Vutleriwa empfhukeni

Print Friendly, PDF & Email

A. XANA HI VULA YINI HI KU “VUTLERIWA EMPFHUKENI KE”?

Bibele yi dyondzisa leswaku, ku ta va ni nkarhi wo ringana malembe ya nkombo, lowu diyavulosi a nga ta ringeta ku hlasela ni ku hlula Hosi Yesu. Leswi u ta swiendla hi ku kanganyisa vanhu leswaku va n’wi amukela tani hi Kriste. Lowu wu ta va nkarhi wa nghozi swinene ku va u hanya emisaveni. Hambiswiritano, Hosi Yesu u ta rhanga a susa vaKriste hinkwavo laha misaveni na leswi swi nga se na humelela. Kususiwa ka Ntombhi ya Kriste emisaveni ku vitaniwa ku vutleriwa empfhukeni (ku vutleriwa emoyeni). Ku ta hundzuka masungulo yo fana  ni le ku sunguleni emisaveni ya nkarhi wa hina.

 B. NKOKA WO TIVA VUMUNDZUKU BYA MISAVA

1. I nhlamulo ya ku songiwa/kuhela ka matimu ya vanhu

Loko wo tekela enhlokweni timhaka ta Xikwembu na Rito ra Xona, u nga swi navela ku tiva leswi nga emahlweni ka hina. Minkarhi yin’wana swi tikomba onge xidyoho na diyavulosi hi swona swi fumaka laha misaveni. Xana mhaka leyi yi taya emahlweni ke?  Xana vutomi byi ta fika laha byi nga ta nandziha ke? Bibele hi yona yi  nga  na nhlamulo, kambe hi fanele ku yi dyondza.

Vutomi byi fana  ni buku yo tsakisa  leyi u yi dyondzaka. Xana u nga swikota ku yi pfala ni ku yi tlherisela etafuleni na u nge sena fika emakumu ka yona ke ? E-e, loko wo swiendla, u ta va ni xivilelo xo lava kutiva loko nhenha yi humelerile eku heteleleni.

Switano ni le ka Bibele. Ku ta fikela sweswi u dyondzile matimu ya ku tumbuluxiwa ka swilo,  naswona u swi vonile hilaha swilo swi nga sungurisa xiswona, hikokwalaho, u le ku ti vutiseni hi ta makumu ya swona. U swi vonile hi laha diyavulosi a  onheteleke ntumbunuku wa Xikwembu hakona, ni nkarhi wo leha swonghasi  lowu Hosi Yesu a wu heteke ku va a tlhela a kota ku swi kutsula. Se, xana Xikwembu xi ta ghimeta hi mukhuva wihi matimu lawa yo tsakisa swonghasi ke? Swilava u dyondza Rito, kutani u ta kuma nhlamulo.

2. Swi nyika nhlonhlotelo lowu lavekaka eku tiyiseleni

Kuva u tiva leswi swi nga emahlweni, I nhlonhlotelo wa matimba swinene, leswaku munhu a endla hi laha Pawulo a endleke ha kona, ku nga ku lwa nyimpi leyinene ku fika emakumu, leswaku u amukela harhi ya vutomi (ya vululami) (2Tim 4:7,8). Hambi hi N’wana wa Xikwembu u hlurile nyimpi kola hansi emisaveni hikuva mahlo ya Yena malangutisile eka hakelo ya Yena leyi nga heriki:

…A hi languteni eka Yesu, musunguri ni muhetisisi wa ku pfumela ka hina, loyi a nga chavangiki ku byarha xihambano, a nga vuli nchumu hi tingana ta kona, hikwalaho ka ku tsaka loku vekiweke emahlweni ka yena; kutani sweswi ú tshamile evokweni ra xinene exiluvelweni xa Xikwembu.  (Hev 12:2).

3. Nkarhi se wu hi dyile 

Xivangelo xo hetelela, Lexi endlaka leswaku hi boheka ku khomelela eka dyondzo leyi, hileswaku nkarhi wa ku va swilo leswi swi humelela se wu tshinerile swinene ku tlula eku sunguleni, wu yimile enyangwheni.

C. XANA HI SWIHI LESWI NGA SWA NKOKA EKA HINA KA SWILO LESWI NGA TA HUMELELA ENKARHINI LOWU TAKA XANA?

Ku ni swilo swinharhu swa nkoka leswi nga ta humelela, leswi u faneleke ku swi dyondza:

  1. Ku vutleriwa empfukeni ka vanhu va Xikwembu.
  2. Xitshamo xo avanyisa xa Kriste.
  3. Nkhuvo wa Vukati bya Xinyimpfana.

Tinhloko-mhaka leti hi to ti khumbanyana leswaku ti kota ku pfuna mudyondzi leswaku a kota ku twisisa xiphemu nyana xa swilo leswikulu leswi nga ta humelela emahlweni lomu hi kongomaka kona. Loko ho lava ku  hlamusela hi vuenteleri , swi nga humesa buku yo ringana ni tibuku leti se tinga kona sweswi.

D. I MPFHUKA WA NJHANI LOWU SALEKE NA HI NGA SE VUTLERIWA EMPFHUKENI KE?

Tani hi leswi ku vutleriwa empfhukeni ku nga ta va xilo xo sungula ku va xi endleka, hi boheka ku tiva mpfhuka wa kona lowu saleke.

 Hi minkarhi leyo tala ni tindlela leto tala, Xikwembu xi vulavurile khale na vatatana, hi milomo ya vaprofeta. Kambe emasikwini lawa yo hetelela, xi vulavurile na hina hi N’wana, loyi xi n’wi vekeke ku va mudyandzhaka wa swilo hinkwaswo, loyi naswona xi tumbuluxeke tilo ni misava ha yena. (Hev 1:1,2).

Hi ku pimanisa leswaku Hosi Yesu u tile emisaveni ku hundza 2000 wa malembe lama hundzeke, ni swikombiso swa “ku hela ka masiku” lawa; Hikokwalaho, hi nga vula leswaku se hi hanya emakun’wini ka masiku yo hetelela.

Nakambe, ku ni swikombiso leswi tiyisaka leswaku ku vutleriwa empfhukeni se ku tshinerile. A hi langutiseni swin’wana swa kona.

E. SWIKOMBISO SWA NKARHI LOWU RHANGELAKA WA KU VUTLERIWA EMPFHUKENI

1. Ku tlhelela ka Israyele etikweni ra yena.

Xikombiso lexikulu swinene eka hinkwaswo xa ku vuya ka Hosi Yesu ka xi hantla I ku tlhelela ka vanhu va Israyele Etikweni ra Vona, hikuva I mhaka leyi nga profetiwa eka tibuku leti landzelaka; Yer 30:1-3; Ez 34:11-24; Ez 37; Zak 10:6-10.  Tani hilaha hi nga ta swi langutisa hakona, vunyingi bya swikombiso, leswi nga swilotlelo swa ku hela ka minkarhi swi mayelano na Israyele , hikuva hikona ku nga xivandla lexi ku nga ta lweriwa  kona tinyimpi hinkwato eka minkarhi ya makumu.

Ku tlhelela ka vona etikweni ra vona I hlori lerikulu swinene, hikuva vavile va hangalasiwa ni matiko yo ringana  70 yo hambana-hambana, hi tinguva to ringana  20 , laha nguva yin’we yi nga ni dzana (100) ra malembe, kambe va tima va haya emahlweni va hlayisa ndzhavuko wa vona ni ku ti  hlawulekisa, laha tinxaka tin’wana ta matimba ti lahleke ndzhavuko wa tona. Ku tlhelela ka Israyele Etikweni ra Yena swi sungurile hi lembe ra  1871 , naswona, swivile swi amukeriwa ni ku tiyisiwa loko Nhlangano wa Tinxaka ta Matiko  wu amukerile ku tlhelela ka vona, nikuva wu herisile ku va Nghilandhi/Englatera yi lawula tiko ra vona hi siku ra  14 Mudyaxihi/Maio  1948. Ku ni kwalomu ka 7 wa ma miliyoni ya ma Yuda lawa ma hanyaka Etikweni ra Israyele, naswona, van’wana va ha chololoka va vuya. Vunyingi bya ma Yuda ma nga va se ma kumeka , kumbe ma ta kumeka Etikweni ra Israyele ku hundza emisaveni hinkwayo.

2. Swikombiso swi n’wani 

  • Swikombiso leswi boxiweke hi Hosi Yesu emakun’wini ka Ntirho wa Yena (Ndzi kombela u rhanga u dyondza eka Mt 24:3-14 u nga se na hundzela emahlweni).
    • Rifu leri vangiwaka hi ma dyandza ni mintungu.
    • Tinghozi ta ntumbunuku to fana ni ku tseka-tseka ka misava.
    • Tinyimpi exikarhi ka tinxaka ta matiko ni ti mpfilu-mpfilu exikarhi ka rixaka hi roxe.
    • Ku andza ka vudyoho.
    • Ku titimela ka rirhandzu loku yaka emahlweni.
    • Vanhu lava ti endlaka onge hiloko vari Kriste (vo ti endlisa).
    • Vaporofeta vama vunwa lava hambukisaka lavo tala.
    • Rivengo ni ku dlayana ka vaKriste hikolaho ko hambana ka ripfumelo ra vona.
    • Vunyingi bya vaKriste a va ha n’wi tshembi Hosi Yesu.
    • Mahungu Lamanene se ma huweleriwile eka tinxaka hinkwato.
    • Van’wani va karhi va tiyisela kuyisa emakun’wini , kutani va ta pona.

Hosi Yesu u fananisile mahlomulo lawa ni masungulo ya switlhavi swo lava ku veleka.  Xikwembu Xi tsundzuxa manana loyi a tikeke hi switlhavi swo vava, leswaku a ti lulamisela hikuva nkarhi se hi wona. Loko nkarhi wo veleka wu tshinela, ku kokeka ka tinyama ni switlhavi na swona swa nyanya. Hi nkarhi wo veleka swi tlurisa mpimo, kambe manana a nga ha fanelanga ku dya nkarhi, u fanele ku tiyimisela eka ntirho lowu kulu swonghasi.

Hosi Yesu u tsundzuxile leswaku loko swikombiso leswi boxiweke laha henhla swi sungula ku humelela, hi ku longoloka ka xi hantla, kutani swi vanga ku vaviseka ka xihluku, swi vula leswaku i ku velekiwa ka tiko lerintshwa, ku veleka loku vitaniwaka mahlomulo layo chavisa se ku fikile.

Mahungu yo tsakisa hileswaku Ntombhi ya Hosi Yesu yona a yi nga hundzi hi kona eka switlhavi swo veleka. Loko yi ti lulamisile, yi ta swikota ku baleka ni Muteki wa Yona, leswi swi nga se na fika.

Hi ku katsakanya: timhaka leti  (ta switlhavi swo veleka, v8) tita langutisiwa tani hi swikombiso leswi taka hile Henhla, leswi kombetaka nkarhi wo vutleriwa empfhukeni, hikuva nhlayo ya swona yi ta andza hi xi hatla, naswona hi matimba lamakulu swinene.

Swikombiso leswi nga tata, swi rhangela ku vutleriwa empfhukeni, a swi nga vuri ku avanyisiwa ka xidyoho, hikuva ku tava ka hari nguva ya tintswalo ta Xikwembu, kambe swi tava swi huma eka Hosi Yesu tani hi ku vitana ka Yena eka Ntombhi ya Yena, leswaku yi teka xiambalo xa Yona xa nkhuvu, xo pfumala xivati, naswona, xo tenga, nakambe, yi sasekisiwile yi helerile , hikuva Muteki u ta va se a yimile enyangwheni . Haleluya!

Hi nkarhi wa malembe ya nkombo ya mahlomulo yo chavisa, swikombiso leswi swi ta andza hi matimba swinene, tinghozi ta ntumbunuku to chavisa tita humelela ehenhla ka vanhu, hi vukarhi lebyi kulu swinene tani hi ku avanyisiwa ka vona lava n’wi landzuleke tani hi Muponisi ni Hosi.

  • Swikombiso leswi boxiweke hi muapostolo Pawulo

Yena u vulavurile hi vutomi byo onhaka, vudyoho bya vanhu lebyi nga ta andza hi nkarhinyana ku nga se na humelela mahlomulo yo chavisa swine-ne, naswona, vudyoho ku ta va bombo eka vona. 

Tiva leswaku emasikwini ya makumu, ku ta fika minkarhi yo nono-n’hwa. Hikuva vanhu va ta va lava tirhandzaka, va ta va lava rhandzaka mali ngopfu, ni ku tikurisa, ni ku titiva, ni ku rhukana; va ta va lava nga yingisiki vatswari va vona, lava nga riki na ku nkhensa, lava nga khongeriki; va ta va vanhu va tihanyi, lava nga riki na ku tsetselela, valumbeti, lava nga tikotiki, lavo leva, lava vengaka leswo lulama; va ta va timbabva, vanhu va futa, lava nga ni manyunyu, lava rhandzaka ku tiphina ku tlula ku rhandza Xikwembu. Va ta tiendla wonge hi loko va ri ni vukhongeri, kambe va ta ala matimba ya byona. Fambela kule ni vanhu lavo tano. (2 Tim 3:1-5).

Swikombiso leswi swi vile kona etinguveni hinkwato, kambe swita andza hi matimba swinene loko se hi tshinela eka nguva yo vutleriwa empfhukeni.

  • Vumbhoni bya Moya lowo Kwetsima

Moya wa Xikwembu na Wona wu ta veka vumbhoni endzeni eka vana va Xikwembu leswaku nkarhi wo kutsuriwa ka vona se wu fikile.

F. KU VUTLERIWA EMPFHUKENI

Hosi Yesu a nga ta pfumela leswaku Ntombhi ya Yena yi hundza hile ka nkarhi wa nghozi, wa mahlomulo layo chavisa. A yi nga ngheni emaxangwini yo xanisiwa hi rixaka ro pfumala Xikwembu, hambi kuri vukarhi bya Yena a by inga weri ehenhla ka tiko leri tiarisaka, hikokwalaho, Ntombhi ya Yena yi ta susiwa ka ha ri ni nkarhi.

(Ndzi kombela u rhanga u dyondza eka 1Kor 15:50-52 nale ka 1Tes 4:13-17, u nga sena hundzela emahlweni)

A hi katsakanyeni leswi hi swi dyondzeke eka Matsalwa lawa:

  1. Kuta biwa mhala-mhala hile tilweni.
  2. Hosi Yesu u ta xika hi ku huwelela.
  3. Kambe a nga fiki emisaveni.
  4. Vakwetsimi lava hundzeke emisaveni, la va nga eku rindzeleni ePara-deyisini, va ta N’wi hlanganisa.
  5. Va ta pfuxiwa va ri ni miri ya le tilweni.
  6. Vakwetsimi lava va nga tava va ha hanya emisaveni, va ta hundzuriwa emirini .
  7. Hinkwavo vakwetsimi va ta pfuka, kutani va hlangana na Hosi Yesu empfhukeni .
  8. Va ta famba na Yena etilweni.

Hi nga vula yini swin’wani ke? Hikuva Tsalwa ri swi hlamusela erivaleni riku: Eku biweni ka mhala-mhala, Hosi Yesu u ta fika ku ta hi teka, hina Ntombhi ya Yena. U ta endla leswaku, lava feleke eka Yena, va rhanga va pfuka, kutani ku landzela hina lava hi nga tava ha ha hanya. Hi ta ambexiwa miri ya le tilweni, naswona, hinkwerhu ka hina hi ta vutleriwa empfhukeni hi hlanganisa Jhaha ra hina rale tilweni. Haleluyaaa! Hawuu, ku tava siku lerikulu swonghasi!

A hi tiveni leswaku Hosi Yesu a nga ta fika emisaveni, kambe U ta hi vutlela eka Yena, laha a nga tava a hi rindzerile kona empfhukeni.  Un’wana u te; swifana ni kuva u ri ni bokisi leri tatiweke hi tyhaka ni swi nsimbhansi-mbhana, kutani, u nembeleta maghinete/xoke wa matimba swinene – wa ghezi e henhla ka bokisi. Hiku layithiwa ka maghinete, swinsimbhani hi-nkwaswo swi ta vutliwa swi huma e bokisini swi ya namarhela maghinete, ku sala tyhaka roxe ebokisini.

G. MISAVA ENDZHAKU KO VUTLERIWA EMPFHUKENI

 Ku vutleriwa empfhukeni ku ta humelela tani hi xitshuketa lexikulu swi-nene eka vamatiko, lava nga pfumeriki. A va nga yi kumi nhlamuselo ya swona, hambi kuri ku tiva nhlayo ya ma miliyoni ya vanhu lava va nga tava va nyamalarile.

Mabindzu, mafabrika, masimu ni mimfumo swi tava swi lahlekeriwile hi swilo swa swona swa nkoka, naswona, swi ta teka tin’hweti to hlaya ku va ku leteriwa vatirhi van’wana va ku va siva. EKonomi ya misava hinkwayo yi ta khinsama, ni ku wela makumu yi nga ha pfuki. Misava hinkwayo yi ta khomiwa hi nchavu ni ku hela matimba hi ku lava tinhlamulo eka vula-visisi.

Hikona eka vuhava lebyi, laha vanhu lavo homboloka hinkwavo va nga ta nghena kona, etikweni leri diyavulosi a nga tava a ri lulamisile, nikuva a ri ni matimba eka rona. Kutani, u ta wonga misava hinkwayo, a yi byela le-swaku yena I nhlamulo ya swi rhalanganya swa vona hinkwaswo, kutani, u ta amukeriwa hi mavoko mambirhi, lama pfulekeke.

//////////