Ta Wansati loyi a nga khomiwa ari vuoswini; John 8:1-11

THIS DOCUMENT MAY BE DOWNLOADED FREE OF CHARGE FOR PERSONAL USE

John 8: 1-11

Hosi Yesu a ya emahlweni a ri karhi a hlaseriwa hi dyavulosi loyi a tshamela ro n’wi kanganyisa leswaku a ta vulavula kumbe ku endla swi n’wana leswi a swi ta endla leswaku a tlula nawu wa Muxe, kumbe ku tlula ndhavuko wa va yuda, kumbe nawu wa varhoma, leswaku a ta va na nandzu eka swa milawu kutani a avanyiseriwa rifu. Hikwalaho ka sweswo a fanele ku va na vuxiyaxiya eka leswi a swi vulaka no swi endla, loko a ku ri hina a hi ta hanya hi ku chava, kambe u yile emahlweni a nga hetiwa matimba, a tirhisa nkarhi wu n’wana na wu n’wana ku tlakusa mpfumo wa Tatana wa yena. Vanhu lava a va tirhisa hi dyavulosi ku endla ntirho lowo biha a ku nga ri vanhu vo ka va nga pfumeri va mpfumo wa varhoma, kambe a ku ri va yuda va vukhongeri lava a va ri na mavondzo eka ntirho wa yena.
Eka siku leri, Yesu u hatlisile a ya Tempeleni, nkarhi wu n’wana a lava ku dyondzisa maendlelo ya ximoya ya mpfumo wa Xikwembu, eka lava nga ta ku tisa magandzelo no dzunisa. Loko a ha ya emahlweni a endla tano, ku humelela ntlawa wa vanhu lava endlaka huwa va ri karhi va susumetana e xikarhi ka vona a ku ri na va farisi na va dyondzisa va nawu va ri karhi va huma na nyuku, va ri karhi va koka wansati wo mpfilunganyeka hi makhwati a ri karhi a rila va nwi tisa eka Yena laha a tshame kona, va endla leswaku a yima emahlweni ka yena. murhangeri wa ntlawa a nga yimelanga leswaku Yesu a vutisa leswaku ku humelela a ri karhi a languta hala na hala a xinyata a tlakusela rito ehenhla aku: “Mudyondzisi, wa nsati loyi hi n’wi khomile a ri karhi a endla vuoswi, eka nawu lowu Muxe a nga hi nyika, ku lerisiwile leswaku wansati wo tano a khandliwa hi maribye, kambe sweswi u ri yini?”
Yesu hi ku hatlisa a vona hi le ka ndhawu ya vona. Nawu lowu Xikwembu xi nyikeke Muxe, hakunene a wu fanele ku landzeleriwa ngopfu eka ti mhaka ta vuoswi. Hikuva Xikwembu a xi lava vanhu va xona leswaku va tsaka no va lava kwetsimaka, xidyoho xi tisa ku xaniseka, na ku khunguvanyeka, ngopfu xidyoho xa ta masangu lexi endlaka leswaku vana va pfumala va tatana wa vona, ku ehleketelana eka nuna na nsati, na ku fika eka ku herisa na vutomi laha nawu wu fikaka wu endla ntirho wa wona, ku nga ri ka wansati la nga na nandzu ntsena kambe na le ka wanuna, wa fanela ku avanyiseriwa rifu. ( Languta Lev 20:10, Deut 22:22, 5:11-31, etc. ). Kambe nawu wa varhoma a wu nga pfumeri leswaku nawu wu n’wana wu avanyisa rifu handle ka nawu wa va rhoma.
Na kambe, Yesu a hlamuserile eka mivulavulo ya yena yo tala leswaku a nga tangi ku ta va muavanyisi, kambe ku ta engetela tintswalo leswaku vanhu va hundzuka. Ntwanano lowu ntshwa lowu Yesu a wu tiseke, lowu nga eka ku tinyiketela ka yena, wu endle ku hambana eka vanhu na swi dyoho swa vona, eka mudyohi na xidyoho, xidyoho xi fanekele ku horisiwa, kambe munhu, loko va tisola u fanele ku hlayiseke, na kambe vadyohi lava ti soleke va amukeriwa va endliwa va aka tilo va le ku fumeni ka xikwembu.
Yesu a hatlisa a swi vona leswaku mhaka leyi a yi nga ri mayelana na wansati loyi wa vuoswi kambe aku laviwa ku phasa yena, goza rihi na rihi leri a ri tekaka eka wansati loyi, ku ngava ku n’wi avanyisa kumbe ku nga n’wi avanyisi a ta avanyisiwa hi valumbeti lava. Loko a ku eka wansati u na nandzu u fanele ku khandliwa, va dyondzisiwa va yena a va ta landzela dyondza ya yena ya yo kombisa tintswalo ta Xikwembu, na kambe u ta fana na va rhangeri va vukhongeri va vajuda lava nga koteki ku rivalela. Loko a kombelela wansati loyi ku rivaleriwa, a ta mangaleriwa eka vafambisi va swa vukhongeri leswaku u tlula nawu wa muxe, kutani a ta avanyisiwa leswaku mpfumelelo wa yena wa vufundhisi wu yirisiwa.
Kambe, ku fana na le ka swiyimo swo tala leswi nga hundza Hosi yi kuma ndlela yo huma ka xiyimo lexi. Lexi a nga xi endla a ku ri ku nga nyiki nhlamulo eka leswi hinkwaswo, kambe a korhamela ehansi a sungula ku tsala, hina la va hlayeke mahungu lawa hi nga vutisa ku a ngava a tsala yini ehansi, kumbe a nga ri ku tsaleni a ri ku khongeleni ka Tatana wa yena leswaku a n’wi nyika nhlamulo ya xiyimo lexi, na leswaku a ta kota ku tirhisa xiyimo lexi leswaku hinkwavo lava a va yimele nhlamulo no hefemula va nga hefemula.
( Leswi swi hi dyondzisa leswaku eka swi yimo hinkwaswo a hi fanelanga ku hatlisa ku a ngula loko hi tshuka hi nghenelerisiwa ku a ngula eka swo karhi.)
Va farisi na va tsari lava a va ri va hehla va wansati loyi a va ri karhi va hela mbilu loko nkarhi wu famba a nga hlamuli nchumu Hosi Yesu, vona va lo ehleketa leswaku u lava ndlela yo balekela ku tlula nawu wa Muxe, hi loko va n’wi tshikelela leswaku a nyika nhlamulo eka mhaka leyi. Enkarhini lowu hinkwavo va lava ka ku hlundzuka ku hundza mpimo, a suka a yima, a languta va hehli va yena emahlweni a ku, “loyi a nga riki na nandzu eka n’wina a hoxi ribye ro sungula eka wansati.”
Vakulukumba exikarhi ka vona, lava a va ri na vutlharhi byo antswa ku hundza lava n’wana, hi vona va nga rhanga va swi vona leswaku se va hluriwile eka kungu leri, loko va ehleketa leswaku eka vutomi bya vona a va hanyangi hi ku tshembheka eka vavasati va vona, va ehleketa na swi endlo swo tala leswi va swi vonaki leswaku a va tava va khandliwile hi maribye na vona. Ku ti avanyisa ka vona ka le ndzeni ku endle leswaku swi va tikela ku avanyisa loyi a nga na nandzu wo fana na lowu va nga wu endla na vona, hikwalaho u n’wana na u n’wana a anakanya leswaku ndlela ya kahle I ku nyenga va hambana na xiyimo lexi xo khomisa tingana.
Hi ku landzelela na va nyengisa xisweswo eka ndhawu ya leyo, endzhaku ka xinkarhana nyana hinkwavo va nyamalala u n’wana na u n’wana hi ndlela ya yena. U n’wana na u n’wana a ri karhi a lwisana na ripfalo ra yena. Kutani e ndzhaku ka nkarhi hinkwavo va nyamalala hi ku hluriwa hi mapfalo ya vona, va chava no langutana e swikandzeni swa vona. Vutlharhi na rirhandzu ra hosi Yesu ro languta ehansi leswaku u n’wana na u n’wana la ti vonaki nandzu a kota ku kuma nkarhi wo ti balekela.
Loko se va helele hinkwavo va hehli va wansati, Yesu a yima hi milenge a vutisa wansati loyi a hehliwaka: “wansati, va kwihi va hehli va wena? A ku na nga ku avanyisa?” yena a n’wi hlamula, “a nga kona Hosi” “na mina a ndzi ku avanyisi”, Yesu a tiyisisa, “famba u nga ha tlheli u ya dyoha.”
Ehleketa ku hlamarisiwe na mihloti yo ntshuxeka hi ku tsaka leyi a yi khuluka emarhameni ya yena. Nkarhi nyana wu ntsongo a langutane na xighwevo xa rifu, kambe sweswi u langutane ma matihlo ya rirhandzu ra hosi Yesu? Tintswalo na ku rivalela I swi tirhisiwa swa matimba leswi byisaka timbilu ku hundzuka.
Hikwalaho hi nga languta hi vuxiyaxiya ndlela leyi Yesu a nga yi tirhisa ku lwisana na xiyimo lexi xa ku lava ku n’wi phasa. A nga ahlulanga leswaku nawu wa muxe wu nga tirhisiwi, kumbe ku pfumelele vuoswi leswaku byi ya emahlweni hi ku tshika wansati loyi, kambe u veka xinawana leswaku loko muavanyisi a ri karhi a ahlula mhaka leyi, a tekeli enhlokweni ku tsana ka munhu leswaku a ka ahluli mhaka leyi hi tihanyi.
Xa vumbirhi, u humesele erivaleni mbilu ya Xikwembu ya tintswalo. I ntiyiso vadyohi lava ti solaka va fanele ku nyikiwa nkarhi wo tlhelele eka Xikwembu, handle ku avanyisela vanhu rifu nkarhi hinkwawo, hikuva siku ra makumu loko ri fika xiluvelo lexi kulu xa ku basa xo avanyisa xi ta yimela ku avanyisa tinxaka hinkwato, hikwalaho sweswi tintswalo ti fanele ku kombiwa leswaku vanhu va balekela vukari lebyi va tsutsumela ka Xikwembu. Munhu u fanele ku kombiwa leswaku ku na ndlela yo hetiseka no tsakisa yo enerisa Xikwembu no katekisa rixaka. Yesu u tile emisaveni, ku nga ri ku ta avanyisa hi ku hatlisa, kambe ku lava no ponisa lava lahlekeke

To copy (DOWNLOAD) tap: Ta Wansati loyi a nga khomiwa ari vuoswini