Nkhuvulo wa le matini wa mupfumeri

A. HI NDLELA YINI, HIKWALAHO KAYINI KONA RINI

Loko munhu a tswarile ra vumbirhi, u fanele ku khuvuriwa tani hi vum-bhoni lebyi nga erivaleni eka Xikwembu ni vanhu bya leswi endlekeke endzeni ka yena. Kupetiwa ka miri wa yena hinkwawo endzeni ka mati I mfungho wa leswaku eka Kriste munhu wa yena wa khale wa le ndzeni, wa vudyoho, u file a tlhela a yimberiwa. Kutani ku humesiwa ka miri wa yena ematini I mfungho wa leswaku eka Kriste u pfukerile eka vutomi lebyi-ntswha. Leswi swi hlamuseriwile erivaleni eka Matsalwa lama landzelaka:

 Hi ku khuvuriwa, mi lahliwile esirheni swin’we na yena, mi tlhela mi pfuxiwa eku feni swin’we na yena, hi ku pfumela leswaku i matimba ya Xikwembu lama nga n’wi pfuxa exikarhi ka vafi. (Kol 2:12).  

 Loko swi ri tano, hi ku khuvuleriwa ku fa ka yena, hi lahliwile na yena, leswaku kukotisa leswi Kriste a pfuxiweke exikarhi ka vafi, hi matimba yo kwetsima ya Tatana, na hina hi ta hanya hi mukhuva lowunthswa. (Rho 6:4). 

 Va ku va ha famba endleleni, va fika laha a ku ri ni mati, kutani ndhuna yi ku: “Vona, mati hi lawa; ku nga sivela yini leswaku ndzi khuvuriwa xana?”. Filipi a ku: “Loko u pfumela hi mbilu ya wena hinkwayo, u nga khuvuriwa.” A hlamula a ku: “Ndza pfumela leswaku Yesu Kriste i N’wana wa Xikwembu.”. Kuteloko a lerisile leswaku golonyi yi yima, va ngirimela ematini hi vumbirhi bya vona, Filipi ni ndhuna; kutani Filipi a yi khuvula.  Kuteloko va humile ematini, Moya wa Hosi wu susa Filipi. Ndhuna a ya ha vuyanga yi n’wi vona; hambiswiritano, yi yile emahlweni ni riendzo ra yona, yi tsakile swinene.(Mint 8:36-39).  

Kuni vuxaka bya le kusuhi swinene bya ximoya exikarhi ka tilo ni misava. Tani  hi xikombiso: tintsumi ta tsaka hi ku ponisiwa ka mudyohi wun’we (Lk 15:10) naswona, loko a ya emahlweni ni ku hundzuka ka yena hi kuva a khuvuriwa, mahungu ma fika hinkwako etilweni ni le tiheleni. Etihele ta rhurhumela, etilweni ku biwa huwa ya ku dzunisa, leyi tlakukaka ku fika eka Xinyimpfana. 

B. LESWI AKA XISIRHELELO XA RIPFUMELO EXIKARHI KA VUTOMI BYA KHALE NI LE BYINTSWHA.

Nkhuvulo I goza ro yisa ripfumelo emahlweni kule ni vutomi bya khale. Tani hi laha hi vonaka hakona eku kutsuriweni ka va Israyele etikweni ra Egipta laha a va ri mahlonga kona. Loko va fika elwandle ro tshwuka va hlongorisiwile hi ma egipta. Kutani Muxe a tlakusa Nhonga ya yena hi ripfumelo, kutani mati ma avana, ma pfumelela va Israyele ku hundza, ma egipta wona ma mbomba. Va Israyele va ghiya va ri karhi va rhangeriwile hi Miriamu.

Mukriste loyi a hundzeke hile ka nkhuvulo wa mati u yisa emahlweni muako wa xi sirhelelo xo sirhelela ripfumelo ra yena eka diyavulosi loyi a ringetaka ku n’wi kokela endzhaku evuhlongeni. Nakambe swa n’wi sirhelela leswaku a nga tlheleli eka vutomi bya vudyoho, hikuva se u tekile xiboho emahlweni ka vanhu, a vula leswaku u tsemakanyile nambu wa vutomi bya khale, a nghena eka vutomi lebyintswha.

C. SWI TLAKUSA HOSI YESU NI KU VEKA VUMBHONI EKA LAVA TI ARISAKA

Loko munhu a tswariwa ra vumbirhi, eka nhlengeletano, u veka vumbhoni bya yena, kutani a khuvuriwa emahlweni ka vanhu hinkwavo. Sweswo swi tlakusa Vito ra Hosi Yesu ni ntirho wa yena exihambanweni swinene eriva-leni, a khongotela van’wana lava nga kona, la va nga pfumeriki, leswaku na vona va veka ku tshemba ka vona eka Yesu, ni ku nyikela vutomi bya vona eka Yena.

(Yesu u endlile mhaka ya kahle ku va a ku ferile , a yimberiwa ni ku va a pfukile eku feni ; leswi a swi lavaka eka wena I ku va u ringisela tani hi xifaniso xa leswi Yena a nga swi endla, hi ndlela yo khuvuriwa.)

D. SWI LULAMISELA NDLELA YA KU KHUVURIWA HI MOYA LOWO KWETSIMA 

1. Siku ra Pentenkosta

Mint 2:38,41 Petro a ku ka vona: “Hundzukani, kutani un’wana ni un’wana wa n’wina a khuvuriwa hi vito ra Yesu Kriste, leswaku mi rivaleriwa swidyoho swa n’wina; kutani mi ta amukela nyiko, wu nga Moya lowo Kwetsima. Hiloko lava amukeleke marito ya yena, va khuvuriwa; kutani esikwini rero, ku amukeriwa vanhu lava lavaka ku va 3 000.

 Langutisa hi laha swi longolokaka hakona: hundzuka, khuvuriwa, kutani u amukela nyiko ya Moya lowo Kwetsima.

2 .Ku khuvuriwa ka Yesu hi Yohani Mukhuvuri

Ku khuvuriwa ka Yesu, loku lerisiweke hi Xikwembu, aku khulela ndlela ya Ntirho wa Yena hambi leswi eka Yena a ku nga ri ni xilaveko xa ku hund-zuka ni ku khuvuriwa, hikuva a nga zanga a dyoha. Kambe u swi endlile ku “hetisisa ku lulama hinkwako”. Mbuyelo wa kona U vile a xiximiwa hi Tata-na, kutani a n’wi khuvula hi Moya lowo Kwetsima.

Kuteloko Yesu a khuvuriwile, a hatla a huma ematini; kutani hi nomu lo matilo ma pfuleka, a vona Moya wa Xikwembu wu xika tanihi tuva, wu ta ehenhla ka yena. Kutani ku twakala rito leri humaka etilweni, ri ku: “Loyi i N’wananga la rhandzekaka, loyi ndzi n’wi tsakelaka.”. (Mt 3:16, 17). 

E. A HI NDLELA LEYI XIKWEMBU XI NGA YI SIMEKA YA KU AMUKELA KU PONISIWA

Ku ponisiwa ku ta hi ku hundzuka ni ku veka ku tshemba ka wena eka Ye-su. Nkhuvulo kova vumbhoni bya leswaku u swi endlile sweswi. Khamba leri a ri ri exihambanweni ri ye tilweni hambileswi ringa kumangiki enka-teko wo khuvuriwa, kambe ri hundzukile erivaleni ni ku vula ripfumelo ra yena hi nomo wa yena.

Lk 23:39-43 Xin’wana xa swidyohi leswi hayekiweke kwalaho a xi n’wi rhuketela, xi ku: “Xana a hi wena Mesiya ke? Tiponise, na hina u hi ponisa!” Kambe lexin’wana xi n’wi tshinya, xi ku: “Xana a wu chavi Xikwembu, leswi u nga avanyisiwa ku fana na yena ke? Loko hi ri hina, swi hi fanerile, hikuva hi amukela leswi fanekelaka swiendlo swa hina; kambe loyi, a nga endlanga nchumu xo biha.” Xidyohi xi engeta xi ku: “Yesu, ndzi anakanye, loko u nghena eMfun’weni wa wena.” Yesu a ku ka xona: “Ndzi tiyisile ndzi ri ka wena, namuntlha u ta va na mina eParadeyisini.” 

F. KU KHUVURIWA EMATINI KA MUPFUMERI KU NA NKOKA HIKUVA I XI LAVEKO XA XIKWEMBU

Hi swi vonile eka tindzimana leti tshahiweke laha henhla nkoka wa ku khu-vuriwa loko u ponisiwile. Kambe a hi engeteleni leswaku I swa nkoka hiku-va Xikwembu Xi lerisile tano, kutani xileriso xa Xikwembu xin’wana ni xi’wana xi ni nkoka.

Hikwalaho loyi a nga ta tlula wun’wanyana wa milawu leyitsongo leyi, kutani a dyondzisa vanhu ku endlisa sweswo, ú ta vuriwa lontsongo eMfun’weni wa matilo. Kambe loyi a nga ta yi hlayisa ni ku yi dyondzisa, ú ta vuriwa lonkulu eMfun’weni wa matilo. (Mt 5:19).

Mi vanakulorhi loko mi endla leswi ndzi mi lerisaka swona. (Yoh 15:14).  

Ehansi ka Ntwanano lowa Khale, ku yimba a ku ri xikombiso xa Ntwanano, kutani a swiri  ni nkoka swinene eka Xikwembu hikuva loko muhlawuriwa wa Xona Muxe a tsandzekile ku yimbisa n’wana wa yena wa vumbirhi, Xi-kwembu a xi lavile hambi ku n’wi dlaya, kutani u bohekile ku lerisa nsati wa yena ku swi endla hi ku copeta ka tihlo hikuva swi tikomba  leswaku yena a nga ta swikota hikuva o nge a a vabya swinene. Leswi swi tisile ntshikelelo wu kulu swinene endyangwini.

Loko va ri endleleni, HOSI Xikwembu xi tela Muxe laha va nga fika va gova kona, xi ringeta ku n’wi dlaya. Kutani Sipora a teka ribye ro kariha, a tsema nsuvu wa n’wana wa yena, a khumba milenge ya Muxe ha wona, a ku: “Hakunene, u nuna wa ngati eka mina.” Kutani HOSI Xikwembu xi tshika Muxe. Loko Sipora a ku: “U nuna wa ngati eka mina”, a a vulavula a kongomisa mhaka ya ku yimba. (Ex 4:24 – 26). 

Loko Xikwembu xi nga hundzuki, hikwalaho ka yini u nga tekeli enhlo-kweni xileriso xa Xona leswaku vapfumeri va khuvuriwa xana? Hikwalaho ka yini u hanya vutomi bya wena hinkwabyo u nga yingisi Xikwembu emhakeni leyi xana? Hikwalaho kayini u pfumela ku lahlekeleriwa hi rifuwo ra nkoka leri Xona Xi nga ku lulamisela rona xana?

/////////

Leave a Reply

Your email address will not be published. Required fields are marked *