Matt 15: 21-28
- Eka xiphemu xa hungu leri ku hlamuseriwa leswaku Yesu u endzele tindhawu timbirhi ta Tyre na Sidon. Leti a ti ri e handle ka bodara ya Israel. Endzhaku nyana Yesu u hlamusela leswaku yena a rhumiwile ku ya eka tinyimpfu leti lahlekeke ta Israel. Kambe laha hi n’wi kuma eka va matiko laha mu Israel a nga ta khandziya kona. Na va dyondzisiwa va yena va fanele a vone leswi swi nga tolovelekanga, nkarhi wu n’wana hi nga ehleketa kuri kumbe hi leswi va rhangeri va Israel va swa vukhongeri a va nga n’wi amukela, hikwalaho a endzelaka va matiko? E-e kambe hi leswaku e ndzhaku ka rifu ra yena no pfuxiwa eku feni, evhangeli yi fanele ku famba eka misava hinkwayo. A teka goza ro sungula ro hangalasa evhangeli eka matiko, ku nga ri ka va yuda ntsena, a nyika xikombiso eka vadyondzisiwa va yena leswaku va endla tano loko yena a hundzile emisaveni no tlakuseriwa e Tilweni.
- Kumbe mhaka leyi ya le erivaleni na ku navela ku endla leswi nene hi xona xivangelo eka wansati loyi wa vamatiko, mukanana loyi, loyi a nga xinyata a landza Yesu ku ya n’wi khongela hikwalaho ka n’wana wa yena wa ntombi. Hi ku lerisiwa hi Xikwembu, Joshua u lerisiwa ku herisa va kanana hinkwavo hi kwalaho ka leswo biha a va swi endla. A va nyikela vana va vona eka swikwembu swa hava, swa vuoswi a swi endliwa etitempeleni na kona a va nga rhandzi ku hundzukela eka Xikwembu.
- Kambe eka tiko ri n’wana na ri n’wana ku na vanhu lava nga na torha ra Xikwembu kutani xiva tekela enhlokweni na Xona, kutani xi va rhumela eka loyi a nga ta va humesela Vukulukumba bya Xikwembu leswaku va vuyelelana na Xona, leswaku va tava na xiave eka mfumo wa xona, laha hina wansati loyi a nga tekela enhlokweni hi Xikwembu, Xi rhumela n’wana wa Xona ku suka ekaperumawume leswaku a famba ku ta fika eka miako leyi, hi ndlela ya leyo, Xi teke goza ku endlela leswaku wansati loyi a hlangana na Muponisi.
- A ku ri na swirhalanganyi swo karhi leswi a fanele ku swi hlula. Xi n’wana xa swona a ku ri leswi a nga wansati, a tshikileriwa hi ndhavuko wa nkarhi wa lowo ku va endzhaku. A swi nga amukeleki leswaku eka leswi a swi lavaka a kongoma Yesu ku fana na leswi vava nuna va n’wana va swi endleke, xikombiso, Bartimiya. A ta hlamariwa hi vava nuna lava ri kwalaho, ngopfu lava a va famba na Yesu.
- Kambe wansati loyi a twile hi timhaka ta Yesu, na leswi a swi endlaka, yena n’wana wa hosi ya Israel yo rhandzeka Hosi Davida, hi ku pfuniwa hi moya lowo kwetsima a swi vonile leswaku loyi a ngo va munhu ntsena. Hikwalaho a n’wi vitaneke Hosi.
- Loko mbilu ya munhu yi va na torha ra Xikwembu, hakunene Xikwembu xi ta tihumelerisa eka munhu wa loye. Loko munhu a famba eka ku ti nyiketa loku heleleke, hi kuya hi ku vonakala loku humaka etilweni, hambi ku ri ku vonakala loku ntsongo, Xikwembu xi engetela ku titwa ka ximoya ka le ndzeni. Vona leswi Yesu a swi vulaka eka John 14: 21, “loyi a nga na ku lerisa ka mina a ku yingisa, hi loyi a ndzi rhandzaka, loyi a ndzi rhandzaka, na Tatana u ta n’wi rhandza, kutani na mina ndzi ta n’wi rhandza kutani ni ta ti hlawutela eka yena.”
- Xi n’wana lexi hi faneleke ku xi anakanya hi leswaku a ri manana wa muti, va manana I tintsumi ta nkoka ta Xikwembu loko swi ta eka ntirho wa vana va Xona. Nkarhi wu n’wana tatana a nga sukela n’wana loyi a nhlanganaka nhloko, kumbe loyi a tshamelaka ku vabya, kambe manana u ta tshama a n’wi tlakula hambi a ri ka xiyimo xexo; hikuva hi loyi a n’wi rhwaleke ekhwirini ra yena, u le ku suhi na mbilu ya yena, hambi loko swi fika eka n’wana loyi a ha dyondzaka xijaha kumbe xinhwana, hi vutomi bya yena byo karhata no tilavela swa yena ntsena, no hanya vutomi bya vudyoho, swi vavisa manana swinene, manana u ta tsundzuka hi laha a n’wi an’wiseke ha kona evutsongwaneni bya yena, a n’wi xinga no n’wi bebula, manana u ta tshama a rivalela n’wana wa yena nkarhi wu n’wana na wu n’wana no n’wi endlela leswi a swi pfumalaka. Hikwalaho na le ka xiyimo lexi a hi tatana la kombelelaka n’wana kambe I manana.
- Xana Yesu u hlamule njhani eka xiyimo lexi xo vavisa xa manana loyi a rilaka, “ndzi twele vusiwana Hosi, n’wana Davida, ntombi ya mina yi ngheniwe hi demoni.”
- A nga n’wi hlamulanga. Swi nga languteriwanga, na yena wansati loyi a ya emahlweni a ri karhi ku huwelela hi ku vuyelela, a ri karhi a n’wi landza hi le ndzhaku a ri karhi a engetela ku huwelela na marito yo vuyelela, ku fikela loko swi nyangatsa vadyondzisiwa va hosi Yesu, va ku ka yena. “N’wi miyeti u n’wi hlongola laha hikuva u hi landzelela a ri karhi a huwelela” va ri karhi va gungula.
- Swi languteka onge Yesu a ri karhi a ehleketa hi xiyimo xa wansati loyi, hi ndlela leyi a phikelela ku kombela. Kambe leyi a ku nga ri mhaka, hikuva nhlamulo ya yena eka vadyondzisiwa va yena yi ti komba tano, kahle kahle a ri na mhaka na yena, na kona e moyeni wa yena a ri ku n’wi languteni, na kambe a nga ri na mhaka ngopfu na xiphiqo xa yena, kambe a ri ku ehleketeni leswaku wansati loyi wa vamatiko, loyi a nga kule na Yerusalema, loyi a nga na ripfumelo leri nga tsekatsekiki eka Yena. A lava ku vona leswaku ri pfumela leri ri ta anama ku fika kwihi hikwalaho ka n’wana wa yena ku amukela ku horisiwa. Hikwalaho matshanwini yo hlamula xikombelo xa va dyondzisiwa va yena, u hlamula wansati loyi aku: “ndzi rhumeriwa ntsena eka tinyimpfu ta Israel leti lahlekeke” “u endle kahle” vadyondzisiwa va ehleketa, “leswi swi ta veka wansati loyi wo karhata eka ndhawu ya yena” kambe E-e leswi a swi n’wi hetanga matimba na swi ntsongo; “hikwalaho ka yini a tile etikweni ra vamatiko?” wansati a ehleketa embilwini ya yena. Swa kahle hi leswaku a nga n’wi hlongolanga hi laha vadyondzisiwa a va naverile swona.
- Kutani a luka ya n’wana mano yo kuma leswi a swi lavaka, ya matimba. A tsutsumela emahlweni, a tiwisela emilengeni ya yena leswaku a boheka ku yima a ri karhi a rila hi rito ro titsongohata: “Hosi ndzi pfuni!” kwalaho Yesu a hlamala ku tlurisa. Leswaku wansati loyi wa vamatiko u na ripfumelo ro kota ku hlula swirhalanganyi hinkwaswo, a ri karhi a n’wi languta a ri ku suhi, kutani a ku: “ a swi fanelanga ku teka swa ku dya swa vana u nyika timbyana” kutani ku kanakana ku sungula ku n’wi fikela, hikuva eka rixaka ra Israel vanhu va kanana a va fanisiwa na timbyana, kambe a sungula ku ti hlohlotela leswaku u fanela ku ya emahlweni a nga languti ku tsan’wiwa ka yena. “Ina Hosi, kambe na tona timbyana ta dya marhambu lama waka tafuleni ra n’wini wa tona.” Ku hlamala ku engeteleka hi ripfumelo leri tsandzaka swirhalanganyi hinkwaswo, Yesu a n’wi hlamula aku: “wansati, ripfumelo ra wena i ri kulu; a swi endleke hi ku rhandza ka wena,” kutani n’wana wa yena a hanyisiwa hi nkarhi wolowo.
- Xitori lexi khomekaka swi nene. Ku pfumela a hi ku tshembha leswaku Xikwembu xina matimba yo ndzi katekisa, kambe hi leswaku Xi rhandza ku ndzi katekisa hikwalaho ka leswi ndzi nga xivumbiwa xo hlawuleka ematihlweni ya xona, na kambe hi leswaku ku pfumela I ku tshembha leswaku Xikwembu xi na rirhandzu na vunene, xi tele tintswalo na kambe xi lulamele ku endla leswi nene eka hinkwavo lava xi tshembhaka, ku pfumela I ku tshembha ko fana na loku n’wana a nga na kona eka manana wa yena. Ku pfumela a hi mhaka yo tika leyi munhu a nga ta ka a nga koti ku yi fikelela, ku pfumela I ku tshama emilengeni ya Yesu.
- A hi lavaneni na ku leha mbilu no kondletela ku fikelela leswi hi swi lavaka. Ku fikelela loko ri pfumela ra hina ri kula ku fana na ra wansati wa mukanana, leri nga endlaka leswaku Hosi yi hi endlela masingita lama kulu na hina.
//////////