Swimvumbiwa swa le henhla

A. SWIVUMBIWA SWA XIKWEMBU LESWI NGA VONIWIKI

Ku ta fikela sweswi a hi langutisa eka ntumbunuku wa Xikwembu lowu voniwaka: ku nga dyambu, nwheti, tinyeleti ni misava leyi eka yona Xi tumbuluxeke swimilana, swiharhi ni munhu, kambe Xi tlhele Xi tumbuluxa ni misava  yin’wana yo tala swinene ya le tilweni yo kala yi nga voniwi  hi mahlo, laha Xona Xi tshamaka  kona, Xi rhendzeriwile hi Mune wa Swivumbiwa leswi Hanyaka, va Kulukumba ni Tintsumi, leswi naswona swi  tumbuluxiweke hi Xona.  Hi taya langutisa eRitweni sweswi leswaku hi tsumbula swo tala, ni hi laha swi langutekaka hakona ni mintirho ya swona.

Eka dyondzo leyi, loko hi vulavula hi tintsumi, hi tava hi nga katsi ni Ntsumi ya Hosi, ku nga Hosi Yesu Kriste hambi a ri diyavulosi; ti nhloko mhaka ta swona leswi hi ta vulavula hi tona eka swi avanyiso swin’wana toxe.

B. SWIVUMBIWA SWA MUNE LESWI HANYAKA (SWILO) NI VAKULUKUMBHA

 Ntirho wa swona wo rhanga, wa le mahlweni swinene, I ku gandzela Xikwembu vusiku ni nhlikanhi.

Kutani tintsumi hinkwato ti yima ti rhendzele xiluvelo ni vakulukumba ni swivumbiwa leswi hanyaka swa mune, ti nkhinsama ti korhama emahlweni ka xiluvelo, ti gandzela Xikwembu, ti ku: “Amen! Ku vongiwa, ni ku twala, ni vutlhari, ni ku nkhensiwa, ni ku dzuneka, ni matimba, ni ntamu, a swi ve eka Xikwembu xa hina, hilaha ku nga heriki! Amen. (Nhlav 7:11,12).

C. TINTSUMI 

1. Swi hlawulekisi (matshamelo)

        • Swivumbiwa swi tumbuluxiwa; leswi tumbulu-xiweke hi Xikwembu.

 Ha yena, Xikwembu xi tumbuluxile swilo hinkwaswo, ematilweni ni la misaveni, swilo leswi vonekaka ni leswi nga vonekiki, kukota swiluvelo kumbe leswi nga ni vuhosi, ni leswi nga ni vundhuna kumbe ku fuma. Hinkwaswo swi tumbuluxiwile ha yena, naswona swi tumbuluxeriwe yena (Kol 1:16).  

        • Swivumbiwa swa Moya

 Xana tintsumi hinkwato a hi mimoya leyi tirhelaka Xikwembu, leyi rhumiweke ku pfuna vanhu lava fanelaka ku kuma ku ponisiwa xana?  (Hev 1:14).

        • Swivumbiwa leswi nga riki ni ku hela. (Lk 20:35,36).
        • A swi na rimbewu, naswona,  aswi na vuswikoti bya kuva swi velekana. Xin’wana ni xi n’wana, hi xin’we xin’we, swi tumbuluxiwile hi Xikwembu (Mt 22:30).
        • Swa kwetsima
          • swi tumbuluxiwile.

 La khomiwaka hi tingana hikwalaho ka mina ni marito ya mina, N’wana-wa-Munhu na yena ú ta khomiwa hi tingana hikwalaho ka munhu loyi, siku a vuyaka eku kwetsimeni ka yena, a ri na Tata wa yena ni tintsumi leto hlawuleka. (Lk 9:26)

Xikwembu xi tumbuluxile tintsumi tani hi swivumbiwa leswi kwetsimaka.

          • Hiku ti hlawulela

 Hiloko dragona leyikulu leyi yi cukumetiwa yi ya wela hansi, yona nyoka ya khale leyi vuriwaka Diyavulosi kumbe Sathana, Mukanganyisi wa misava hinkwayo; yi cukumetiwa yi ya wela ehansi emisaveni, tintsumi ta yona na tona ti cukumetiwa kun’we na yona. (Nhlav 12:9)

Loko ntsumi, leyi endzhaku yi vitiweke diyavulosi, yi pfukerile Xikwembu, tintsumi a tiri ni vutihlamuleri bya ku hlawula, kumbe ku hlawula ku n’wi landza, kumbe ku hlawula ku tshembheka eka Xikwembu. Vumbirhi – bya vunharhu byi hlawurile Xikwembu tani hi Xikwembu ni Hosi ya tona, kutani ti hlayisile ku kwetsima ka tona; ti tengile hi ku ti hlawulela.

          • Swi twi
            • Ntsako: Ta tsaka hikolaho ka ku ponisiwa ka mudyohi (Lk 15:7).
            • Nhlomulo ni vukarhi ? A hi byeriwanga.
          • Matshamelo

Tihlawulekile no va  ni matimba (2 Tes 1:7 ).

Tikurile ku hundza munhu hi matimba ni vuswikoti  (2 Pet 2:11).

          • Kulanguteka ka tona
          • Hilaha ti voniwaka hakona etilweni: I swi vumbiwa swo hlawuleka, leswi nga ni timpapa.

 A a rhendzeriwe hi tintsumi leti vuriwaka “tiserafi”, yin’wana ni yin’wana yi ri ni timpapa ta 6; timpapa timbirhi a ti ri to funengeta xikandza, timbirhi to funengeta miri, timbirhi to haha ha tona. Tintsumi a ti hlamulana ti ku: “Wa kwetsima, wa kwetsima, wa kwetsima loyi a nga HOSI ya matimba hinkwawo, misava hinkwayo yi tele hi ku dzuneka ka yena.”  Ku uwelela loku ka tintsumi a ku gudla-gudlisa swihukuva swa tinyangwa ta Tempele, kutani ku va ni musi lowu tataka Tempele hinkwayo. (Es 6:2-4).

Hi tlhelonyana, hikolaho ka xivono hi tintsumi leti, Esaya u khomiwile hi nchavu lowu kulu swinene ni ku twa ku vaviseka hikwalaho ka swidyoho swa milomo ya yena.

          • Hilaha ti langutekaka hakona emisaveni.

Loko ti humelela eka vanhu emisaveni, tas wikota ku ti kombisa hi xivumbeko lexi lavekaka eka xiyimo ni  nkarhi wolowo.

            • Laha Abrahamu a tshama kona eNtsongeni, ti humelerile tani hi vaendzi vanharhu lava nga eriendzweni.
            • Ntsumi leyi nga vumbuluxa ribye esirheni ra Hosi Yesu, yi ti kombile tani hi xivumbiwa xa le tilweni.

 Hi nomu lo, ku tsekatseka lokukulu ka misava ku va kona; ntsumi ya Hosi yi xika hi le tilweni, yi vumbuluxa ribye, yi tshamisa ehenhla ka rona. A yi vangama ku fana ni rihati, ni swiambalo swa yona a swi basile kukota gamboko. Valanguteri va rhurhumela hi ku chava, va vonaka wonge hi loko va file.  (Mt 28:2-4).

            • Esirheni ra Hosi Yesu leri ahlameke, ti ti kombisile tani hi majaha mambirhi lama ambaleke swiambalo swo basa. (Mt 24:1-4).
            • Eku tlhandlukeni ka Hosi Yesu, ti ti kombisile tani tani hi vavanuna vambirhi lava ambaleke swiambalo swo basa (Mint 1:10).
          • Vutivi
            • Eku ngandzeleni ka Xikwembu, tiboheka leswaku tiva ni vutivi bya le kusuhi swinene ni bya Xikwembu, leswi hi swona swi endlekaka minkarhi hinkwayo, ham-biswiritano, vutivi bya Xikwembu byi hundza bya hinkwaswo kule swinene.
            • Vutivi bya leswi humelelaka emisaveni. Tani hileswi ti tsakaka hi ku ponisiwa ka mudyohi, swile rivaleni leswaku hinkwaswo leswi humelelaka laha ehansi ka dyambu ta swi tiva swinene.

 Ndza mi byela leswaku, hi mukhuva wolowo, tintsumi ta Xikwembu ta tsaka swinene loko mudyohi hambi a ri un’we a hundzuka.”  (Lk 15:10).

            • Swin’wana leswi tinga swi tiveki
              • Xihundla xa Evhangeli (1 Pet 1:12).
              • Siku ra ku vuya ka Hosi Yesu ra vumbirhi

 “Loko ri ri siku ra kona ni nkarhi wa kona, a ku na loyi a swi tivaka, hambi ti ri tintsumi ta le matilweni, hambi a ri N’wana; swi tiviwa hi Tatana ntsena (Mt 24:36) 

2. Minxaka ni mavito

        • Tiserafi

A a rhendzeriwe hi tintsumi leti vuriwaka “tiserafi”, yin’wana ni yin’wana yi ri ni timpapa ta 6; timpapa timbirhi a ti ri to funengeta xikandza, timbirhi to funengeta miri, timbirhi to haha ha tona.   (Es 6:2).

Hiloko yin’wana ya tintsumi yi haha yi ta ka mina i ri ni khala lero vuvumela leri yi ri okeke alitarini.: (Es 6:6).

        • Tikerubu

 Mi ta endla tikerubu timbirhi, leti mi nga ta ti fula hi nsuku, emakumu ka xitshamu xa ndzivalelo.   (Ex 25:18)

        • Tiarkanju
          • Mikaele

 Kasi Mikaele ntsumi leyikulu, loko a lwetana na Diyavulosi va phikisana hi ntsumbu wa Muxe, ú chavile ku avanyisa Diyavulosi ni ku humesa marito ya ku n’wi sandza, kambe ú te: “Hosi a yi ku tshinye!”  (Yud 1:9).

          • Gabriele (Dan 8:16; 9:21; Lk 1:19, 1:26)

 Ntsumi yi n’wi hlamula, yi ku: “Hi mina Gabriele, la yimaka emahlweni ka Xikwembu; ndzi rhumiwile ku ta vulavula na wena ni ku ku tivisa mahungu lamanene lawa.   (Lk 1:19).

 3. Ntsengo ni swiyenge

        • Kuni tintsumi ta ntsandza vahlayi etilweni.

 Hiloko ndzi languta, kutani ndzi twa rito ra tintsumi leto tala, ta magidi ya magidi-gidi ya ntsandza-vahlayi, ti rhendzele xiluvelo ni swivumbiwa leswi hanyaka swa mune ni vakulukumba; (Nhlav 5:11).

 Nakambe langutisa eka Hev 12:2.

        • Tintsumi ti vekiwile kuya hi swiyenge swa vulawuri bya tona.

 yena loyi a yeke etilweni, kutani sweswi ú le vokweni ra xinene ra Xikwembu, tintsumi ni vafumi ni leswa matimba swi ri ehansi ka yena. (1Pet 3:22).

 4. Mpfumelelo wo tshinelela Xikwembu

        • Diyavulosi a ri ni mpfumelelo hinkwawo wa ku tshinelela Xikwembu, kufikela loko a hoxiwa emisaveni (Yob 1:6) , ni vaKriste va ni mpfumelelo wo tshinelela Xikwembu handle ko kavanyetiwa; Hikwalaho ka yini xana ?
        • Tintsumi leti sirhelelaka vana lava ntsongo, ti tshama tiri karhi ti langutanile ni mombo wa Xikwembu minkarhi hinkwayo.

 “Tilanguteleni leswaku mi nga sandzi un’wana wa lavatsongo lava; hikuva ndza mi byela leswaku tintsumi ta vona le matilweni ti tshama ti langutile mombo wa Tata wa mina la nge matilweni, masiku hinkwawo (Mt 18:10).

 5. Vuxaka bya vanhu eka tintsumi

        • A ti ghandzeriwi (Nhlav 22:8,9).
        • I mimoya ya vatirhi, leyi rhumiwaka hi Xikwembu kuta korhokela(ku tirhela) vakwetsimi va Xona.

 Xana tintsumi hinkwato a hi mimoya leyi tirhelaka Xikwembu, leyi rhumiweke ku pfuna vanhu lava fanelaka ku kuma ku ponisiwa xana? (Hev 1:14).

        • Ahi nge swikoti ku rhuma tintsumi leswaku ti hi tirhela swokarhi. Hambi hi Hosi Yesu loko a hari laha misaveni, a a to endla hiku kombela Tatana ematshan’weni ya Yena leswaku ti ta n’wi sirhelela.

 Xana u ehleketa leswaku ndzi nga tsandzeka ku khongela Tata wa mina, a ndzi pfuna sweswi-sweswi hi mavandla ya tintsumi lama tlulaka 12 xana?  (Mt 26:53).

 6. Tintsumi le ti weke

Murhangeli wa tintsumi, yena diyavulosil, u pfukerile Xikwembu, kutani a hoxiwa emisaveni swin’we ni tintsumi leti nga n’wi landzela.

 Xikwembu a xi tsetselelanga tintsumi loko ti dyohile, kambe xi ti cukumetile eTiheleni, ni ku ti nghenisa emakorhweni ya xivandla xa vafi, laha ti pfaleriwaka kona ku fikela siku ra ku avanyisa; (2Pet 2:4)

 Kutani ku pfuka nyimpi etilweni, ya Mikaele ni tintsumi ta yena loko va lwa ni dragona; na yona dragona yi lwa yi ri ni tintsumi ta yona. Kambe dragona yi hluriwa, yi nga ha pfumeleriwi ku tshama etilweni, yona ni tintsumi ta yona. Hiloko dragona leyikulu leyi yi cukumetiwa yi ya wela hansi, yona nyoka ya khale leyi vuriwaka Diyavulosi kumbe Sathana, Mukanganyisi wa misava hinkwayo; yi cukumetiwa yi ya wela ehansi emisaveni, tintsumi ta yona na tona ti cukumetiwa kun’we na yona. (Nhlav 12:7 -9).

 Hi ncila wa yona, dragona yi hawula xiphemu xin’we xa nharhu xa tinyeleti ta le mpfhukeni, yi ti cukumetela emisaveni. Kutani yi ya yima emahlweni ka wansati loyi a a ri kusuhi ni ku veleka, leswaku yi ta mita n’wana kan’we-kan’we loko a ha ku velekiwa.  (Nhlav 12:4).

 7. Ntirho wa tona emisaveni

        • Xikwembu xi rhumela tintsumi ta Xona leswaku ti ta korhoka endhawini ya Xona.
        • Swa kala ku va Xikwembu xita xi ta endla ntirho wa mavoko hi Xoxe.
        • Xi endla swilo laha misaveni hiku tirhisa tintsumi ta Xona: tiva yisela hungu ra Xona, ti va sirhelela eka valala va vona, ti va tiyisa ni ku vumbuluxa ribye esirheni.  Tani hileswi hi rhendzeriweke hi mimoya leyo biha empfhukeni, hi mukhuva wolowo, hi rhendzeriwile hi magidi-gidi ya tintsumi ta matimba swinene ni ku kwetsima. Vatsongwani vona vani tintsumi to hlawuleka leti ti va sirhelelaka (Mat 18:10).
        • Minkarhi leyi tintsumi tiendleke  vukorhokeri emisaveni .
        • Tisirhelerile Nsinya wa Vutomi (Gen 3:24).
        • Tiponisile Lote ni ndyangu wa yena (Gen 19:1-22).
        • Tinghenelerile loko Muxe a amukela Nawu eka Hosi Xikwembu (Gal 3:19).
        • Tisirhelerile Areka ya Ntwanano ni Ntsonga wo Hlawuleka (swikombiso) (Ex 25:18, ni tin’wana).
        • Tibile va Israyele hi mintungu (2 Sam 24:15,16).
        • Tiherisile mavuthu ya va Siriya (2 Tikr 32:21).
        • Tisirhelele Elixa eDotani (2 Tih 6:17).
        • Tiyisile hungu ra Xikwembu eka Zakariya, (Lk 1:11-20) na Yosefa (Mt 1:9-23 na 2:13, 19, 20)  na Mariya (Lk 1:26-38).
        • Tiyisile hungu ra ku velekiwa ka Hosi Yesu eka varisi, kutani vandla ra tintsumi tale   tilweni ti yimbelela ti dzunisa Xikwembu (Lk 2:13-15).
        • Tikorhokerile Hosi Yesu emananga (Mat 4:11) nale Ghetsemani (Lk 22:43).
        • Titlakurile Lazaro a ya tilweni loko a file (Lk 16:22).
        • Tihumesile Petro ekhotsweni (Mint 5:19 na 12:7).
        • Tivumburixile ribye esirheni ra Hosi Yesu, tiveka murindzi leswaku ari sirhelela (Mt 28:2-7).
        • Tihumelerile eka Mariya Madalena na Yohana esirheni ra Hosi Yesu (Lk 24:4-7).
        • Tihumelerile ni ku nyikela hungu ra Xikwembu eka vadyondzisiwa va Hosi Yesu eku tlhandlukeni ka Yena (Mint 1:10, 11).
        • Tihumelerile eka Pawulo, tin’wi tiyisa hi nkarhi wa xidzedze elwandle (Mint 27:23).

 8. Ntirho wa tona eka mfumo wa le tilweni

        • Minkarhi ya kona:
        • Tikhomile milomo ya Esaya hi khala ra ndzilo, leri pfurhaka kusuka e altarini, hindlela yoleyo tisusa milandzu ya yena (Es 6:6,7).
        • Tiambexile Yoxuwa, ni MuPrisita Lonkulu hi xiambalo xa vululami (Zak 3:4).
        • Tigandzerile Xikwembu

Lowu hi wona ntirho wa tintsumi lowu ti tiphinaka eka wona.

Kutani tintsumi hinkwato ti yima ti rhendzele xiluvelo ni vakulukumba ni swivumbiwa leswi hanyaka swa mune, ti nkhinsama ti korhama emahlweni ka xiluvelo, ti gandzela Xikwembu, ti ku: “Amen! Ku vongiwa, ni ku twala, ni vutlhari, ni ku nkhensiwa, ni ku dzuneka, ni matimba, ni ntamu, a swi ve eka Xikwembu xa hina, hilaha ku nga heriki! Amen. (Nhlav 7:11,12).

        • Tilwisa matimba layo biha lawa malwaka ni vanhu va Xikwembu

 Ntsumi leyi yimelaka mfumo wa Vaperesi ematilweni, yi ringetile ku hingakanya ndlela ya mina, yi ndzi sivela ku suka ku ringana masiku ya 21; kambe Mikaele, yin’wana ya tintsumi letikulu ta le tilweni, ú tile a ta ndzi lamulela, kutani ndzi n’wi siyile a ri karhi a lwa ni mfumo lowu wa Vaperesi . (Dan 10:13).

 Hiloko a ndzi vutisa a ku: ‘Xana wa swi tiva leswaku ndzi tele yini eka wena xana? Ndzi tile ku ta ku tivisa leswi tsariweke eka Buku ya Ntiyiso. Hambiswiritano ndza ha fanele ku ya lwa ni ntsumi leyi yimelaka Vaperesi, kutani loko ndzi yi hlurile, ka ha ta humelela ntsumi yin’wana leyi yimelaka Vagriki. A ndzi na museketeri etinyimpini leti, loko a nga ri yena Mikaele, ntsumi leyi yi yimelaka n’wina Vaisraele. (Dan 10:20).

Vafumi lava akuri matimba ya munyama, lawa a ma lawula tinxaka leti boxiweke.

        • Eka minkarhi ya makumu, leyi taka, titava ni migingiriko yo hlaya: Tita tivisa kungu rin’wana ni rin’wana lerintsha ra Xikwembu , kutani tiri hundzisa, Tiavanyisa vanhu van’wana laha misaveni, loko hi hala tlhelo tirikarhi ti veka mfungho emimombyeni ya vona, leswaku va nga avanyisiwi, Tihoxa diyavulosi ekheleni ro pfumala tshaku ni swin’wana. (Dyondza Buku ya Nhlavutelo).

D. TIDYONDZO LETI HUMAKA EKA NHLOKO MHAKA LEYI

 1. Langutisa eka Vutlhari bya Xikwembu

Mutumbuluxi wa tilo ni misava u swi tivile swa hari emahlweni leswaku munhu uta wa, a tlhela a tsana swinene, kutani a lava ku sirheleriwa ni ku hlayisiwa hi minkarhi. Ina, Xi nga swikota ku hi serhelela ni ku hi hlayisa hi Xoxe hinkwerhu, kambe lawa ahi wona matirhelo ya Xona, naswona, Tatana swa kala kuva a endla hinkwaswo hi mavoko ya Yena; Kambe U rhumela van’wana leswaku va tirha,  hikokwalaho, Xirhumele tintsumi leswaku tihi hlayisa, kufikela hi huma eka xiyimo xa hina xa kuwa, hi nghena eka vutomi lebyintswha byo dzuneka.

Endleleni ya ku dyondza ka hina dyondzo leyi, hi hlangana ni swiyimo swin’wana  swo hambana-hambana, nkarhi wun’wana hi vonile tintsumi ti humelela hiku titsongahata, nkarhi wun’wana hi matimba lamakulu ni swiendlo leswikulu swinene swa ku hi sirhelela loko hi ri karhi hi hlangana ni nyimpi ya ku tsana, mavabyi, ntumbunuku ni matimba ya munyama, kambe swilo leswi hinkwaswo swova donakati ra mati elwandle loko hi fananisa ni leswi tihi sirhelerisaka xiswona emisaveni hinkwayo. Mavandla ya tintsumi ta matimba swinene tikola etlhelweni ka hina minkarhi hinkwayo.  I vanghana va hina, I vatirhi kulobye va hina, I va sirheleti va hina, ni va tiyisi va hina. Ta tsaka loko swilo swi hi fambela kahle. Tahi lwela empfukeni.  Ti fika hi xihi hatla leswaku tihi ponisa.

Ahi tsakeni, hi khutazeka ku tsutsuma mpfuka wa vutomi, hi ku tiva leswaku ahi hexe.

2. Tintsumi a ti tshembeli eka matimba ya tona

Tintsumi I swi vumbiwa swo tsakisa. Hina tani hi vanhu, tani hi vaKriste, hi fika laha hi ti tshembhaka loko hi humelela eka minghingiriko ya hina, yo fana ni ku lulamisa vumundzuku bya hina, ku tilulamisela ntirho ni ku ti hlengeletela xuma.  Kambe Tintsumi tikuma ntsako hiku gandzela Hosi ya tona ni ku endla kurhandza ka Yona.

I malandza yo hetiseka, ti ya hala ni hala hikolaho ka n’winyi wa tona, hambi loko swi vula ku suka etilweni nkarhinyana,  tiendza laha misaveni, laha nkarhi wun’wana tifanelaka ku endlela vanhu ntirho wo vevuka, kufana ni ku endla nkhuvo wa n’wa mbuyangwana Eliya, kumbe u wele emavokweni ya swi ghevenga, kufana ni le Sodoma, laha vaaki vakona va ringeteke ku ti pfinya, Nkarhi wun’wana tin’wana ta tona tinghena eka nyimpi yo hisa swinene ni mimoya ya matimba swinene.

Nkarhi wun’wana tikhoma ntirho wa Xikwembu wa ku avanyisela rifu, tiherisa magidi-gidi ya vanhu.

Tihava vutxiva kufana ni vanhu, kambe tihanya kufana ni vusokoti bya Xikwembu , lebyi hanyelaka ku tirhela tiko ni hosi ya byona (yaxisati), kungari kuti tirhela byona.

 3. Xana tintsumi tita hakeriwa kuva tinga ti tirheli tona vinyi ke?

Ehandle ko va ti gandzela Xikwembu, tintsumi ti rhendzela vanhu , tiendla ntirho wa nkoka swinene wa ku kutsula munhu. Xana tingaka tinga hakeriwi ke, eku averiweni ka misava leyintshwa ke, (ni matilo yo vangama)  na hina siku rin’wana ke?

Naswona, Hosi Yesu Kriste u hakeriwile eka ntirho lowu a nga wu endla ehenhla ka munhu, u tllakusiwile a va evokweni ra xinene ra Tatana, ni ku nyikiwa Mimfumo hinkwayo ya misava, kutani vanhu vona va tshembhisiwile tiharhi ni swiyimo swo hlonipheka?

Hi fanele ku tsundzuka leswaku vanhu va ta fana  ni tintsumi eka vutomi lebyi nga heriki, a va nga vi ni rimbewu,  hina na tona hi ta fana, ni ku hanya swin’we eka matilo ni misava  lamantswha. Eka nkarhi wa sweswi a swikoteki leswaku hina na tona hi tiphina hi vudyelwani, hikuva tona ti hetisekile ni ku  kwetsima, kutani hina tani hi vaKriste, hambi leswi hi kutsuriweke, hile nyimpini ya kulwa ni xidyoho lexi hi xi tekeleleke xa ntumbunuku.

Leswi landzelaka kova xivumbeko xale miehleketweni, ni ku ehleketelela, kambe i miehleketo yo tsakisa, leswaku siku rin’wana hi tava ni vudyelwani bya le kusuhi ni vanghana va hina, ku nga mavandla ya tintsumi. Yin’wana ya tona yi ta ta yi ta tshama etlhelweni ka wena, kutani yi ku hlamusela hilaha yi ku sirheleleke hakona eku hanyeni ka wena, kutani yi ku hlamusela tinghozi leti u nga nghena eka tona, leti wena u nga ti tiveki, ni hilaha yi ku poniseke hakona,  –  a ndzi nge he boxi leswi yi swi endleke eka vana va wena!

4. Xana Xikwembu xi nga va Xi tumbuluxile misava yin’wana yo kala yi nga voniwi ke?

Hi vonile hilaha Xikwembu xi tumbuluxeke swivumbiwa swa le tilweni , leswi nga  ni matshamelo ni maendlelo lama hambaneke kule ni ya hina, xana a wu swi ehleketi leswaku Xi ngava Xi tumbuluxile  ni  misava yin’wana ni swivumbiwa swi n’wana swa vutlhari ni vutivi byi kulu ke, leswi nga vaka swi kumeka ehandle ka tumbunuku lowu hina hinga ka wona ke?

Ahi yimeni hi vona, hi na swo ringana, leswi hi nga swi endlaka evuton’wini bya hina laha misaveni, loko ha hari ni vutomi.

//////////

Leave a Reply

Your email address will not be published. Required fields are marked *