikokwalaho, hambileswi a hi file hi mhaka ya swivi swa hina, xi hi vuyisile evutomini swin’we na Kriste. I tintswalo ta Xikwembu leti ti mi poniseke.  Hi ku hi hlanganisa na Kriste Yesu, xi hi pfuxile eku feni swin’we na yena, ni ku hi endla lava fumaka na yena ehenhla ematilweni, (Ef 2:4-6). 

  Hikokwalaho loko mi pfuxiwile eku feni na Kriste, lavani swilo leswi nge henhla laha Kriste a tshameke kona, evokweni ra xinene ra Xikwembu. (Kol 3:1).

C. MIHANDZU YA RIFU RA KRISTE TANI HI MHAMBA EXIHAMBAN-WENI

  1. Hikuva a Susile Nandzu wa Munhu, U endlile Leswaku Tatana a Kota ku Teka Vadyohi va va Tani Hi Lava Lulameke, Leswi Tyhiwaka   ku endliwa loyi a lulameke

(“Kululama” swi nga ha hlamuseriwa tani hi  “ku va kahle emahweni ka Xikwembu”. Laha ku lulama swi hlamuseriwile hi ku komisa.)

Sweswi Tatana u kota ku vula leswaku swidyoho swa mudyohi swi rivaleriwile.

Vanhu hinkwavo va dyohile, hikokwalaho ku kwetsima loku a va nyikiwile hi Xikwembu, va ku pfumala.  Kambe va hlayiwa lava lulameke hi tintswalo ta Xikwembu, hi ku nyikiwa, ha Kriste Yesu loyi a va kutsulaka.  Xikwembu xi n’wi vekile leswaku hi ku fa ka yena, vanhu va rivaleriwa swidyoho, loko va pfumela eka yena; xi endlele ku komba hilaha xi endlaka vanhu va va lava lulameke hakona, hikuva a xi hlayelanga vanhu ku dyoha ka vona ka khale, eminkarhini ya ku tsetselela ka xona; (Rho 3:23-25).

HOSI Xikwembu xi ndzi komba Yoxuwa muprista lonkulu a yimile emahlweni ka ntsumi ya xona, xi ndzi komba na Sathana loyi a a yimile hi tlhelo ra xinene ra Yoxuwa, a tiyimisela ku n’wi mangalela.  Kutani ntsumi ya HOSI Xikwembu yi ku ka Sathana: “We Sathana, HOSI Xikwembu lexi hlawuleke Yerusalema, a xi ku laye xi ku pfala nomo. Xana Yoxuwa a nga fani ni rihunyi leri susiweke endzilweni xana?”

 Yoxuwa a a yimile emahlweni ka ntsumi, a ambarile swiambalo swa thyaka.  Kutani ntsumi yi byela malandza ya yona yi ku: “N’wi hluvuleni swiambalo leswi swa thyaka.” Kutani yi ku ka Yoxuwa: “Vona, ndzi susile nandzu wa wena, kutani sweswi ndzi ta ku ambexa swiambalo swa nkhuvo.”. (Zak 3:1-4).

Naswona, ku kotisa leswi lavo tala va hundzuriweke vadyohi hikwalaho ka munhu un’we la nga yingisangiki, hi mukhuva wolowo, hi ku yingisa ka munhu un’we, vanhu lavo tala va ta hundzuriwa va va lava lulameke. (Rho 5:19).

Hi ku kala ku yingisa ka Adamu kan’we, vanhu hinkwavo va tiveka tani hi vadyohi; hi ku yingisa ka Yesu kan’we, afa exihambanweni hikwalaho ka swidyoho swa hina, vanhu hinkwavo va tekiwa tani hi lava lulameke (Leswi swi lumba ntsena lava amukelaka nyiko ya Yena).

2. Tatana u kota ku endla Munhu wa le ndzeni wa Mudyohi (Mbilu/Moya) a va lontswha, loyi a fanaka na Kriste.

Moya wa munhu hi nkarhi wolowo, loko a tinyiketa ka Xikwembu handle ka swipimelo, Xikwembu xi cinca swiendlo swa yena Xi n’wi ghenisa swa Xona, leswi vuriwaka ku tswariwa kuntswha. (Langutisa eka swi avanyiso leswi landzelaka).

3. Hi ku rivaleriwa ni ku endliwa lontswha, munhu u yima emahlweni ka Tatana tani hi xivumbiwa lexintswha.

Switikomba onge munhu u cincane tindhawu na Kriste. Kriste u tekile ndzhawu ya munhu exihambanweni, a rhwala mahlomulo ya ku khatisiwa ka yena ni swiendlo swa yena swa vudyoho, kutani munhu a ambala swifambu swa Yena, a suka a famba a nga ha ri na nandzu, endzeni a ri ni xivumbeko xa Kriste. Loko Tatana a langutisa munhu loyi se a kutsuriweke a ri karhi a rhelela hi gondzo, u vona xifaniso xa Kriste.

4. Xo Sungula Ku Endliwa Loyi a Lulameke, Swi Fambelana ni Ku va Munhu a Pfumeleriwa ku Yima emahlweni Ka Xikwembu.

Swi na nkoka ngopfu ku twisisa mhaka leyi.

Ku endliwa loyi a lulameke swifana ni hosi leyi rholeke xisiwana xa swi tlakati endleleni, yi xi fuwa tani hi n’wana wa yona entsindza, yi n’wi avela hinkwaswo leswi vana va yona va tiphinaka hiswona. U  kuma xivongo xa hosi ni ku  nyikiwa phepha ra mpfumelelo hi nkarhi wolowo, leri vulaka leswaku I n’wana wa ndhave-zita(wa hosi). Leri hi rona ghoza ro hetelela le ri va hlanganisaka hi nawu.

Ni ku punyala ka yena,  ni swi tlakati swakwe, vanhu va ta n’wi tekela hansi ku fikela loko a humesa phepha leri a ri khomeke hi voko, leri vulaka leswaku I n’wana wa ndhavezita, n’wana wa hosi manyani.

[Wa pfumela leswaku Xikwembu xi nga ku endlela leswi hi nkarhinyana xana?]

Xin’wanana lexi xa ku pepetseka se sweswi xa tekiwa xi yisiwa entsindza, ni le ka xipandza mananga xa manyunyu( movha wa vuhosi) na  xi hlambile ku suka enhlokweni ku fika eswikunwanini, ni ku ambala swi ambalo swa vuhosi, ni ku dya etafuleni ra n’wa hosi swin’we ni swirho leswin’wana swa le ntsindza, ni kuva ni lawu ra xona entsindza, xikombiwa xichavo ni ku sirheleriwa hi varindzi va le ntsindza, xi tshama ehansi xi dya mabulu ni hosi, ni swin’wana ni swin’wana.

Leswi hinkwaswo I swita ndzhaku, kambe xo sungula I ku fuyiwa, ku nga ku cinca loku endliweke ximfumu hi ku copeta ka tihlo loko hosi yi sayinile maphepha ya mpfumelelo wa ku fuyiwa ka yena. Leri hi rona tsalwa  leri va bohaka, hambi n’wa hosi ra n’wi boha hi nawu ku va  a ri landza.

//////////

Leave a Reply

Your email address will not be published. Required fields are marked *