Wansati wa muSamariya - M2819 Bible Studies

A. FAMBISIWA HI MOYA (YOH. 4:4-6)

A capitulo leyi yi vulavula hi wansati loyi vutomi bya byi cinciweke hi xihlamariso.
Lexi i xitoriya xa matimba lexi hlamuseriwaka eka xiahluko lexi. A hi xi languteni hi ku suhi. Yesu a fambe etindhawini to tala, kambe ngopfu eka matiko ya le kusuhi ni Yerusalema eka province ya Yudiya. A Yerusalema a yi ri yonsa ntsindza ya Vayuda, laha nhlayo yo tala ya varhangeri va vukhongeri a yi kumeka kona, ku fana ni; Va-Farisi, Va-Saduki, Vatsari ni Vaprista. Hi kona laha a ku ri ntsindza ya timhaka ta vukhongeri bya vona. A varhangeri lava a va ri ni vukwele na Yesu hikwalaho ka leswi a a amukerisiwa swona hi vanhu etikweni. Yesu a a swi tiva leswaku va ni makungu ya ku n’wi dlaya. Enkarhini wa kona, a wu nga se fika nkarhi wa leswaku Yesu a fela swidyoho swa vanhu. Kutani a teka ndlela yo ya eGaleliya kuya dyondzisa vanhu kona. Hi ku huma ka yena etikweni, a swi pfuna ku vohlisa vukarhi bya bya varhangeri va vukhongeri lebyi a va ri na byona hikwalaho ka Yesu.
A rito ri ri, a a fanele ku hundza hi le Samariya. A yi ri yona ndlela yo tsemakanya kuya eGaleliya, kambe a Vayuda a va famba hi ndlela yo leha, a va fanele ku khupuka hi nambo wa Yordan leswaku va nga ngheni hi le Samariya. Hikwalaho ka yini? A nhlamulu ya mhaka leyi yi sukela endzhaku swinene. Loko Va-israele va khomiwe va yisiwa vukhumbini hi Va-siriya, a vamatiko lava a va huma ematikweni hinkwawu ya Babilona a va tshama Samariya na va rhangeriwa hi hosi ya Asiriya. A vanhu lava a va nga xi tivi Xikwembu, a va gandzela swifaniso ni ku nyikela vana va vona va hisiwa, va endla magandzelo hi vona. A mahanyelo ya vona ma endle leswaku Xikwembu xi hlundzuka, xi ko ri rhumela tinghala ti ya va dlaya. (2 Tihosi 17:24-28) Ka hlamuseriwa hi hosi ya Asiriya, leswaku ku rhumeriwe muprista wa muyuda, wa ku sukela evukhumbini bya le Babilona, leswaku a ya dyondzisa matirhelele ni machavele ya Xikwembu xa Israele. A muprista loyi a a tshama eBetele kwale a xifundza-tsongo xa Samariya, kutani a dyondzisa vanhu hi ta matsalwa ya xiyuda. Kambe a va yi amukelanga hi mbilu hinkwayo a dyondzo ya muprista, va vone swi ri swinene ku tirhela Xikwembu ni swifaniso swa vona. Hi ku endla leswi, a va le ku endleni ka swidyoho swo fana ni leswi Va-israele va swi endleke, swidyoho swa ku gandzela swifaniso leswi endleke leswaku Xikwembu xi va khatisa hi kuva yisa evukhumbini. Kasi ntlawa wun’wana wa vayuda lowu a wu tshama eYudiya, lowu yisiweke eBabilona tani hi hlonga, lowu loko ku hundze nkarhi lowu Xikwembu a xi wu vekile, va nyikiwe mpfumelelo wa ku tlhelela eYerusalema wu ya pfuxa muaku wa tempele ni makhumbi, se a wu horisiwile eka vugandzeri bya swifaniso. Hi ndlela leyi, a vayuda a va zondha swinene va le Samariya ni vugandzeri bya vona bya swifaniso naswona a va va langutela ehansi swinene, hikwalaho ka swona, a va nga lavi ku tihlanganisa na vona. Hi ndlela yolela, a va nga lavi hambi ku tsemakanya hi le tikweni ra vona. Na vona va Samariya a va nga va amukeri vayuda etikwemni ra vona. Va le Samariya a va tiakele ni tempele ya vona entshaveni ya Gerezim, leswaku va nga ha yi eYerusalema kuya gandzela etempeleni ya vayuda.
Xana a swi ri swinene leswaku vayuda va endla hi ndlela leyi xana? I ntiyiso leswaku a vana va Xikwembu va fanele va tivonela, va nga tihlanganisi ngopfu ni lava nga pfumeriki, hikuva a mfumu wa munyama a wu twanani ni mfumu wa ku vonakala, hikuva ya lwa hi mimbirhi ka yona. Hikuva un’wana ni un’wana wu ringeta hi matimba ku hlula luwun’wana. A vana va Xikwembu a va faneri ku tihlanganisa ni vamatiko eka vugandzeri bya vona hambi hi le ka leswi a tiphinaka hi swona, hikuva ntalo wa hinkwaswo leswi va swi endlaka swi va yisa enghozini yo fularhela Xikwembu. Kambe a va nga faneli ku va avanyisa ni ku va tekela ehansi, hambi hi ku tibyela leswaku va phela ku va tlua. A va-kriste va fanele ku rhandza vahedeni ni ku lava tindlela leti va nga kotaka ku va byela hi tintswalo ta Xikwembu eka mudyohi. Naswona a va faneli ku chumayela ntsena lava nga ku suhi ni makhumbi ya tikereke ta vona, kambe va fanele kuya fikelela ni lava nge kule, va va byela timhaka ta mahungu lamanene ya ku ponisiwa.
Leswi hi swona leswi Yesu a swi endleke. Hambileswi tata wa yena a a n’wi lnagutele ku tirha ntsena ni vayuda, kuve ni ku hambana eka Yesu, loko a fike etikweni leriya, a kume leswaku ku na vanhu lava nga ni torha ra ku twa mahungu ya mfumu wa Xikwembu. Na kholwa leswaku Yesu a yisiwe hi Xikwembu endleleni yo tsemakanya hi le Samariya hi nkarhi ni siku leri fanelaka, leswaku a ta hlangana ni wansati la fanelaka.

B. MUPONISI LOYI A A RI NI TORHA NI HIKA LERI A RI RI NI TORHA. (YOH. 4:7-15)

A wansati wa le Samariya a te ku keni ka mati exihlobyeni ni nhlikanhi, hikuva enkarhini lowuya a swi nga ri ni xitalo leswaku vanhu va ya eku keni ka mati. A a ri ni vito ro biha etikweni leriya, hikuva a a ngange ntlhanu wa vavanuna, kambe hinkwavo a a hambane na vona, kutani eka nkarhi lowuya a a hanya ni mbhuzi, loyi naswona a a nga ri nuna wa yena. Hi swona leswi n’wi endleke a ya eku keni ka mati hi nkarhi wo hambana ni lowu van’wana va va sati a va ya hi wona xihlobyeni, hikuva a va n’wi poyila. A fanele a hlamarisiwile ngopfu swinene loko a kume wanua a tshamile exihlobyeni, naswona a ri wanuna wa myuda!
Xin’wana xihlamariso eka loyi wansati, hi loko loyi wanuna a kombela mati yo n’hwana. Wa nga vona hi laha Yesu a a titsongahata hikona ku fikelela munhu la tikurisaka. Hi ku kombela mati, a a tiveka eka xiyimo xa loyi a tsandzekaka ku tipfuna hi yexe. A vula leswaku; “Ni kombela leswaku u ni pfuna. Ni twa torha. Ni kombela mati yo n’hwa?” Wa vona hi laha a kombiseke vumunhu hikona leswaku a kota ku n’wi fikelela. A a fana ni xinyimpfana xitsongo lexi hantlisaka ku khomiwa hi ku chava kutani xi tsutsuma xi famba. A ku pfuleka ka Yesu ku endle leswaku loyi wansati a vulavula na yena, a ku; hikwalaho ka yini a hambana ni van’wana vayuda, a nga endli kuya hi laha va endlaka hi kona.
Leswi nyike Yesu nkarhi wa tsumburisa loyi wansati leswaku a a ri mani.. Yesu a endle leswi hi kutsongo, a nga endlanga hi magugu leswaku wansati loyi a kota ku amukela leswi Yesu a a vula swona. Yesu a ku: “Loko a wu tivile ku nyika ka Xikwembu ni loyi a nge eka wena, ndzi nyiki mati ni n’hwa’, a wu ta kombela ka yena, kutani yena a a ta ku nyika mati lama hanyaka” A a lava leswaku a tsumbula leswaku Yesu a hambanile ni vanhu lava a va tivaka, a lava leswaku a tiva leswaku Yesu i nyiko ya Xikwembu eka vanhu.
Yesu a ringete ku n’wi yisa eka swilo swa moya, kambe mhaka ya ta vukati a yi nwi xanisa miehleketweni ya yena. Kutani loyi wansati a vutisa Yesu a ku: “Xana u nkulu eka tata wa hina Yakobo, loyi a hi nyikeke xihlovo lexi, a n’hweke ka xona yena ni swifuyo swa yena xana? Xana a mati lama hanyaka u nga ma kuma kwihi wena? Nkarhi un’wana a a hleketa leswaku mati lawa a vulavulaka hi wona, ma nga va ma ri ya ku pfelela hi le hansi.
A ringete ku vulavula leswi ni leswiya, kambe a a karhi a hleketa hi mhaka leyi. Yesu a ya emahlweni a n’wi vula leswi: “Un’wana ni un’wana la n’waka mati lawa, a ta tlhela a twa torha, kambe loyi a nga ta n’hwa mati lawa ndzi nga ta n’wi nyika wona, ku tava ni swihlovo swa mati lama khulukelaka evuton’wini eka yena, kutani a nga ka a nga ha twi torha. Kutani a mati lawa ndzi nga ta nwi nyika wona ma ta n’wi yisa evuton’wini lebyi nga heriki.” Kambe a miehleketo ya yena a ya ha langute eka mati lama voniwaka hi mahlo ya nyama, hikwalaho ka leswo, a hlwerile ku twisisa leswaku a vulavula hi mati eka xiyimo xa moya, mati ya hika. Hambiswiritano, loyi wanuna a a le ku nyanyuleni ka loyi wansati hikuva a a vulavula hi matimba. Xana a a ta n’wi nyika swin’wana leswi a a nga swi tivi? Xana a a ta endla mahlori yo n’wi nyika mati lawa a ma ta va eka yena hi laha ku heriki, ivi a nga ha ti eku keni la xihlobyeni? Na tshemba leswaku a yi tava nyiko yikulu eka yena! Hikwalaho loyi wansati a n’wi hlamule a ku: “Ndzi nyiki mati lawa leswaku ndzi nga ha ti tlhela ndzi twa torha naswona ndzi nga ha ta tlhela ndzi ta la ku keni.”
Yesu a nga hi sindzisi ku endla nchumu, a hi nyika ntsena leswi hi n’wi kombelaka swona, loko a vona leswaku ha n’wi pfumela hi ntiyiso, wa hi nyika hikunene. Loko vanhu va ta eka yena, minkarhi hinkwayo a va vutisa, a ku: “U lava leswaku ndzi ku edlela yini”? A wansati loyi a a lava ku endleriwa mahlori mayelano ni mati, kambe a a nga twisisi leswaku i yini, kutani Yesu a ya emahlweni a n’wi hlamusela hi ku antswa, leswaku a kota ku twisisa leswaku a xivelelo xa yena he xihi, hikuva a xi ri xa torha ra hika ra yena, mati lawa i rito ra Xikwembu leri a ri fanele ku nghenisa vutomi bya moya eka yena, hikuva vutomi bya yena a byi ri bya tingana. A a vilela nyiko ya Xikwembu leswaku yi n’wi nyika vutomi lebyi nga heriki ni vutomi byo lulama. A vutomi lebyi Xikwembu a xi lava ku n’wi nyika byona, a byi fana ni mati lama khulukaka ma khapa-khapa ma fikelela swiyimo hinkwaswo. Hinkwaku laha a fanele kuya kona a a fanele a khapa byona.

C. NHLAVUTELO NI KU TIVULA. (YOH. 4:16-19)

A kuva a kuma vutomi lebyi eka Xikwembu, a a fanele ku rhanga a kuma ku twisisa ni ku pfumela leswaku a vutomi bya yena a byi bihile, kutani a a fanele ku ti vulela hi nomo wa yena. Yesu a n’wi pfunile leswaku a ko a fikelela eka xiyimo lexi xa ku tivula. Yesu a te ka yena: “Famba u ya vitana nuna wa wena.” Tiva leswaku loyi a wansati a a nga boheki ku kuma mpfumelelo wa yena hi nuna leswaku a nyikela vutomi bya yena eka Xikwembu. Lexi ni pfumelaka xona, hi leswaku Yesu a a n’wi lava nuna wa yena leswaku va ta ta lulamisa leswi onhakeke, ku nga ri leswo ntsena, kambe ni ku ta ta pfumela leswaku a vutomi bya yena a byi nga ri kahle, a byi fana ni xilo lexi feke lexi nun’hwaka, lexi a a fanela ku xi funengeta a xi fihla xi nga voniwi hi vanhu. Lexi hi xona xivangelo lexi a nga ta ku keni ka mati hi nkarhi wa nhlikanhi na a ri yexe, leswaku a nga ta hlangana ni munhu. A vutomi bya yena a byi nun’hwa ngopfu lero, a vanhu vo tala a va swi venga ku hlangana na yena. Loko wansati a tekiwile ka ntlhanu, ivi a tsikiwile ka ntlhanu, kutani sweswi a hanya ni wanuna wa vumune, ku fanele ku ri ni mhaka yo enta yi filhekeke eka yena, leyi a yo tiviwa hi yena ntsena. Yesu a a ri karhi a funungula swilondza leswi a a swi funengetile, kutani loyi wansati a a nga swi tsakeri! Hikokwalaho a nga hlamula etinganeni na a languta etlhelweni a ku, “A ndzi na nuna.” Wa nga vona hi laha swi tikaka hinkona eka mudyohi ku vula leswi biheke evuton’wini bya yena. Xikwembu xi nga ka xi nga rivaleri swidyoho leswi fihliwaka. Xi nga ka xi nga nyiki vutomi lebyi nga heriki eka lava yaka emahlweni va hanya vudyoweni, va tiphina hi byona. Hi fanele ku nyikela vutomi bya hina hi voko ra hina ra ximatsi, ivi hi lera xinene hi amukela vutomi lebyi nga heriki. Leswi katsa ni ku rivaleriwa ka swidyoho ni ku nyikiwa mbilu yintshwa leyi Moya lowo Kwetsima wu nga ta hanya eka yona.
Yesu a swi vonile swphiqo leswi a a ri na swona, kutania n’wi pfuna hi ku n’wi ponisa loko a tivurile swidyoho swa yena. Kutani Yesu a n’wi hetisela hi ku n’wi hlamusela leswi yena a nga xi swona: “ I ntiyiso leswi u vulaka swona, loko u ku: ‘A ndzi na nuna, hikuva u hanyile ni ntlhanu wa vavanuna, kutani loyi u hanyaka na yena a hi wa wena. U vule ntiyiso.” Languta leswi a nga vaka a chavise xiswona, ku twa wanuna wo kala a nga n’wi tivi, a n’wi paluxela vutomi lebyi a a ringeta ku byi funengeta. Kambe na pfumela leswaku hi nkarhi wolowuya, a wansati a a kuma ku tshunxeka embilwini ya yena, ku kuma munhu loyi a a tiva vubihi bya yena hinkwabyo kambe a nga n’wi chipisi ni ku n’wi fularhela. A swi tsumburile leswaku wanuna loyi wo kala a nga n’wi tivi, a nga tshuka a ri muprofeta wa Xikwembu, hikuva i munhu loyi a nga ni vuxaka byo enta ni Xikwembu loyi a nga kotaka ku paluxa leswi filhiweke. Hikokwalaho wansati a n’wi hlamule a ku: “ Ndza swi vona leswaku u muprofeta.” Hi ku vula leswiya a a le ku pfumeleni leswaku leswi Yesu a swi vuleke a a ri ntiyiso.
U nga vula u ku: “Onge ni nga fana na Yesu loyi a a tiva swihundla leswi a swi fihliwile swa vanhu, hikuva a ni ta kota ku va kholwisa hi ntiyiso ya Evhangeli.” A ntiyiso hi lowu, Xikwembu xa avela tinyiko to fana eka lava lavaka ku xumayela evhangeli. A nyiko ya kona yi tiviwa leswaku i nyiko ya vutivi.’ Hi dyondza hi yona eka 1 Va-korinto 12:8, hi ta dyondza hi yona loko hi fika eka xiahluko lexi vulavulaka hi hi tinyiko ta moya. U nga tidyondzela hambi hi nga se fika eka xona, kutani u kombela Xikwembu leswaku xi ku nyika nyiko leyi ni tin’wana.

D. KU PONISIWA (YOH. 4:20-26)

A hi tlheleleni ka wansati exihlobyeni. A miehleketo ya yena se a yi nga ha le ka mati ya ntolovelo, kambe eka mati ya ximoya. A a khumbekile hikuva a ntiyiso mayelano ni vutomi bya yena se a wu hume rivaleni. A a nga ha lavi ku languta vutomi bya yena ntsena, a ya emahlweni a heta nkarhi hi ku vulavula hi ta vukhongeri bya yena. Hi leswi vanhu vo tala va endlaka swona loko ntiyiso ya leswi va swi endleke yi huma erivaleni. Loko vo za va tsumburiwa, va sungula ku yima emakhoneni va vutisana mavito ya tikereke, leswo va endlela ku vulavula hi swilo swin’wana ku nga ri hi vona vinyi. Na yena a hlamule a ku: “Va tata wa hina va gandzele Xikwembu entshaveni leyi, kambe n’wina mi ri ndhawu yo gandzelela ka yona hi le Yerusalema.” Vona a Vasamariya va ake tempele ya vona entshaveni ya Gerazim, kutani a xivutiso lexi a xi vutisiwa hi lexi nge; “Xana he yihi kereke ya ntiyiso? Xana hi leya vayuda eYerusalema, kumbe hi leya va Samariya entshaveni ya Gerazim? Na hina ha ha ri na swona swivutiso swo fana. “Xana he yihi kereke leyi ni nga lumbaka yona leswaku siku ra makumu ni ta ya etilweni. Xana hi leya Evangelica kumbe Baptista, Adventista do Setimo dia, kumbe Reformada, Back to God Moviment, Igreja de Deus, Presbiteriana kumbe Metodista, Kumbe Catolica, kumbe Velha Apostolica, kumbe Zioni? “Van’wana va nga ku, a tikereke se ti tele”, kambe van’wana va nga ku, “swo fana ni titshamela ekaya ni tin’wela byala ra mina kumbe ni ya titshamela enambyini ni rtiringelela na ni ri karhi ni ti hleketelela hi Xikwembu xa mina.”
Hosi Yesu a n’wi hlamule hi marito ya vutlharhi a ku ka yena; “Pfumela ka mina wansati, nkarhi wa ta ni sweswi wu fikile, lowu mi nga ta kala mi nga ha gandzeri Tatana entshaveni leyi hambi hi le Yerusalema. N’wina mi gandzela lexi mi nga xi tiviki; kambe hina ha xi tiva lexi hi gandzelaka xona, hikuva ku ponisiwa ku huma eka Vayuda. Kambe nkarhi wa ta ni sweswi wu fikile, lowu vangandzeri va ntiyiso va nga ta gandzela Tatana hi Moya ni ntiyiso, hikuva Tatana a lava vagandzeri lava nga ta n’wi gandzela hi ndlela leyo. Hikuva Xikwembu i Moya, kutani lava xigandzelaka va fanele ku xi gandzela hi Moya ni ntiyiso”. Yesu a a le ku n’wi hlamuseleni leswaku, a swi na mhaka ku ganzela Xikwembu na u ri kwihi. Eka Xikwembu a swi na nkoka ngopfu hambi u gandzela entshaveni ya Gerazim kumbe eYerusalema. Leswi Xikwembu xi swi tsakelaka, hi leswaku u xi gandzela kuya hi rito ra xona ni ntiyiso. U fanele u pfulekile ni ku tshembheka emahlweni ka xona, u khongela swi sukela embilwini ya wena, U nga xi fihleri nchumu. Loko u le ku gandzeleni ka Xikwembu, a moya wa wena wu fanele ku hlangana ni Xikwembu, hikuva xona i Moya. Kutani a moya wa wena lowu wu basisiweke hi ngati ya Yesu ni ku tatiwa hi Moya lowo Kwetsima, wu fanele ku hlangana ni N’wana na Tatana. Kutani a mbilu ya wena yi nga hundzuka kereke leyi Xikwembu xi fanelaka ku dzunisiwa kona, kutani u va ni vuswikoti bya ku vona hi mahlo ya moya kereke leyi u nga yaka eka yona uya gandzela ka yona.
A wansati a ku ka yena, “Ndza swi tiva leswaku Mesiya wa ta, loyi naswona a vitaniwaka Kriste. Loko a fika, a ta hi tivisa hinkwaswo.” Kutani Yesu a ku ka yena; “Hi mina loyi u vulavulaka na yena.” Sweswi hi nghena etimintsweni ta mhaka. Hambi leswi wansati loyi a hanyeke vutomi byo homboloka, a a ri ni ku navela embilwini ya yena ku twa rito ra Xikwembu. A ve ni nkateko wo vona ni ku vulavula ni muponisi, Xikwembu lexi a xi le ku mukutsuleni eku naveleni ka yena ka vudyoho ni ku n’wi pfulela ndlela yo ya tilweni. Hambi leswi a a nga gheni kereke, a a ri tiva rito ra Xikwembu leri a ri vulavula hi Mesiya loyi a a ta a huma tilweni loyi a a ta ta dyondzisa vanhu ntiyiso. A ve nkateko wukulu eka wansati luya, hikuva a a ri yena Mesiya loyi a a vulavula na yena ni ku veka ku tshemba eka yena. Na wona Moya lowo Kwetsima wu n’wi seketerile leswaku a a ri yena Mesiya.

E. NTSHOVELO WA MAHIKA (YOH. 4:27-42)

Eka nkarhi lowuya, a vadyondzisiwa va fika. Va hlamarisiwe ngopfu ku kuma Yesu na a vulavula ni wansati. A Moya wa lowo Kwetsima a wu va tatile swinene, va ko va vona leswaku laha a va ri kona a yi ri ndhawu yo hlawuleka, kutani a va ta dyoha loko a va yo vutisa swilo swo kala swi nga faneri. Kasi a wansati yena, a a tsakile swinene hikuva a tsumbule wanuna loyi a vuleke leswaku hi yena Mesiya, kutani a tsutsuma a ya etikweni ra le kusuhi, laha a a tshama kona. Kutani a huwelela hi rito leri tlakukeke eka tiko a ku: “ Tanani mi ta ni vonisa, wanuna loyi a ndzi byeleke hinkwaswo leswi ndzi tshamaka ndzi swi endla. Xana a nga kala a nga ri yena Mesiya xana?” Kutani vanhu va twisisa leswaku yi fanele yi ri mhaka yikulu leyi endlaka wansati loyi a hanyeke vutomi byo biha, a huwelela hi ndlela leyi. Kutani va khitikana va ya exihlobyeni, leswaku va ya tivonela hi voxe munhu loyi a vulavulaka hi yena, ni ku ya twa leswi a vulavulaka swona.
Loko wansati wa ha le ku endleni ka leswo, vadyondzisiwa va yena va lava ku n’wi nyika swakudya leswi va xaveke exikara. Yesu a a tale hi ntsaku swinene hikwalaho ka wansati loyi wa muhedeni a a amukerile mati lama hanyaka ya vutomi lebyi nga heriki eka yena, kutani a a nga vileri swakudya. Yingisa leswi a vulaka swona, “Ndzi ni swakudya leswi n’wina mi nga swi tiviki. A swakudya swa mina i ku endla ku rhandza ka loyi a ndzi rhumeke ni ku heta ntirho wa yena.” Hi marito lawa, a a le ku vuleni leswaku, a munhu a nga xurhi hi leswi a nyikiwaka ntsena, kambe ni hi leswi a nyikaka. A hi dyondzeni dyondzo leyi Hosi yi hi dyondzisaka eka mhaka leyi. Loko hi nyikela nkarhi wa hina hambi hi leswi hi nga na swona hikwalaho ka ku endla ku rhandza ka Xikwembu, a hi tiveni leswaku hi ta amukela leswinene eka Xikwembu. Loko hi langutela vutomi hi ntalo eka Xikwembu, hi fanele ku nyikela leswi hi nga na hina hi swi amukeleke.
Kutani Yesu a khutaza vadyondzisiwa va yena leswaku va endla hi matimba ku kuma nkarhi wa ku chumayela mahungu lamanene eka van’wana. A te: “Xana a ku na mune wa tiawara leswaku u amukela ntshovelo? Kambe ndzi ri ka n’wina ‘langutani nsimu, yi wupfile leswaku yi tshoveriwa! Hambi sweswi vatshoveri va le ku amukeleni ka hakelo, va le ku tiseni ka ntshovelo evuton’wini lebyi nga heriki. Kutani loyi a byaleke ni loyi a tshovelaka, va tsaka swin’we.” A va hleketa leswaku a va Samariya va dyohe ku tlula mpimo lero a va nga se lulama leswaku va amukela Mesiya. A va phazamile, hikuva a wansati wo sungula wa le Samariya loyi Yesu a vulavuleke na yena, a n’wi amukele hi ntsaku. A ntshovelo a wu wupfile leswaku wu tshoveriwa.
A ya emahlweni a ku; “Xi tiyile xisuriso lexi nge, ‘Un’wana wa byala kutani un’wana wa tshovela.’ Ndzi mi rhuma kuya tshovela leswi mi nga riki n’wina mi byaleke. Van’wana va byarile kasi n’wina mi tshoverile mihandzu ya ntirho wa vona.” Xana ma ha tsundzuka leswaku hi vulavule hi muprista loyi a rhumiweke eSamariya kuya dyondzisa va Samariya rito ra Xikwembu ( languta ponto 4 ka pagina 1), kambe loyi a byalaka switsongo u ta tshovela mihandzu yitsongo ya ku tirha ka yena, hikuva va amukerile vukhongeri byintshwa, kambe a va ha gandzela swifaniso. A muprista a a byarile mbewu, hikuva swa tikomba leswaku a va swi tiva leswaku a va le ku rindzeleni ka Mesiya, kutani timbilu ta vona a ti ti yimiserile ku n’wi amukela loko a fika. Swi nga endleka leswaku a muprista luya, a a ri bhoni etilweni ya leswi a swi endleka exihlobyeni esikwini leriya, laha a chumayeleke ko tala. Swi nga endleka a tale hi ntsaku wukulu hi ku vona mihandzu ya ntirho wa yena yi tshoveriwa.
A hi pfaleni hi tivhesi leti ta 39-42. “Ntalu ka va Samariya etikweni leriya, va tile va ta at pfumela eka Yesu hikwalahi ka marito ya loyi wansati ya ku; “A ndzi byele hinkwaswo leswi ndzi tshamaka ndzi swi endla.” Loko va tiko ra le Samariya va fikile laha Yesua a ri kona, va n’wi komberile leswaku a xwa na vona. Kutani a tshame na vona masiku mabirhi. Ntalo wa vona va yile va ya pfumela eka yena hikwalaho ka marito lawa a ma vuleke ka vona, kutani va ku ka wansati, “ A ha ha pfumeri hi marito lawa u nga hi byela wona wena, kambe hi lawa hi ma twaka hi hoxe eka yena, kutani ma hi kholwisa leswaku hikunene hi yena Muponisi wa misava.” Wa nga vona xitoriya xo hlamarisa lexi Yesu a xi endleke hi siku rin’we. Onge na hina hi nga tibyela; “ A swakudya swa mina i ku endla ku rhandza ka loyi a ndzi rhumeke ni ku hetisa ntirho wa yena.” Loko u endla ntirho wa Xikwembu, u amukela minkateko yo tala ku tlula munhu loyi a holaka timiliyoni ta marandi awara yin’wana ni yin’wana ya ntirho.
Onge Xikwembu xi nga hi pfuna hi tshama hi lulamile ni ku pfumela ku fana ni leswi Yesu a a ri xi swona.

//////////